Jwqpalı aurulardan qorğanuğa arnalğan 3M™ 6000 seriyalı betperde. Körneki suret. Foto: www.3mrussia.ru

 Zertteu Research Institute qoğamdıq qorınıñ mälimetinşe, Qarağandı oblısında jartılay betperdeniñ är danasın 68 mıñ teñgeden satıp alğan. Qarağandı oblıstıq Densaulıq saqtau basqarması azamattıq qoğam aldında ağınan jarıldı. 

Tapsırıs beruşi Qarağandı oblısı densaulıq saqtau basqarmasınıñ «Oblıstıq arnayı medicinalıq jabdıqtau bazası» betperdeniñ bir danasına 68 mıñ teñge jwmsağan. Barlığı 200 danağa memleket qazınasınan 13,6 mln teñge tölem jürgizilgen.

Tauardıñ tehnikalıq erekşeligi tolıq sipattalmağan:

«Aerozol'den qorğaytın fil'tri bar 3M jartılay betperdeleri.

Qattı bölşekterdiñ auadağı ülesi şamadan tıs köp boluı men bulanuı qiın swyıq bölşekterden jwmısşılardıñ tınıs alu organdarı ziyan şegetin jağdayda, solardan jaqsı qorğanu maqsatında qoldanıladı. Kömir şañdarınan qorğaytın süzgisi bar» delingen memlekettik satıp aluğa arnalğan resurstağı habarlamada.

Qarağandı oblısınıñ Densaulıq saqtau basqarmasınıñ bastığı Erjan Nwrlıbaev qoğam talqısına tüsken «qımbat ta kümändi betperde» turalı mäselege pikir bildirdi. Onıñ aytuınşa, maskanı qoldanğan därigerlerdiñ birde-biri infekciya jwqtırmağan.

«Bwl jay ğana maska emes, adamnıñ bet-jüzin tolıq jauıp twratın erekşe ülgidegi betperde. Qauipsizdik-qorğanış deñgeyi joğarı bolğandıqtan, reanimaciya böliminde jwmıs isteytin därigerlerge arnap alındı. Äynek jaqtauı köru jiegin keñeytedi, tınıstauğa da jeñil. Jwqpalı aurular auruhanasında qızmet etetin mamandardıñ virus jwqtıru qaterin azaytuğa kömek beredi. ...Qazaqstan ükimeti men vedomstvoaralıq komissiyanıñ tizimimen rastalğan. Äleumettik jelide jariyalanğanday biz memlekettik satıp alu talabın bwzğamız joq. Barlıq normalar boyınşa bir közden satıp alındı. Basqarma byudjettiñ tiisti äri zañdı jwmsaluına müddeli ekenin aytqımız keledi», – deydi tapsırıs bergen basqarmanıñ bastığı.

Mwnı aluğa bilikti  reanimatolog-därigerler wsınıs bergenin aytadı. 200 danası da mamır-mausım aylarında oblıs aumağındağı barlıq reanimaciya bölimderine taratılğan. Keybir reanimatologqa birneşe danadan ülestirilgen. Keyin qayta satıp alınbauınıñ sebebi – indet qarqını bäseñdegendikten qajettilik tumağan. Därigerler jartı jıldan beri öñdeu ädisimen äli paydalanıp keledi-mis.

Ol köpşilik nazarına ilikken betperdeni «eñ zamanaui äri qauipsiz» ülgisi dep sanaydı. 68 mıñ teñge degen soma turalı «sol kezdegi eñ tiimdi bağağa eñ optimal'di modelin alğanımızğa kümänimiz joq» deydi. Betperde qwnına baylanıstı Nwrlıbaevtıñ aytar uäj bar:

«Köktemgi birinşi tolqın kezindegi jäne qazirgi tañdağı bağanı salıstıru şındıqqa janaspaydı. Bir rettik betperdeniñ bağası köktem-jazda qanday bolğanı esimizde, qazir müldem basqa... Däl birinşi tolqındağı qarbalas kezde bwdan arzanın tabu mümkin emes edi».

Bağa jağınan da wtılmağanın alğa tartqan basarma basşısı sapasına senimdi.

«Bäsi joğarı» betperdeniñ jaramdılıq merzimin, qanşa uaqıt qoldanıluğa bolatını jöninde bilmeytinin jetkizdi. Nwrlıbaev şamamen üş-tört aptağa jarap qalar dep topşılaydı. Tauardıñ şığarılğan eli jaylı aqparat ta anıq emes: «Süzgide öndiruşi Latviya, Litvadan delingen... Maskanıñ özi qaydan ekenin äzirge bilmeymin».

Redakciya swrağına jauap bergen basqarmanıñ baspasöz qızmetiniñ dereginşe, betperde Pol'şada öndirilgen. Sonday-aq, 200 betperdeniñ tügeli altı birdey medicinalıq wyımğa jetkizilgen desedi.

«Qarağandı oblıstıq balalar klinikalıq jäne QODSB Oblıstıq klinikalıq auruhanaları, Jezqazğan köpbeyindi, H.J.Maqajanov atındağı köpbeyindi, Sätpaev jäne Balqaş qalalarınıñ ortalıq emhanalarınıñ mamandarına berilgen».

Basqarma naurız-säuir aylarında atalğan maska narıqta 69 300-69 800 teñge aralığında saudalanğanına sendiruge tırısadı.

“The Qazaq Times”