رەسەيدىڭ اسكەري پوليتسياسى ءسۇريانىڭ تۇركيا شەكاراسىنا جاقىن مانبيج جانە كوباني قالالارىنا كىردى. تۇركيا مەن ءسۇريا شەكاراسىن باقىلاۋعا رەسەيلىك جانە سۇريالىق كۇشتەر دە تارتىلۋدا.رەسەي مەن تۇركيا اراسىنداعى كەلىسىمگە ساي، ەكى ەل اسكەرلەرى شەكاراداعى 10 شاقىرىمعا سوزىلعان ارنايى بەلگىلەنگەن جولاقتى ورتاق باقىلاۋعا الۋى كەرەك. سونداي-اق، كۇرد قارۋلى كۇشتەرى 150 ساعات ىشىندە شەكارادان 32 شاقىرىم قاشىقتىققا دەيىن ۇزاپ كەتۋى كەرەك.

تۇركيامەن شەكاراداعى 15 شەكارالىق بەكەتتە سۇريالىق اسكەرلەر رەسەي اسكەرلەرىمەن بىرگە كۇزەتىپ تۇرعانىن BBC حابارلاعان بولاتىن. شەكاراداعى ءسۇريا مەن رەسەي اسكەرلەرىنىڭ ناقتى سانى تۋرالى مالىمەت بەرىلگەن ەمەس. جالپى ءسۇريا جەرىندەگى رەسەيلىك جاۋىنگەرلەردىڭ سانى دا بەيمالىم.

بىراق، رەسەي مەن ءسۇريا قارۋلى كۇشتەرى ايماقتان كۇرد قارۋلى كۇشتەرىنىڭ شىعىپ كەتۋىنە قالاي كەپىلدىك بەرەتىنىن ەشكىم ايتا المايدى. سەبەبى، تۇركيا ءسۇريانىڭ سولتۇستىگىندە اسكەري ارەكەتتەردى باستاۋدان بۇرىن كۇرد قارۋلىلارى باشار اساد رەجيمىنە قارسى ءسۇريا دەموكراتيالىق ارمياسىن قاتارىندا بولدى.

كەيبىر ساراپشىلار، رەسەيدىڭ جانە داماسك رەجيمىنىڭ بۇل ماسەلەدە ۇقساماعان مۇددەمەن ارالاسىپ وتىرعانىن ايتادى. ايتالىق، داماسك بۇعان دەيىن ىقپالى ءالسىز بولىپ كەلگەن سولتۇستىك-شىعىس اۋماقتاعى ءوز بيلىگىن قامسىزداعىسى كەلەدى; رەسەي بولسا سۇرياداعى جالپى ىقپالىن ودان سايىن تەرەڭدەتە تۇسكىسى كەلەدى.

ال، تۇركيا مەن رەسەي اراسىندا كەلىسىم جاسالعانىمەن ەكى ەلدىڭ مۇددەلەرى اراسىندا قايشىلىقتار بار. تۇركيا سۇرياداعى ءوزى قولداعان كۇشتەردىڭ ىقپالىن كەڭەيتىپ، ءسۇريا تارابىنان كەلەتىن قاۋىپتەردى جەڭىلدەتۋدى قالايدى. ال، باشار اسادتى قولداعان رەسەي مەن يران بولسا رەجيمگە قارسى كۇشتەرمەن سوعىسىپ وتىر.

شىن مانىسىندە، رەسەي، تۇركيا جانە يران اراسىنداعى «ۇشتىك سامميت» وسى كەرەعار مۇددەلەردى ۇيلەستىرۋ ءۇشىن تىرىسىپ كەلگەن. بۇل قايشىلىقتى جاعدايلار ءسۇريا داعدارىسىنىڭ ءالى دە ۇزاق ۋاقىتقا سوزىلاتىنىن بىلدىرگەندەي.

 

“The Qazaq Times”