تىكەن-تورمەن قورشالعان ەۋروپا شەكاراسى. فوتو: SAKIS MITROLIDIS / AFP.

جاس بالالاردى قامتىعان مىڭداعان ادام بىرنەشە كۇننەن بەرى تۇركيا مەن گرەكيا شەكاراسىندا تۇنەپ جاتىر. بۇل سۇريالىق بوسقىندار، ولار ەۋروپاعا ءوتىپ كەتكىسى كەلەدى، ال تۇركيا ميگرانتتاردى ۇستاپ تۇرا المايتىنىن، شەكاراسىن اشىپ بەرەتىنىن مالىمدەگەن.

گرەكيا سىرتقى ىستەر مينيسترلىگى 130 مىڭ شاماسىنداعى بوسقىننىڭ ەل شەكاراسىن كەسىپ وتكەنىن راستادى. گرەكيا بار كۇشىن سالىپ ميگرانتتار اعىمىن توقتاتىپ قالۋعا تىرىسۋدا. بىراق، تۇركيا ءوزىنىڭ ميگرانتتار اعىمىن توقتاتۋعا شاراسىز ەكەنىن ايتتى، بۇل گرەكياعا ۇلكەن سالماق تۇسىرمەك.

تۇركيا مەن ءسۇريا اراسىنداعى سوعىس كۇشەيە تۇسكەننەن كەيىن، وعان قوسا انكارانىڭ بوسقىندار تۋرالى مالىمەتىنەن كەيىن يراك پەن ءسۇريا جەرىنەن بارعان بوسقىندار تۇركيانىڭ ەۋروپامەن شەكاراسىنا قاراي اعىلدى. زاڭسىز ميگرانتتاردىڭ سەلدەي اعىلعان ەكپىنىن توقتاتۋ ءۇشىن گرەكيا بارلىق شەكارالىق بەكەتتەرىن تىكەن-تورمەن قورشادى. گرەكيانىڭ بۇل ارەكەتى بىرقاتار ەلدىڭ اقپارات قۇرالدارىنا تاقىرىپ بولدى. بىراق، سوعان قاراماستان ميگرانتتار گرەك شەكاراسىنان الىستاپ كەتە الماي وتىر.

گرەك شەكاراسىندا ۇستالعان بوسقىندار. فوتو: AFP7

گرەك شەكاراسىندا ميگرانتتار مەن شەكارا كۇزەتشىلەرى اراسىندا قاقتىعىستا ورىن الۋدا. كەي شەكارا بەكەتتەرىندە ميگرانتتار كۇشپەن شەكارا بۇزۋعا دا تالپىندى. قۇرىلىق شەكارالارىنان تىس سۋ جولدارى ارقىلى وتپەك بولعان ميگرانتتاردىڭ قايىقتارى دا گرەك شەكاراشىلارىن ابدەن اۋرەگە سالدى.

تۇركيا جەرىندە رەسمي دەرەكتەر بويىنشا 3,7 ملن بوسقىنداردىڭ جاساپ جاتقانى بەلگىلى. ستاتيستيكاعا سۇيەنسەك ولاردىڭ 44 پايىزى جاس بالالار. يدليب جانجالىنان كەيىن تۇركيا ميگرانتتاردىڭ جاڭا اعىمىنا شاراسىز ەكەنىن جاريالاپ، ەۋروپا جاعىنداعى شەكارالارىن اشىپ قويدى. شىن مانىسىندە ميگرانتتار تۇركياعا كوپ سالماق سالعانىمەن، ءبىر ەسەپتە ولار ەۋروپامەن كەلىسىم جاساسۋدىڭ قۇرالى دەسە دە بولادى. تۇركيا شەكاراسىن اشىپ تاستاۋ نەمەسە جابۋ ارقىلى ەۋروپانى ءوز دەگەنىنە كوندىرگىسى كەلەدى.

ەردوعان ماسكەۋگە قاراتا مالىمدەمە جاسادى. فوتو: VOA

تۇركيا بۇعان دەيىن دە ەۋروپا جەرىنە ميگرانتتاردى وتكىزبەي ءوز جەرىندە الىپ قالۋ ارقىلى ەۋرووداقتان قارجىلاي قولداۋ الىپ كەلدى. ونىڭ ۇستىنە ناتو-داعى ىقپالى دا جوعارىلاي ءتۇستى. دەگەنمەن، ەۋرووداقتىڭ ميگرانتتار ءۇشىن بولەتىن قارجىسى داۋ-دامايعا ۇشىرادى، كەيبىر ەلدەر وزىنە كەلە قويماعان بوسقىندار ءۇشىن وتەماقى تولەۋگە كەلىسپەگەنى دە بار. بۇنىڭ ءبارى تۇرىك ەلى مەن ەۋروپا ەلدەرى اراسىندا كەيبىر قىرعي-قاباق جاعدايلارعا سەبەپ بولدى.

ال، سوڭعى كەزدەرى يدليبتەگى جانە ءسۇريانىڭ وزگە جەرىندەگى تۇرىك ارمياسىنىڭ ارەكەتتەرىنە نارازى بولعان ەو تۇركيانىڭ اشۋىنا ءتيدى. ەندى ءوز ەلىندە ساقتاپ وتىرعان ميلليونداعان بوسقىن انكارانىڭ جاڭا قۇرالىنا اينالدى دەسە دە بولادى. بىراق، ءسۇريا جەرىندە قاقتىعىس جالعاسا بەرسە ميگرانتتار اعىمى تۇركيا عانا ەمەس وعان جاقىن ەۋروپا ەلدەرى ءۇشىن دە الەۋمەتتىك داعدارىستىڭ قاۋپىن الا كەلەدى.

“The Qazaq Times”