حالەل ماقسۇتوۆ الدىڭعى قاتاردا وڭ جاقتان ساناعاندا ءبىرىنشى كەلە جاتىر. فوتو: kt.kz/

قاراعاندى وبلىسى اكىمدى جەر قاتىناستارى باسقارماسىنىڭ باسشىسى كالەل ماقسۇتوۆ كارانتين كەزىندە توي جاساعانى ءۇشىن قىزمەتىنەن كەتكەن. بۇل جايلى وبلىس اكىمدىگىنىڭ رەسمي سايتىندا حابارلاندى.

"بۇگىننەن باستاپ جەر قاتىناستارى باسقارماسىنىڭ باسشىسى قالەل ماقسۇتوۆ كارانتيندى ورەسكەل بۇزعانى ءۇشىن، ياعني پاندەميا كەزىندە توي ۇيىمداستىرعانى ءۇشىن قىزمەتىنەن بوساتىلدى. تاعى دا ەسكەرتەمىن: مۇنداي زاڭسىزدىقتار ءۇشىن جازا وتە قاتال بولادى. مۇندا مەملەكەتتىك قىزمەتشىنىڭ قىزمەتتىك ەتيكاسىنىڭ بارلىق نورمالارى بۇزىلعان. وبلىستا كوروناۆيرۋس ينفەكتسياسىنا قارسى ءىس-قيمىل بويىنشا جۇرگىزىلىپ جاتقان ۇلكەن جۇمىستى قۇنسىزداندىرماڭىزدار" دەدى وبلىس اكىمى جەڭىس قاسىمبەك اپپارات وتىرىسىندا.

اقپاراتقا قاراعاندا، 7 تامىزدا 109 قىزمەتىنە قالاداعى مەيرامحانالاردىڭ بىرىندە توي ءوتىپ جاتقانى جايلى حابارلاما تۇسكەن. وقيعا ورنىنا پوليتسيا، سانەپيدستانتسيا جانە اكىمدىك وكىلدەرىنەن قۇرالعان ءموبيلدى توپ بارعان. مەيرامحانادا توي ءوتىپ جاتقانى راستالىپ، شارا توقتاتىلعان. اكىمدىكتىڭ حابارلاۋىنشا، عيمارات ىشىندە شامامەن 400 ادام بولعان. سەس وكىلدەرى حاتتاما تولتىرعان. عيمارات يەسى مەن شارا ۇيىماستىرۋشىلارعا ايىپپۇل سالىنادى.

پوليتسيا دەرەگىنە سۇيەنگەن Vlast سايتىنىڭ جازۋىنشا، سول كۇنى مەيرامحانادا ەكى شارا وتكەن: كىشى زالدا 40 ادام قاتىسقان "سۇندەت توي", ۇلكەن زالدا 350 ادام قاتىسقان توي بولعان. تويدى قالەل ماقسۇتوۆ ۇيىمداستىرعان.

57 جاستاعى ماقسۇتوۆ جەر قاتناستارى باسقارماسىنىڭ باسشىسى بولىپ 2019 جىلدىڭ 30 جەلتوقسانىندا تاعايىندالعان. ول وعان دەيىن قارقارالى اۋدانىنىڭ اكىمى بولىپ جۇمىس ىستەگەن.

قاراعاندى وبلىسى قازىر "قانىق قىزىل ايماقتا" تۇر. (بيلىك ۆيرۋس ورشىگەن ايماقتاردى كوروناۆيرۋس كارتاسىندا "قانىق قىزىل" بوۋيامەن بەلگىلەي باستاعان). مۇندا كۇن سايىن شامامەن مىڭ ناۋقاس تىركەلىپ ءجۇر. ايماقتا كارانتين كۇشەيگەن.

"The Qazaq Times"