Зейнетақы реформасына қарсы ереуіл. Фото: ЕРА

Франция президенті Эммануэль Макрон ұсынған зейнетақы реформасына қарсы соңғы он жылда орын алмаған жалпыұлттық ірі ереуіл басталды. Бұл туралы Reuters агенттігі хабарлады.

Мұғалімдер, қоғамдық көлік жүргізушілері, полицейлер, сот қызметкерлері, медицина қызметкерлері, авиадиспетчерлер және басқа да көптеген мамандық өкілдері жаппай ереуілге шыққан. Салдарынан көптеген мектептерде оқу тоқтатылып, көлік қатынасы бұзылды. Кей аймақтардағы ауруханаларда тек кезекші медбикелер ғана қызмет көрсетіп жатыр.

Ереуі бірнеше күнге созылуы мүмкін. Наразы халық ел президенті ресми мәлімдеме жасап, реформаны өзгертпейінше, ереуілді тоқтатпаймыз деген талап қойды. Халық арасында жүргізілген сауалнама нәтижесінде респонденттердің 70%-ы президент шешімін құптамайды.

Франция президенті Эммануэль Макрон зейнетақы мәселесі сайлауға дейін шешіледі деген. Фото: ВВС

Негізінен Францияда ондаған зейнетақы бағдарламалары бар. Бұл бағдарламалар мемлекетке орасан шығын әкелетінін айтқан Макрон, бірыңғай зейнетақы реформасын ұсынып отыр. Президенттің жоспары бойынша әр жұмыс істеген күнге арнайы балл жүйесі енгізіледі және зейнетақының мөлшері жинақталған ұпайлар негізінде есептеледі.

Соңғы он жылда Франциядағы зейнет жасы 60-тан 62-ге дейін өсті. Дегенмен, бұл дамыған елдер арасындағы ең төмен көрсеткіштердің бірі саналады. Ұлыбританияда зейнет жасы – 66 жыл.

Ұсынылып отырған макро-реформа зейнетақы жасын одан әрі арттыруы мүмкін. Толық зейнетақы алу үшін француздарға 64 жасқа дейін жұмыс істеуге тура келеді.

1995 жылы Францияда орын алған ең рі ереуіл де зейнетақы реформасына қарсы өткен болатын. Ереуіл салдарынан елдегі транспорт жүйесінде үш апталық коллапс орын алған.

"The Qazaq Times"