كۇرد گەنەرالىنىڭ جانايقايى: كۇردتەر ەندى رەسەيدىڭ قولداۋىنا يە بولا ما؟

ءسۇريا ارمياسى ءوز ەلىندەگى كۇردتەرگە بولىسىپ، تۇركياعا قارسى سوعىساتىنى بەلگىلى بولدى. شەكاراسىنا جاقىن كۇردتەردى ىعىستىرىپ تاستاۋ ماقساتىندا اسكەري وپەراتسياسى باستاعان تۇركيا ءۇشىن بۇل ۇلكەن كەدەرگى دەۋگە بولادى. باشار اساد رەجيمىنە قاراستى ارميا تۇرىك اسكەرلەرى كىرگەن سولتۇستىك ايماققا اتتانعانى دا حابارلاندى. ەڭ ماڭىزدىسى، جەرگىلىكتى باسىلىمدار كۇرد كۇشتەرىنىڭ باشار اسادپەن كەلىسىمگە كەلگەنىن جازۋدا.

داماسك بيلىگىنە قاراستى قارۋلى كۇشتەردىڭ سولتۇستىككە اتتانعانىن ەڭ العاش سانا اقپاراتتىق اگەنتتىگى حابارلاعان بولاتى. «تۇركيانىڭ اگرەسسياسىنا قارسى تۇرۋ ءۇشىن ءسۇريا قارۋلى كۇشتەرى سولتۇستىككە اتتاندى»، – دەپ جازدى اتالعان اگەنتتىك حابارىندا.

سيرياداعى قازىرگى تەرروريتوريالىق جاعداي. فوتو: The Qazaq Times

بۇعان دەيىن تۇركيا مەن ءسۇريا ارمياسى بەتپە-بەت قاقتىعىسقا كەلمەگەن. سيريا شەكاراسىنا كىرگەن تۇرىك اسكەرلەرىنىڭ سوققىسى تەك كۇرد قارۋلى كۇشتەرىنە باعىتتالعان ەدى.

كۇرد كۇشتەرىنىڭ جەتەكشىلەرى مالىمدەمەسىندە: «ءسۇريا ارمياسى سولتۇستىك شەكاراعا ورنالاسىپ، تۇركيانىڭ اگرەسسياسىنا قارسى كۇرەسكە كومەكتەسەتىن بولادى»، – دەلىنگەن. ال، وتكەن اپتانىڭ سوڭىندا كۇرد كۇشتەرىنىڭ ليدەرلەرى مالىمدەمە تاراتىپ: «اقش اسكەرلەرىن ايماقتان شىعارىپ كەتسە، وندا ءبىز رەسەيمەن كەلىسىم جاسايمىز»، – دەگەن بولاتىن. كۇرد گەنەرالى مازلۋم كوباني ابدي اقش-قا قاراتا: «سىزدەردىڭ مەنىڭ ەلىمدى قورعاپ قالۋعا، بۇل بومبالاۋدى توقتاتىپ قالۋعا ەرىكتەرىڭىز جەتە مە؟ مەن سونى بىلگىم كەلەدى. ەگەر بۇل قولدارىڭىزدان كەلمەسە، وندا ءبىز ۇكىمەتپەن، رەسەيمەن كەلىسۋگە ءماجبۇرمىز. ءبىزدى قورعاپ قالۋ ءۇشىن ۇشاقتارىن الدىرۋعا ءماجبۇرمىز»، – دەگەن بولاتىن.

ال، كەشە كۇرد گەنەرالى مەن اساد رەجيمىنىڭ وكىلدەرى رەسەيدىڭ سۇرياداعى اسكەري بازاسىندا كەزدەسكەن. بۇل تۋرالى «رەيتەر» اگەنتتىگى حابار تاراتقان. وسىدان كەيىن ءسۇريا ارمياسى 48 ساعات ىشىندە كۇرد باقىلاۋىنداعى مانبيج جانە كوباني قالالارىنا كىرەتىنى حابارلاندى.

كەشە جانە كۇردتەردىڭ باقىلاۋىنداعى لاگەرلەردەن «يسلام مەملەكەتى» تەررورلىق توبىنىڭ مۇشەلەرىنىڭ قاشىپ كەتكەنى دە بەلگىلى بولدى. بۇرىن اتالعان تەررورلىق توپتىڭ قاتارىندا سوعىسقان شامامەن 100-دەن استام ادام قاماۋدان قاشىپ شىققان. وسىدان بۇرىن كۇردتەر لاگەرلەردى قاداعالاۋعا شامالارىنىڭ كەلمەي جاتقانىن ەسكەرتكەن. ال، كۇردتەر قولعا تۇسكەن لاڭكەستەردى تۇركياعا قارسى پايدالانۋى مۇمكىن دەگەن بولجامداردى دا ايتقان بولاتىنبىز. كۇرد كۇشتەرى قاشىپ كەتكەن لاڭكەستەردىڭ سانىن «800-گە جۋىق» دەپ كورسەتتى.

“The Qazaq Times”