ۆەنگريادان ەۋرووداققا ۇندەۋ: ءبىزدىڭ ەلىمىزدە تەك قانا ۆەنگرلەر شەشىم شىعارادى

ماجارستان (ۆەنگريا) بيلىگى كوپۇلتتى ساياساتقا قاتىستى مالىمدەمە جاساپ، قانداي جاعداي بولماسىن ەۋروپالىق وداق قۇرامىنان شىقپايتىنىن ايتتى. بۇل تۋرالى «eadaily.com» اگەنتتىگى ەلدىڭ پرەمەر-ءمينيسترى ۆيكتور ورباننىڭ مالىمدەمەسىنە سىلتەمە جاساپ حابارلادى.

سوڭعى جىلدارى ورىن العان ميگراتسيالىق قاقتىعىستارعا قاراماستان، بۋداپەشت بريۋسسەلمەن ديپلوماتيالىق بايلانىسىن ۇزبەيتىن بولدى. سونداي-اق ورباننىڭ بۇقارالىق اقپارات قۇرالدارىن، سوت جۇيەسىن جانە اكادەميالىق ينستيتۋتتاردى باقىلاۋدا ۇستايتىن باسقارۋ باعىتىن ەۋرووداق قۇپتامايتىندىعىن بىلدىرگەن. ۆەنگريا پرەمەرىنىڭ وسىنداي ۇستانىمىنان كەيىن مەملەكەت ۇلىبريتانيانىڭ ىزىنشە وداقتان كەتەدى دەگەن قاۋەسەت تە پايدا بولعان ەدى. ەلدىڭ پرەمەر-ءمينيسترى ۆيكتور وربان: «ءبىز ەۋروپالىق وداقتىڭ مۇشەسىمىز جانە ونىڭ قۇرامىندا قالامىز. ءوز ەلدەرىن كوپۇلتتى مەملەكەتكە اينالدىرعىسى كەلسە، ول وزدەرىنىڭ شەشىمدەرى. بىراق ءبىزدىڭ وتانىمىزدا تەك ۆەنگرلەر تۇرىپ، تەك وزدەرى عانا شەشىم قابىلداۋى كەرەك»، – دەيدى.

بىلتىر شىلدەدە ەۋروكوميسسيا ەۋروپا وداعىنىڭ سوتىنا ماجارستاننىڭ (ۆەنگريا) ۇستىنەن شاعىم تۇسىرگەن. ەۋروكوميسسيانىڭ بۇل شەشىمىنە ماجار ۇكىمەتىنىڭ انتيميگراتسيالىق زاڭدار جيناعىن قابىلداۋى سەبەپ بولعان. ەۋرووداق زاڭىنا قايشى كەلەتىنىن ەسكەرتكەنىنە قاراماستان، ماجارستان بوسقىنداردى قابىلداۋعا قاتىستى زاڭعا قول قويعان. سول سەبەپتى ەۋروكوميسسيا ماجارستانعا تۇگەلدەي بولماسا دا، ەو زاڭدارىنا سايكەس كەلمەيتىن تۇستارىن الىپ تاستاۋدى تالاپ ەتىپ، رەسمي تۇردە ەسكەرتۋ جولداعان. وسىعان بايلانىستى پىكىر بىلدىرگەن ەو-نىڭ بيۋدجەت ماسەلەلەرى جونىندەگى ەۋروكوميسسارى گيۋنتەر ەتتينگەر: «پولشا، رۋمىنيا، ۆەنگريا جانە يتاليا بيلىكتەرى ەۋروپا وداعىن السىرەتۋدى، ودان ءارى ونى مۇلدە تاراتۋدى وزدەرىنە ماقسات ەتكەن»، – دەدى.

"The Qazaq Times"