قىتاي ءانۇرانى تۋرالى زاڭ: گونكونگ دەپۋتاتتارى توبەلەسىپ قالدى

گونكونگ دەپۋتاتتارى توبەلەستى. 18 مامىر، دۇيسەنبى كۇنى گونكونگتىڭ زاڭ شىعارۋ كەڭەسىنىڭ كەزەكتى جيىنىندا ۇكىمەتتى جاقتاۋشى جانە دەموكراتيالىق وزگەرىس تالاپ ەتۋشى دەپۋتاتتار اراسىندا توبەلەس بولدى. ولار سايلاۋ كوميتەتىنە توراعا سايلاۋ ماسەلەسىندە كەلىسە الماعان.

سايلاۋ كوميتەتىنىڭ قۇزىرىنا گونكونگتاعى ەڭ ءبىر قايشىلىققا تولىپ بولعان قىتاي حالىق رەسپۋبليكاسىنىڭ ءانۇرانىن قورعاۋ مەن قاداعالاۋ قىزمەتى دە كىرەدى. سوندىقتان، ۇقساماعان ساياسي كوزقاراستاعى دەپۋتاتتار اراسىندا اتالعان كوميتەت باسشىسىن تاعايىنداۋعا دەگەن قاراما-قارسى پىكىرلەر ءورشىپ، سوڭعى كەڭەستىڭ زالىن توبەلەس مايدانىنا اينالدىرىپ جىبەردى.

بەيجىڭ گونكونگتان قحر ءانۇرانىنا قۇرمەت كورسەتۋىن تالاپ ەتىپ كەلەدى. ۇلتتىق گيمنگە قۇرمەت كورسەتپەگەندەردى قىلمىستىق جاۋاپكەرشىلىككە تارتۋدى جۇزەگە اسىرعىسى كەلەدى.

الايدا، دەموكراتيالىق قۇندىلىقتارعا ۇمتىلىپ جاتقان گونكونگتا بۇل ويلارى ىسكە اسپاي كەلەدى. اتالمىش زاڭدى قابىلداۋ بىلاي تۇرسىن، قاداعالاۋ قۇزىرەتىنە يە كوميتەتتىڭ باسشىسىن سايلاۋ ىسىندە دە كەدەرگىگە ۇشىراپ وتىر.

ەكى تاراپ اراسىنداعى قايشىلىق بىرەر ايدان بەرى جالعاسىپ كەلەدى. دەپۋتاتتارى اراسىنداعى كەشەگى توبەلەسكە كۇزەت قىزمەتى ارالاسىپ توقتاتتى، كەيبىر «قىزۋقاندى» دەپۋتاتتاردى زالدان كوتەرىپ شىعاردى.

ايتا كەتەيىك

گونكونگتاعى ءبىر پالاتالى زاڭ شىعارۋ كەڭەسى 1843 جىلى قۇرىلعان. ول كەزدە گونكونگ بريتانيانىڭ قولاستىنا قاراعان كەز جانە اتالعان كەڭەس گۋبەرناتورعا كەڭەس بەرۋ قىزمەتىن وتەگەن. قازىر ونىڭ 70 وكىلى بولىپ، گونكونگتاعى ىقپالدى بيلىك ورگانىنا اينالعان. ول بيۋدجەتتى، سالىق پەن ۇكىمەتتىك جانە قوعامدىق شىعىنداردى باقىلاي الادى. وعان قوسا سۋديالاردى تاعايىنداپ، گونكونگ اكىمشىلىگىنىڭ باسشىسىنا يمپيچمەنت جاريالاي الادى.

“The Qazaq Times”