جاپونيادا پارلامەنت سايلاۋى: ابە پارتياسى باسىمدىققا يە

جاپونيادا پارلامەنتتىك سايلاۋ مارەسىنە جەتىپ، جەرگىلىكتى حالىق زاڭ شىعارۋشى ورگاننىڭ جوعارى پالاتا دەپۋتاتتارىن سايلادى.

Kyodo اگەنتتىگى جۇرگىزگەن ساۋالناماعا سۇيەنسەك، ابە باسشىلىق ەتەتىن ليبەرالدى دەموكرا­تيالىق (لدپ) پارتيانىڭ مەرەيى ۇستەم بولۋى ءتيىس. ەلدەگى Asahi مەن Nikkei گازەت­تەرى دە وسىنداي پىكىردى ۇستانادى. اتا­ل­عان باسىلىمدار جۇرگىزگەن ساۋالنامادا دا حا­لىقتىڭ باسىم بولىگى لدپ-نى قول­دايتىنىن جەتكىزگەن. بۇگىن جاريالانعان سايلاۋ ناتيجەسىنە سايكەس، ليبەرالدى-دەموكراتيالىق پارتيا مەن كومەيتو پارتياسىنىڭ كواليتسياسى جالپى العاندا 141, ال وپپوزيتسيا مەن باسقا پارتيالار كەڭەسشىلەر پالاتاسىندا 104 ورىنعا يە بولدى. وسىلايشا، وپپوزيتسيا پارلامەنتتىك جوعارى پالاتاسىندا باسىمدىققا قول جەتكىزىپ وتىر.

قازىرگى بيلىك باسىنداعى پارتيانىڭ كوپشىلىك داۋىستى يەلەنۋى پرەمەر-مينيستر ابەگە ەل كونستيتۋتسياسىنا وزگەرىس ەنگىزۋگە جول اشادى. ول جاپونيانىڭ 1947 جىلى قابىلداعان اسكەر قۇرۋ جانە اسكەري قيمىلداردى جۇرگىزۋدەن باس تارتۋ تۋرالى 9-باپتى وزگەرتىپ، ەلدىڭ قارۋلى كۇشتەرىن قولدانۋ اياسىن كەڭەيتۋدى كوزدەپ وتىر. سايلاۋ قورىتىندىسى ءمالىم بولعاننان كەيىن سيندزو ابە سوزىندە: «ءبىز جاپون حالقىنان ساياسي تۇراقتىلىققا نەگىزدەلگەن شارالاردى تاباندى تۇردە ىلگەرىلەتۋ ماقساتىندا ماندات الدىق دەپ ويلايمىن. وسى ءۇمىتتى اقتاعىمىز كەلەدى»، – دەپ مالىمدەدى. ءبىر ايتا كەتەرلىگى، جاپونياعا كورشىلەس ەلدەر، ەڭ الدىمەن كحدر مەن وڭتۇستىك كورەيا توكيو ەكىنشى دۇنيەجۇزىلىك سوعىستا كورەي حالقى زارداپ شەككەن جاپون ءميليتاريزمىنىڭ قايتا جاندانۋىنا قول جەتكىزبەك دەپ قاۋىپتەنگەن بولاتىن.

جاپونيادا پارلامەنتتىڭ جوعارعى پالاتاسىنا دەپۋتاتتار 6 جىلعا سايلانادى. ال ولاردىڭ جارتىسى ءۇش جىلدان كەيىن قايتا سايلاۋدان وتەدى. بيىلعى جىلدىڭ تاعى ءبىر ەرەكشەلىگى، جاپونيا 70 جىلدان كەيىن داۋىس بەرۋ جاسىن 20 جاستان 18 جاسقا وزگەرتتى. ەندى ەلدىڭ 18-گە تولعان كەز كەلگەن ازاماتى ءوز تاڭداۋىن جاساي الادى.

پارلامەنتتىڭ نەگىزگى كومپەتەنتسياسىنا جانە قىزمەتىنە كەلەسىلەر كىرەدى: زاڭداردى جانە زاڭ جوبالارىن قاراستىرۋ، قابىلداۋ; قارجىلىق وكىلەتتىلىگى – جىل سايىن بيۋدجەتتى بەكىتۋ; اتقارۋشى ورگانگا باقىلاۋ جاساۋ، پرەمەر-ءمينيستردى تاعايىنداۋ، ۇكىمەتكە سەنىم ءبىلدىرۋ سۇراقتارىن قاراستىرۋ، مەملەكەتتىك باسقارۋ سۇراقتارى بويىنشا مينيسترلەر كابينەتىنە جانە ارنايى كوميسسيالار قۇرۋ; سوت قىزمەتتەرىنىڭ ءوز قىزمەتتەرىن دۇرىس پايدالانباعانى ءۇشىن قوزعالعان ىستەرىن قاراۋعا ارنالعان سوتتى قۇرۋ، سوت ورگاندارىنىڭ قىزمەتىن باقىلاۋ; ىشكى جانە سىرتقى ساياساتتى قاراۋ، حالىقارالىق كەلىسىم-شارتتاردى قاراۋ.

جاپونيا پارلامەنتى ءوز قىزمەتىن جۇزەگە اسىرعاندا تاۋەلسىز بولىپ تابىلادى. ۋنيتارلى مەملەكەتتە ەكى پالاتالى پارلامەنتتىڭ بولۋىن جاپوندىق عالىمداردىڭ تۇسىندىرۋىنە قاراعاندا، وكىلدەر پالاتاسى – بۇل پارتيالىق ساياساتتان كەيىن «ساپالى باستاما»، ال كەڭەسشىلەر پالاتاسى – بۇل قىزىعۋشىلىقتاردىڭ بالانسىن ساقتاۋعا بايلانىستى قاراما-قايشىلىقتى جويۋ ءۇشىن «اقىلعا سىيىمدى باستاما» دەلىنگەن.

"The Qazaq Times"