68 مىڭ تەڭگەلىك ماسكا جانە باسقارما تۇسىندىرمەسى

 Zertteu Research Institute قوعامدىق قورىنىڭ مالىمەتىنشە، قاراعاندى وبلىسىندا جارتىلاي بەتپەردەنىڭ ءار داناسىن 68 مىڭ تەڭگەدەن ساتىپ العان. قاراعاندى وبلىستىق دەنساۋلىق ساقتاۋ باسقارماسى ازاماتتىق قوعام الدىندا اعىنان جارىلدى. 

تاپسىرىس بەرۋشى قاراعاندى وبلىسى دەنساۋلىق ساقتاۋ باسقارماسىنىڭ «وبلىستىق ارنايى مەديتسينالىق جابدىقتاۋ بازاسى» بەتپەردەنىڭ ءبىر داناسىنا 68 مىڭ تەڭگە جۇمساعان. بارلىعى 200 داناعا مەملەكەت قازىناسىنان 13,6 ملن تەڭگە تولەم جۇرگىزىلگەن.

تاۋاردىڭ تەحنيكالىق ەرەكشەلىگى تولىق سيپاتتالماعان:

«اەروزولدەن قورعايتىن ءفيلترى بار 3م جارتىلاي بەتپەردەلەرى.

قاتتى بولشەكتەردىڭ اۋاداعى ۇلەسى شامادان تىس كوپ بولۋى مەن بۋلانۋى قيىن سۇيىق بولشەكتەردەن جۇمىسشىلاردىڭ تىنىس الۋ ورگاندارى زيان شەگەتىن جاعدايدا، سولاردان جاقسى قورعانۋ ماقساتىندا قولدانىلادى. كومىر شاڭدارىنان قورعايتىن سۇزگىسى بار» دەلىنگەن مەملەكەتتىك ساتىپ الۋعا ارنالعان رەسۋرستاعى حابارلامادا.

قاراعاندى وبلىسىنىڭ دەنساۋلىق ساقتاۋ باسقارماسىنىڭ باستىعى ەرجان نۇرلىباەۆ قوعام تالقىسىنا تۇسكەن «قىمبات تا كۇماندى بەتپەردە» تۋرالى ماسەلەگە پىكىر ءبىلدىردى. ونىڭ ايتۋىنشا، ماسكانى قولدانعان دارىگەرلەردىڭ بىردە-ءبىرى ينفەكتسيا جۇقتىرماعان.

«بۇل جاي عانا ماسكا ەمەس، ادامنىڭ بەت-ءجۇزىن تولىق جاۋىپ تۇراتىن ەرەكشە ۇلگىدەگى بەتپەردە. قاۋىپسىزدىك-قورعانىش دەڭگەيى جوعارى بولعاندىقتان، رەانيماتسيا بولىمىندە جۇمىس ىستەيتىن دارىگەرلەرگە ارناپ الىندى. اينەك جاقتاۋى كورۋ جيەگىن كەڭەيتەدى، تىنىستاۋعا دا جەڭىل. جۇقپالى اۋرۋلار اۋرۋحاناسىندا قىزمەت ەتەتىن مامانداردىڭ ۆيرۋس جۇقتىرۋ قاتەرىن ازايتۋعا كومەك بەرەدى. ...قازاقستان ۇكىمەتى مەن ۆەدومستۆوارالىق كوميسسيانىڭ تىزىمىمەن راستالعان. الەۋمەتتىك جەلىدە جاريالانعانداي ءبىز مەملەكەتتىك ساتىپ الۋ تالابىن بۇزعامىز جوق. بارلىق نورمالار بويىنشا ءبىر كوزدەن ساتىپ الىندى. باسقارما بيۋدجەتتىڭ ءتيىستى ءارى زاڭدى جۇمسالۋىنا مۇددەلى ەكەنىن ايتقىمىز كەلەدى»، – دەيدى تاپسىرىس بەرگەن باسقارمانىڭ باستىعى.

