بۇگىن، 24 شىلدە تۇندە قاراعاندى وبلىسىنىڭ ساتپاەۆ قالاسىندا جەرگىلىكتى حالىق «جوعالعان بەس جاسار قىز بالانىڭ كۇدىكتى پەدوفيلدىڭ پاتەرىنەن تابىلعانىنا» نارازىلىق تانىتىپ، ءتۇنى بويى ەرەۋىلدەتتى.   

كەشە كەشكىسىن ساتپاەۆ قالاسىندا ىزدەۋ سالىنعان ءبۇلدىرشىن 24 شىلدەگە قاراعان تۇندە كوپقاباتتى ءۇيدىڭ بىرىنەن تابىلدى. ەرىكتى تۇردە ىزدەسكەن جانە وزگە دە تۇرعىندار ءۇيدىڭ ماڭىنا جينالعان.

تۇنگى ساعات 00:00-دەر شاماسىندا وسى ءۇيدىڭ پاتەرىنەن تاپقان. ونى كوپتىڭ كوزىنەن بۇركەپ، اۋرۋحاناعا الىپ كەتكەن. بالا تۋرالى باسقا حابار ازىرگە بەلگىسىز.

ساتپاەۆتىقتار بىرنەشە ساعات بويى كۇدىكتىنى «جالپىحالىقتىق سوت رەتىندە كوپشىلىك الدىندا جاۋاپقا تارتۋعا» تىرىسىپ، ءوز بەتىنشە جازالاۋعا تالپىنعان. قالالىق پوليتسيا دەپارتامەنتى باستىعىنىڭ ورىنباسارى ەرنات قالياكپاروۆ نارازى جۇرتتى تاراۋعا شاقىرعان. قالا اكىمى اسقار ىدىرىسوۆ جانە جەرگىلىكتى يمامنىڭ دا سوزىنە قۇلاق اسپاعان.

الەۋمەتتىك جەلىدە تاراعان بەينەجازبالاردان كۇدىكتى مەن ءبۇلدىرشىن تابىلعان تۇرعىن ءۇيدىڭ قاسىنا جينالعان جۇرتشىلىق پەن ساۋىت-سايمانمەن جاسانعان ارنايى جاساقتى كورۋگە بولادى. اشۋعا بۋلىققان كەيبىر ازاماتتار پودەزگە كىرۋ ءۇشىن تەرەزەلەردىڭ اينەگىن شاعىپ-سىندىرعان.

سونداي-اق الەۋمەتتىك جەلىدە كۇدىكتى رەتىندە تاراعان ەگدە جاستاعى ەر ادامنىڭ «ىقتيمال فوتوسىنىڭ» راس-وتىرىگى ازىرگە بەلگىسىز. رەسمي راستالا قويعان جوق.

ساعات 4:00-كە قاراي ىزالى جۇرت ۇيدەن پوليتسيا بولىمشەسىنە بەت العان. ۆيدەوداعى ءمان-جايعا كوڭىل اۋدارساق، توپ بولىپ جينالعانداردىڭ اراسىندا بازبىرەۋى «قىز بالانىڭ رەانيماتسيادا جاتقانىن جانە وعان ەگدە ازامات ەمەس، ونىڭ ۇلى زورلىق كورسەتكەن. بالانى قىزمەتتىك ءيىسشىل ءيتتىڭ كومەگىمەن تاپقانىن» ايتادى.

نارازىلار كۇدىكتى جەتكىزىلۋى مۇمكىن پوليتسيا بولىمىنە قاراتا تاس-تاياقتى قارشا بوراتقان ۋاقىتتا ءورت ءسوندىرۋشى، وزگە دە ءتارتىپ ساقشىلارى جەتىپ كەلگەن. ولاردىڭ كوبى كۇدىكتىنىڭ بولىمشەدە بارىنا كۇمان كەلتىرگەن.

جۇما كۇنى، تاڭ تاقاي بەرە ساعات 4:30 كەزىندە سوبر ساربازدارى پوليتسيا بولىمشەسىن باقىلاۋعا الىپ، كۇزەتكە تۇردى. ال تۋرا ساعات 4:35-تە پوليتسيا كوپشىلىكتى سابىرعا شاقىرىپ، تارتىپكە كەلتىرۋ ءۇشىن اسپانعا قاراي وق اتقان كورىنەدى.

ساتپاەۆ قالاسى اكىمدىگىنىڭ اپپاراتىنداعى ءباسپاسوز قىزمەتىنىنىڭ حابارلاۋىنشا، «جوعالعان قىز بالا قازىر اناسىمەن بىرگە». سونداي-اق رەسمي حابارلامادا «ازاماتتاردان سابىر ساقتاۋىن سۇرايمىز جانە جالعان قاۋەسەتكە سەنبەۋگە شاقىرامىز» دەلىنگەن.

تاڭعى ساعات 6:00-دە قاراعاندى وبلىسىنىڭ پوليتسيا دەپارتامەنتىنىڭ ءباسپاسوز قىزمەتى ارنايى مالىمدەمە جاريالادى. وندا:

«23 شىلدە كۇنى ساعات 21:00-دە ساتپاەۆ قالاسىنىڭ پوليتسياسىنا جەزقازعان قالاسىنىڭ تۇرعىنى بەس جاسار بالاسىنىڭ (قىز بالا) جوعالعانىن ايتىپ شاعىمدانعان. ساتپاەۆ قالاسىنىڭ كۇشتىك قۇرىلىمدارى مەن ەرىكتىلەردىڭ ىزدەۋىمەن قىز بالا كوپقاباتتى ۇيلەردىڭ بىرىندەگى پاتەردەن تابىلدى. بالا قازىرگى ۋاقىتتا اۋرۋحانادا تەكسەرىستەن ءوتىپ جاتىر»، – دەپ جازىلعان.

سونىمەن قوسا، وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ باسشىسى جاناتاي سەمبەكوۆ كۇدىكتىنىڭ ۇستالعانىن جەتكىزدى.

«دەگەنمەن ونداعان ازامات كۇدىكتىنى ءوز قولىنا بەرۋدى تالاپ ەتىپ وتىر. تارتىپسىزدىك بولعان ورىندا پوليتسەيلەر جۇمىس ىستەۋدە. دەپارتامەنت تاراپى قوعامدىق ءتارتىپتى قالپىنا كەلتىرۋگە جانە قالا تۇرعىندارىنىڭ قاۋىپسىزدىگىن قورعاۋعا قاجەتتى بارلىق شارانى قابىلدايدى»، – دەدى رەسمي ۋاكىل.

اكىمدىك ەلدى ارانداتۋعا ەرمەۋگە ۇگىتتەپ باعۋدا. قازىرگى تاڭدا قالاداعى ءتارتىپتى باقىلاۋعا ۇلتتىق گۆارديانىڭ جاساۋىلى جۇمىلدىرىلعان. ورە تۇرەگەلگەن ازاماتتىق جانە قوعام بەلسەندىلەرى «زاڭ قۋاتىنا سەنىم سەتىنەگەندە ەل ايىپتىلاردى وزىنشە جازالاۋدى قولعا الىپ، حالىق سوتى العا شىعاتىنىن، بىراق مۇنىڭ قاۋىپتى ەكەنىن» ايتادى.

"The Qazaq Times"