كورنەكى سۋرەت

دۇنيەجۇزىلىك ساۋدا ۇيىمىنىڭ باسشىسى روبەرتو ازەۆەدو كوروناۆيرۋس پاندەمياسىنان كەيىن الەمدى ءىرى ەكونوميكالىق داعدارىس كۇتىپ تۇر دەگەن بولجام جاسادى.

ونىڭ پىكىرىنشە، دەرت تولىعىمەن جويىلعان ۋاقىتتا 2008 جىلداعىدان دا اۋىر قارجىلىق داعدارىس ورىن الۋى مۇمكىن جانە بۇعان جاھاننىڭ بىردە ءبىر ەلى توتەپ بەرە المايدى.

ازەۆەدو سوزىندە: «پاندەميا الەم ەلدەرىنىڭ اكونوميكاسىنا اۋىر سوققى بولادى. جۇمىسسىزدىق بەلەڭ الىپ، ساۋدا-ساتىق تۇرالاپ قالادى. بولجام بويىنشا، ءتىپتى وسىدان 12 جىل بۇرىن بولعان قارجى داعدارىسىنان دا اۋىر بولماق. قانشالىقتى دامىعان ەل بولسا دا داعدارىستىڭ اسەرىن سەزەدى. تىعىرىقتان شىعۋدىڭ ءبىر جولى، ساۋدا جاساپ، قاجەتتى تاۋار مەن قىزمەتتى جەتكىزۋ بولىپ وتىر. سوندىقتان مەديتسينالىق داعدارىس اياقتالعاننان كەيىن الەم ەلدەرىنىڭ ءبىر-بىرىنە الىس-بەرىسىنىڭ ناتيجەسىندە عانا كوپتەگەن مەملەكەت ەكونوميكا تۇرعىسىنان ەس جينايتىن بولادى»، – دەدى.

ماماندار بۇل قيىندىقتى مەملەكەتتەر ءوزارا ساۋدا ىنتىماقتاستىقتى نىعايتىپ، ينۆەستيتسيالىق اينالىم ارقىلى عانا جەڭە الادى دەيدى.

ايتا كەتەيىك، الەمدە 470 مىڭنان استام ادام قاتەرلى ۆيرۋسقا شالدىققان. سونداي-اق 21 مىڭنان استام ناۋقاس كوز جۇمسا، 114 مىڭداي ادام دەرتىنەن ايىقتى.

"The Qazaq Times"