ۆەنگريا حالقى قىتاي ۋنيۆەرسيتەتىنىڭ سالىنۋىنا نارازى

ۆەنگريا حالقى ەلدە قىتاي ۋنيۆەرسيتەتىنىڭ كامپۋسىن اشۋعا نارازى. ولار بيلىكتىڭ قىتايمەن ەتەنە بايلانىسى بەيجىڭنىڭ ەۋروپاداعى ىقپالىن ارتتىرادى دەپ الاڭدايدى.

اتالعان جوبانى قارجىلاندىرۋ ءۇشىن ۆەنگريا ۇكىمەتى قىتايدان 1,5 ميلليارد دوللار قارىز الماق. سونداي-اق كامپۋس ستۋدەنتتەرگە قولجەتىمدى باسپانا سالىنادى دەپ جوسپارلانعان جەرگە سالىنادى. بۋداپەشتە وتكەن شەرۋدە نارازىلار وسى ماسەلەنى ايتىپ، قارسىلىق ءبىلدىردى.ال ەل پرەمەر-ءمينيسترى ۆيكتور وربان ۇكىمەتى شانحايلىق ۋنيۆەرسيتەتتىڭ اشىلۋى ۆەنگريالىق جانە حالىقارالىق ستۋدەنتتەرگە جوعارى ساپالى ءبىلىم الۋعا مۇمكىندىك بەرەدى دەپ سانايدى.

27 ساۋىردە ۆەنگريا فۋدان ۋنيۆەرسيتەتىمەن 2024 جىلعا قاراي بۋداپەشتە كامپۋس اشۋ تۋرالى ستراتەگيالىق كەلىسىمگە قول قويدى. ال مامىردىڭ باسىندا بەيجىڭ مەن بۋداپەشت ۆەنگرياداعى شانحاي فۋدان ۋنيۆەرسيتەتىنىڭ فيليالىن قۇرۋعا كەلىستى. 8 مىڭ قىتايلىق ستۋدەنتتەرگە ارنالعان بۋداپەشت كامپۋسىنىڭ قۇنى – 1,5 ميلليارد ەۋرو. ەليتالىق ۋنيۆەرسيتەت قحر كوممۋنيستىك پارتياسى مەن قىتايدىڭ ارنايى قىزمەتتەرى ءۇشىن كادرلار ۇستاحاناسى سانالادى.

ۆەنگريا سوڭعى بىرنەشە جىل ىشىندە قىتايمەن قارقىندى ستراتەگيالىق سەرىكتەستىك ورناتتى. ناتيجەسىندە، بۋداپەشت قحر ءۇشىن ەۋروپالىق وداقتاعى ماڭىزدى «قاقپاعا» اينالدى. مىسالى، ەۋرووداق گونكونگتاعى سايلاۋ زاڭناماسىنا بايلانىستى قىتايعا قارسى شارا قولدانباق ەدى، بۋداپەشت قاراردىڭ قابىلدانۋىنا ەكى رەت كەدەرگى كەلتىردى. ءساۋىردىڭ ورتاسىندا ۆەنگريا گونكونگتىڭ مارتەبەسى تۋرالى ەۋروپالىق رەزوليۋتسيانى دا كەرى قايتاردى.

ۆيكتور وربان ءوزىنىڭ قىتايعا قاتىستى ساياسي باعىتىن كوممۋنيستىك ەلگە دەگەن «ماحابباتى» ەمەس، پراگماتيزممەن بايلانىستىرادى. نەگىزىنەن وربان رەسەي، ورتالىق ازيا جانە قىتايمەن تىعىز قارىم-قاتىناس ورناتۋدى 2010 جىلدان باستاعان. ياعني قىتايدىڭ ۆەنگرياعا دەگەن ىقپالى 2010 جىلى وربان بيلىككە ورالعاننان كەيىن كۇشەيدى. قىزمەتكە كەلە سالا ول «شىعىسقا اشىلۋ» ساياساتىن باستاپ، ينۆەستيتسيا تارتۋ ءۇشىن بەيجىڭ مەن ماسكەۋگە قايرىلا باستادى. ۇكىمەت عالامدىق قارجى داعدارىسىنان وسىلاي شىقپاق بولدى. ال بۋداپەشتە قىتاي ۋنيۆەرسيتەتىن سالۋ كەلىسىمى قىتايمەن جاقىنداسۋدىڭ بىردەن-ءبىر كورىنىسى بولىپ وتىر.

"The Qazaq Times"