جەكەنبى كۇنى، قاراشانىڭ 7-ءسى تاڭعى ساعات 8.00 شاماسىندا قاراعاندى وبلىسى اباي قالاسىندا «ارسەلورميتتال تەمىرتاۋ» كومپانياسىنا قاراستى شاحتادا گاز جارىلىپ، اپاتتان التى ادام قازا تاۋىپ، ەكى ادامنىڭ جارالانعانى حابارلاندى. بۇل جونىندە توتەنشە جاعدايلار مينيسترلىگىنىڭ رەسمي وكىلى تالعات ءۋالي مالىمدەدى.
«7 قاراشا كۇنى ساعات 08.37-دە اباي قالاسىنداعى «ارسەلورميتتال تەمىرتاۋ» اق اباي شاحتاسىندا شترەك 3-ك10 جەلدەتكىشىنىڭ تۇبىندە كەنەتتەن مەتان گازى شىعىپ، اپات بولدى. شاحتادا بارلىعى 64 جۇمىسشى بولدى. 56 ادام بىردەن ءوز بەتىنشە ەۆاكۋاتسيالانعان»، – دەپ حابارلادى مينيسترلىك وكىلى.
رەسمي اقاپاراتقا قاراعاندا، وقيعا ورنىنان شىعىپ ۇلگەرمەگەن 8 قىزمەتكەردىڭ التاۋى قايتىس بولدى، ەكەۋى جاراقات الدى. جارالانعان كەنشىلەر وبلىستاعى ح.ج.ماقاجانوۆ اتىنداعى كوپبەيىندى اۋرۋحاناعا جەتكىزىلگەن. ولار قازىر رەانيماتسيادا جاتىر.
«قازىر ولاردى شاحتادان شىعارىپ الۋ جۇمىستارى جۇرگىزىلىپ جاتىر. ءوندىرىس پروتسەسى توقتادى. اپات سالدارىن جويۋ ءۇشىن ارناۋلى 20-دان اسا قىزمەتكەر، 4 تەحنيكا جۇمىلدىرىلدى. پرەمەر-مينيستر اسقار ءماميننىڭ تاپسىرماسى بويىنشا وقيعا ورنىنا توتەنشە جاعدايلار ءمينيسترى يۋري يلين باستاعان كوميسسيا قۇرىلدى»، – دەلىنگەن ۆەدومستۆو ءباسپاسوز قىزمەتى تاراتقان حابارلامادا.
قاراعاندى وبلىسىنىڭ اكىمى جەڭىس قاسىمبەكوۆ Facebook جەلىسىندەنى پاراقشاسىندا مارقۇمدار مەن زارداپ شەككەندەردىڭ وتباسىنا كوڭىل ايتىپ، ءتيىستى كومەك بەرىلەتىنىن جازدى. اقوردا پرەزيدەنت توقاەۆتىڭ كوڭىل بىلدىرەتىنىن، ۇكىمەتتىك كوميسسيا جاساقتالعانىن حابارلادى.
وبلىستىق توتەنشە جاعدايلار دەپارتامەنتىنىڭ باستىعى مۇرات كاتپانوۆ اپات بەلگىلەرى تەحنوگەندىك سيپاتتا ەكەنىن ايتتى. ونىڭ سوزىنشە، «مەتان گازىنىڭ ۇلكەن كونتسەنتراتسياسى پايدا بولىپ، وتتەگىنىڭ جەتىسپەگەندىكتەن كەنشىلەر تۇنشىعىپ قايتىس بولۋى ىقتيمال». ازىرگە اپاتتىڭ ناقتى سەبەبى انىقتالىپ جاتىر.
قازاقستان شاحتالارىندا كەيىنگى شيرەك عاسىردا وننان اسا ءىرى اپات بولىپ، 150-دەن اسا كەنشى قازا تاپقان. سونىڭ ءبىرى، 2008 جىلى ءدال وسى شاحتادا مەتان گازى جارىلىپ، 30 ادام وپات بولىپ، تاعى 14-ءى ءتۇرلى دارەجەدە جارالانعان ەدى.
اقپارات تولىقتىرىلدى
رەسپۋبليكاشىلدار يمميگراتسيالىق وپەراتسيانى سىنعا الدى، بىراق ترامپتى اشىق ايىپتاۋدان تارتىندى
ۇكىم وزگەرمەدى. مەملەكەتتىك ءتىلدىڭ قۇنى — ءتورت جىل تۇرمە مە؟
يرانداعى قانتوگىس پەن سىرتقى قىسىم: ترامپتىڭ ەكىۇشتى سيگنالى
كونستيتۋتسيا تاعى وزگەرمەك: رەفورما ما، الدە بيلىكتى قايتا قۇراستىرۋ ما؟
اقش «تاساداعى فلوتقا» توسقاۋىل قويدى: Olina تانكەرى جانە تەڭىزدەگى جاڭا سانكتسيالىق سوعىس
اتىراۋداعى جۇمباق جوعالۋ مەن ادام ءولىمى: ءىز-ءتۇزسىز ارتىلعان وتباسى، پوليتسيا تەرگەۋى جانە قوعام رەاكتسياسى