مينادان قازا بولعان روتا كومانديرىنىڭ جەرلەۋ راسىمىندە تيبەت تۋى كوتەرىلدى. فوتو: VOA7

ماۋسىم ايىندا ءۇندى-قىتاي شەكاراسىنداعى قاقتىعىستا قان توگىلدى، سودان بەرى ەكى ەلدىڭ قارىم-قاتىناسى سوڭعى جارتى عاسىرداعى ەڭ تومەنگى دەڭگەيگە ءتۇستى. ءۇندىستان مەن قىتايدىڭ ورتاق شەكاراسى 3488 شاقىرىمدى قۇرايدى، سونىڭ باسىم كوبى تولىق بەكىتىلمەگەن. قاقتىعىستان كەيىن جوعارى اسكەري شەندىلەردىڭ كەلىسسوز كەزدەسۋى ەش ناتيجە بەرمەدى. ءۇندىستان قىتايدان شەكارا ماڭىزدا جوعالىپ كەتكەن 5 جاۋىنگەرىنە سۇراۋ سالدى. وسىلايشا الەمنىڭ ەڭ بيىك ۇستىرتىندە قاقتىعىس قاۋپى كۇشەيىپ كەلەدى.

ءۇندىستاننىڭ ارۋناچال-پرادەش (قىتايلار بۇل ايماقتى وڭتۇستىك تيبەت دەپ اتايدى) اتتى شەكارالىق ايماعىندا 5 جاۋىنگەرى جوعالىپ كەتكەن. ادەتتە تاۋلى-ورماندى وڭىردە ناقتى شەكارا بولماعاندىقتان، شەكارا قاراۋىلدارى بارلىق جەرلەردە شارلاۋ جۇرگىزە بەرەدى. شەكاراشىلاردىڭ ءبىر-بىرىنە ءوتىپ كەتۋى قالىپتى جاعداي سانالىپ كەلگەن.

ءۇندىستان قورعانىس مينيسترلىگى مالىمدەمەسىندە، جوعالىپ كەتكەن شەكاراشىلار تۋرالى قىتاي تارابىنا تەلەفون ارقىلى حابارلانعان جانە ولاردىڭ شەكارادان ءوتىپ كەتۋى مۇمكىن ەكەنىن ەسكەرتىپ، جاۋىنگەرلەردى كەرى قايتارىپ بەرۋدى وتىنگەن. الايدا، قىتاي تارابى بۇل ساۋالداردى جاۋاپسىز قالدىرعان.

ال، ارۋناچال-پرادەش شتاتىنىڭ كەڭەسشىسى ايرين: «قىتايدىڭ حالىق-ازاتتىق ارمياسى شەكارادا بەس ءۇندى ازاماتىن ۇرلاپ كەتتى»، – دەپ مالىمدەدى جانە قىتايدان ولاردى تەز ارادا بوساتۋدى تالاپ ەتتى.

وتكەن اپتادا ءۇندى مەن قىتايدىڭ قايشىلىعىن كۇشەيتەتىن تاعى ءبىر وقيعا بولدى. وڭىردەگى جەرگىلىكتى تيبەتتەردەن قۇرالعان روتا كومانديرى قىتاي اسكەرلەرىنىڭ ميناسىنان قازا تاپتى. ال، ونى جەرلەۋگە جەرگىلىكتى تيبەتتەر مەن ءۇندىستان ارمياسىنىڭ وكىلدەرى قاتىستى. جەرلەۋ راسىمىندە تيبەت تاۋەلسىزدىگىنىڭ سيمۆولى سانالىپ كەلگەن بايراقتارىن كوتەردى.

قىتاي ءوزىنىڭ تيبەت ءۇستىرتى ارقىلى ۇندىستانمەن شەكتەسەتىن شەكاراسىنان الاڭداۋلى. سەبەبى، بەيجىڭنىڭ باسىپ-جانىشتاۋ ساياساتى تيبەتتە دە قاتتى جۇرىلگەندىكتەن، قىتاي بيلىگىنىڭ وڭىردەگى سەنىمى ايتارلىقتاي ەمەس. وعان قوسا شەكارانىڭ ەكى جاعىندا دا تيبەتتەر قونىستانعان. ءۇندىستان ارمياسىنىڭ قۇرامىندا اتالعان شەكارا ماڭىندا قىزمەت ەتەتىن تيبەتتەر دە كوپ. بۇل دا ءۇندى-قىتاي شەكاراسىنداعى كۇشەيىپ كەلە جاتقان قاقتىعىستىڭ ءبىر سەبەبى.

“The Qazaq Times”