زەينەتاقى رەفورماسىنا قارسى ەرەۋىل. فوتو: ەرا

فرانتسيا پرەزيدەنتى ەممانۋەل ماكرون ۇسىنعان زەينەتاقى رەفورماسىنا قارسى سوڭعى ون جىلدا ورىن الماعان جالپىۇلتتىق ءىرى ەرەۋىل باستالدى. بۇل تۋرالى Reuters اگەنتتىگى حابارلادى.

مۇعالىمدەر، قوعامدىق كولىك جۇرگىزۋشىلەرى، پوليتسەيلەر، سوت قىزمەتكەرلەرى، مەديتسينا قىزمەتكەرلەرى، اۆياديسپەتچەرلەر جانە باسقا دا كوپتەگەن ماماندىق وكىلدەرى جاپپاي ەرەۋىلگە شىققان. سالدارىنان كوپتەگەن مەكتەپتەردە وقۋ توقتاتىلىپ، كولىك قاتىناسى بۇزىلدى. كەي ايماقتارداعى اۋرۋحانالاردا تەك كەزەكشى مەدبيكەلەر عانا قىزمەت كورسەتىپ جاتىر.

ەرەۋى بىرنەشە كۇنگە سوزىلۋى مۇمكىن. نارازى حالىق ەل پرەزيدەنتى رەسمي مالىمدەمە جاساپ، رەفورمانى وزگەرتپەيىنشە، ەرەۋىلدى توقتاتپايمىز دەگەن تالاپ قويدى. حالىق اراسىندا جۇرگىزىلگەن ساۋالناما ناتيجەسىندە رەسپوندەنتتەردىڭ 70%-ى پرەزيدەنت شەشىمىن قۇپتامايدى.

فرانتسيا پرەزيدەنتى ەممانۋەل ماكرون زەينەتاقى ماسەلەسى سايلاۋعا دەيىن شەشىلەدى دەگەن. فوتو: ۆۆس

نەگىزىنەن فرانتسيادا ونداعان زەينەتاقى باعدارلامالارى بار. بۇل باعدارلامالار مەملەكەتكە وراسان شىعىن اكەلەتىنىن ايتقان ماكرون، بىرىڭعاي زەينەتاقى رەفورماسىن ۇسىنىپ وتىر. پرەزيدەنتتىڭ جوسپارى بويىنشا ءار جۇمىس ىستەگەن كۇنگە ارنايى بالل جۇيەسى ەنگىزىلەدى جانە زەينەتاقىنىڭ مولشەرى جيناقتالعان ۇپايلار نەگىزىندە ەسەپتەلەدى.

سوڭعى ون جىلدا فرانتسياداعى زەينەت جاسى 60-تان 62-گە دەيىن ءوستى. دەگەنمەن، بۇل دامىعان ەلدەر اراسىنداعى ەڭ تومەن كورسەتكىشتەردىڭ ءبىرى سانالادى. ۇلىبريتانيادا زەينەت جاسى – 66 جىل.

ۇسىنىلىپ وتىرعان ماكرو-رەفورما زەينەتاقى جاسىن ودان ءارى ارتتىرۋى مۇمكىن. تولىق زەينەتاقى الۋ ءۇشىن فرانتسۋزدارعا 64 جاسقا دەيىن جۇمىس ىستەۋگە تۋرا كەلەدى.

1995 جىلى فرانتسيادا ورىن العان ەڭ ءرى ەرەۋىل دە زەينەتاقى رەفورماسىنا قارسى وتكەن بولاتىن. ەرەۋىل سالدارىنان ەلدەگى ترانسپورت جۇيەسىندە ءۇش اپتالىق كوللاپس ورىن العان.

"The Qazaq Times"