ءۇندى-تىنىق مۇحيت ايماعىندا قاقتىعىس قاۋپى جاقىنداپ كەلەدى

ءۇندى-تىنىق مۇحيت ايماعىندا قاقتىعىس قاتەرى بارعان سايىن ارتىپ كەلەدى. 21 قاراشادا باستالعان فيليپپين تەڭىزىندەگى اقش، جاپونيا، اۆستراليا، كانادا جانە گەرمانيا قاتارلى بەس ەل بىرلەسكەن ANNUALEX–2021  اتتى تەڭىز اسكەري جاتتىعۋى كەشە، 30 قاراشا اياقتادى.  

باتىس ساراپشىلارىنىڭ پىكىرىنشە، قىتايدىڭ ارتا تۇسكەن قاۋىپ-قاتەرى وسى ايماقتاعى اسكەري جاتتىعۋلاردىڭ سيپاتىن، كولەمىن وزگەرتتى. ءتىپتى، الداعى ۋاقىتتا وڭتۇستىك قىتاي تەڭىزى اسكەري جاتتىعۋ ەڭ كوپ وتەتىن ايماققا اينالۋى مۇمكىن. بۇعان ىلەسە وسى تەڭىزدىڭ «قاۋىپسىزدىك تەمپەراتۋراسى» دا كوتەرىلە بەرمەك.

قىتايدىڭ جاڭا دەرجاۆا رەتىندە بوي كوتەرۋىمەن، اقش پەن ونىڭ ءۇندى-تىنىق مۇحيتى ايماعىنداعى وداقتاستارى جانە سەرىكتەرى اراسىنداعى اسكەري-قورعانىس ىنتىماقتاستىعى تەرەڭدەدى. قازىرگى وسى اتالعان گەوساياسي ايماقتا وتەتىن اسكەري جاتتىعۋلاردىڭ تەبىنى بۇرىنعىعا مۇلدە ۇقسامايدى. ايتالىق، كەشە عانا اياقتاعان ANNUALEX–2021  وقۋ-جاتتىعۋدا بايلانىس تاكتيكالىق جاتتىعۋلارى، سۇڭگۋىر قايىقتارعا قارسى سوعىس، اۋەدەگى ۇرىس جاتتىعۋلارى، تەڭىزدەگى تولىقتىرۋلار، پالۋبادان ۇشۋ جاتتىعۋلارى جانە تەڭىزدەگى پوزيتسيانى قورعاۋ جاتتىعۋلارى اسا جوعارى دەڭگەيدە ۇيىمداستىرىلعان.

ANNUALEX جاتتىعۋلارى، شىن مانىسىندە، سوناۋ 1990 جىلداردان بەرى جىل سايىن وتكىزىلىپ كەلەدى. الايدا، سوڭعى جىلدارداعى جاتتىعۋدىڭ سيپاتى وزگەردى. بۇرىنعىداي قورعانىس ىنتىماقتاستىعىن تەرەڭدەتۋ، قورعانىس تاجىريبەلەرىمەن الماسۋ عانا ەمەس، قازىرگى جاتتىعۋلار كوبىنە ناقتى ۇرىس كەزىندەگى اسكەري وپەراتسيالارعا ارنالىپ جاتىر. وعان قوسا جاتتىعۋدىڭ قارجىلىق شىعىندارى دا ەكى ەسەگە كوبەيتىلدى.

بۇنداي قارقىندى اسكەري قيمىلدار سول ايماقتاعى ەلدەر ءۇشىن قاۋىپسىزدىك كۇشتەرىنىڭ، اسىرەسە تەڭىز جانە اۋە كۇشتەرىن جەدەل ارتتىرۋ سەزىمىن ارتتىردى. قىتايعا تەڭىز ارقىلى شەكتەسەتىن نەمەسە گەوگرافيالىق جاقتان جاقىن ورنالاسقان ەلدەر تەڭىز كۇشتەرىن، زىمىران قۋاتىن، اۋە كۇشتەرىن جارىسا دامىتىپ جاتىر. ءتىپتى، ايماق ەلدەرىنىڭ قورعانىس بيۋدجەتى مەن زىمىران، اسكەري ۇشاق، اسكەري كەمەنى دامىتۋ پروتسەستەرىن زەرتتەۋشىلەر كوپ ۇزاماي قىتايعا جاقىن شاعىن ەلدەردە قارۋ-جاراق جارىسى بولادى دەپ تە بولجايدى.

قازىر اتالعان تەڭىز ايدىندارىندا جاتتىعۋ وتكىزەتىن ەلدەر تەك قانا سول ايماق ەلدەرىمەن عانا شەكتەلىپ وتىرعان جوق. ەۋروپانىڭ ناتو-عا مۇشە، كوشباسشىسى ەلدەرى گەرمانيا، فرانتسيا، بريتانيا سەكىلدى تەڭىز قوجالارى دا ايماقتا اسكەري كەمەلەرىمەن بوي كورسەتۋدە.

The Qazaq Times