ماسكەۋ تارابى تۇركيانىڭ ءسۇريادا قاۋىپسىز ايماق قۇرۋ تۋرالى ۇسىنىسىن قابىلداماق. بۇل تۋرالى تۇركيا اقپارات قۇرالدارى جازۋدا. وسىدان بۇرىن تۇركيادا وتكەن «ۇشتىك سامميتتە» (تۇركيا، رەسەي جانە يران) تۇرىك پرەزيدەنتى رەجەپ تايىپ ەردوعان انكارانىڭ سۇرياداعى قاۋىپسىز ايماق قۇرۋ تۋرالى ۇسىنىسىن ورتاعا سالعان بولاتىن.

رەسەي سىرتقى ىستەر ءمينيسترى سەرگەي لاۆروۆ كەزەكتى مالىمدەمەسىنە اقش-تىڭ ايماقتاعى ارەكەتتەرىنە نارازىلىعىن ءبىلدىردى جانە انكارانىڭ ۇسىنىسىن قولدايتىنىن جەتكىزگەن. «ۇشتىك سامميتتە» ءسۇريانىڭ تۇركيامەن شەكارالاس ايماعىندا قاۋىپسىز ايماقتار قۇرۋ، وعان بوسقىنداردى ورنالاستىرۋ تۋرالى ماسەلەلەر تالقىلانعان بولاتىن.

«ءبىز بىرلەسە جۇمىس ىستەۋ مۇمكىندىكتەرىن ۇسىنامىز. ەگەر بىرلەسۋشىلەر بولماسا، ءبىز ءوزىمىزدىڭ جولىمىزبەن جوبانى جۇزەگە اسىرامىز»، – دەگەن پرەزيدەنت ەردوعان بۇدان بۇرىنعى مالىمدەمەسىندە.

«ۇشتىك سامميت» بۇعان دەيىن بىرنەشە رەت وتكىزىلدى. رەسەي، تۇركيا جانە يران اراسىنداعى بۇل كەزدەسۋلەر باتىس ازياداعى (باتىسشا تاياۋ شىعىس) اقش پەن باتىس ەلدەرىنىڭ ىقپالىنا قارسى بىرلەسە ارەكەت ەتۋدى كورسەتىپ تۇر. ءسۇريا ماسەلەسىندە ءۇش تاراپ باستى رولگە شىققانى بەلگىلى.

تۇركيانىڭ كوزدەگەن ماقساتى كوپكە تۇسىنىكتى. انكارا ءسۇريا جەرىنە اسكەر كىرگىزىپ، وزىنە قارسى كۇرد كۇشتەرىن جانە بىرقاتار لاڭكەستىك ۇيىمداردى تالقانداپ، قاۋىپسىزدىگىن نىعايتۋعا تىرىسادى. سونىمەن بىرگە، اسكەري كۇشپەن تازارتقان ايماقتارعا ەلىندەگى بوسقىنداردى ورنالاستىرماق. بۇل ءبىر ەسەپتەن تۇركيانى بوسقىنداردان تازارتۋ بولسا، ەكىنشى قىرىندا سۇرياداعى كۇرد كۇشتەرىمەن ورتاداعى بۋففەرلىك زونا ءرولىن اتقارادى.

“The Qazaq Times”