مۇنى الۋعا بىلىكتى  رەانيماتولوگ-دارىگەرلەر ۇسىنىس بەرگەنىن ايتادى. 200 داناسى دا مامىر-ماۋسىم ايلارىندا وبلىس اۋماعىنداعى بارلىق رەانيماتسيا بولىمدەرىنە تاراتىلعان. كەيبىر رەانيماتولوگقا بىرنەشە دانادان ۇلەستىرىلگەن. كەيىن قايتا ساتىپ الىنباۋىنىڭ سەبەبى – ىندەت قارقىنى باسەڭدەگەندىكتەن قاجەتتىلىك تۋماعان. دارىگەرلەر جارتى جىلدان بەرى وڭدەۋ ادىسىمەن ءالى پايدالانىپ كەلەدى-ءمىس.

ول كوپشىلىك نازارىنا ىلىككەن بەتپەردەنى «ەڭ زاماناۋي ءارى قاۋىپسىز» ۇلگىسى دەپ سانايدى. 68 مىڭ تەڭگە دەگەن سوما تۋرالى «سول كەزدەگى ەڭ ءتيىمدى باعاعا ەڭ ءوپتيمالدى مودەلىن العانىمىزعا كۇمانىمىز جوق» دەيدى. بەتپەردە قۇنىنا بايلانىستى نۇرلىباەۆتىڭ ايتار ءۋاج بار:

«كوكتەمگى ءبىرىنشى تولقىن كەزىندەگى جانە قازىرگى تاڭداعى باعانى سالىستىرۋ شىندىققا جاناسپايدى. ءبىر رەتتىك بەتپەردەنىڭ باعاسى كوكتەم-جازدا قانداي بولعانى ەسىمىزدە، قازىر مۇلدەم باسقا... ءدال ءبىرىنشى تولقىنداعى قاربالاس كەزدە بۇدان ارزانىن تابۋ مۇمكىن ەمەس ەدى».

باعا جاعىنان دا ۇتىلماعانىن العا تارتقان باسارما باسشىسى ساپاسىنا سەنىمدى.

«ءباسى جوعارى» بەتپەردەنىڭ جارامدىلىق مەرزىمىن، قانشا ۋاقىت قولدانىلۋعا بولاتىنى جونىندە بىلمەيتىنىن جەتكىزدى. نۇرلىباەۆ شامامەن ءۇش-ءتورت اپتاعا جاراپ قالار دەپ توپشىلايدى. تاۋاردىڭ شىعارىلعان ەلى جايلى اقپارات تا انىق ەمەس: «سۇزگىدە ءوندىرۋشى لاتۆيا، ليتۆادان دەلىنگەن... ماسكانىڭ ءوزى قايدان ەكەنىن ازىرگە بىلمەيمىن».

رەداكتسيا سۇراعىنا جاۋاپ بەرگەن باسقارمانىڭ ءباسپاسوز قىزمەتىنىڭ دەرەگىنشە، بەتپەردە پولشادا وندىرىلگەن. سونداي-اق، 200 بەتپەردەنىڭ تۇگەلى التى بىردەي مەديتسينالىق ۇيىمعا جەتكىزىلگەن دەسەدى.

«قاراعاندى وبلىستىق بالالار كلينيكالىق جانە قودسب وبلىستىق كلينيكالىق اۋرۋحانالارى، جەزقازعان كوپبەيىندى، ح.ج.ماقاجانوۆ اتىنداعى كوپبەيىندى، ساتپاەۆ جانە بالقاش قالالارىنىڭ ورتالىق ەمحانالارىنىڭ ماماندارىنا بەرىلگەن».

باسقارما ناۋرىز-ءساۋىر ايلارىندا اتالعان ماسكا نارىقتا 69 300-69 800 تەڭگە ارالىعىندا ساۋدالانعانىنا سەندىرۋگە تىرىسادى.

“The Qazaq Times”