سولتۇستىك كورەياداعى ءولىم جازاسى: وڭتۇستىك كورەيانىڭ تەلەارناسىن كورگەنى ءۇشىن اتىلعاندار

وڭتۇستىك كورەياداعى ۇكىمەتتىك ەمەس ۇيىمدار سولتۇستىك كورەيادا تارتىپكە قايشى كەلگەنى ءۇشىن ءولىم جازاسىنا كەسىلگەن 318 ادامدى انىقتاعان. "شەكاراسىز سۋديالار توبى" دەپ اتالاتىن قۇقىق قورعاۋ ۇيىمى سولتۇستىك كورەيادان قاشىپ شىققان 610 اداممەن سۇحبات وتكىزگەن. اتالعان ۇيىمنىڭ مالىمەتىنە قاراعاندا، سولتۇستىك كورەيادا ازاماتتار مال ۇرلىعىنان تارتىپ، وڭتۇستىك كورەيانىڭ تەلەارنالارىن كورگەنى ءۇشىن دە ءولىم جازاسىنا كەسىلەدى. ءارى، مۇنداي ءولىم جازالارى وزەن جاعالارىندا، ەگىس اتىزدارىندا، بازار، مەكتەپ، ستاديون سەكىلدى كوپشىلىك ورتالاردا دا اتقارىلاتىنىن ايتادى. 

اتالعان، وڭتۇستىك كورەيالىق ۇيىمنىڭ كحدر تەرريتورياسىنان قاشىپ وتكەن ادامدارمەن سۇحباتتاسۋ ارقىلى بىرقاتار مالىمەتتەرگە قول جەتكىزگەن مالىمەتتەردە انىقتاۋىنشا، سولتۇستىك كورەيادا  ءولىم جازاسى اتقارىلاتىن جەرگە مىڭنان استام ادامدى جينالادى، بۇعان قوسا، ءولىم جازاسى اتقارىلعان كەزدە جازاعا تارتىلۋشىنىڭ جاقىندارى كۋا بولۋى ءتيىس. اتۋ جازاسىنا كەسىلگەندەردىڭ مۇردەسى وتە سيرەك جاعدايدا عانا وتباسى مۇشەلەرىنە قايتارىلادى. ال، كوبىندە مۇردەسىنىڭ قايدا جاسىرىلعانى بەيمالىم كۇيدە قالا بەرەدى. كحدر تەرريتورياسىنان قاشىپ شىققاندار كەيدە مۇنداي ءولىم جازاسىن اتقارۋعا 7-8 جاستاعى بالالاردىڭ دا كۋا بولاتىنىن ايتقان. كەي جاعدايلاردا ءولىم جازاسى اباقتى مەن ەڭبەك لاگەرلەرىندە دە اتقارىلادى.

سولتۇستىك كورەيادا ءولىم جازاسىنا كەسىلگەندەردىڭ باسىم كوبى اتىپ تاستالادى. 2005 جىلعا دەيىن دارعا اسۋ جازاسى دا بولعان. جازانى ءۇش اسكەر ورىندايدى جانە كەز-كەلگەن اسكەر تاڭدالۋى مۇمكىن.  دەگەنمەن، سوڭعى جىلدارى كوپشىلىك الدىندا ءولىم جازاسىن اتقارۋ ارەكەتتەرى ازايىپ كەتكەن. سولتۇستىك كورەيا ۇكىمەتى بۇنداي ارەكەتتەردى جاسىرىن اتقارىپ جاتقان بولۋى مۇمكىن دەيدى بۇرىنعى سولتۇستىك كورەيالىقتار.

جاقىندا عانا سولتۇستىك كورەيا جوعارى كەڭەسىنىڭ اقش-پەن قارىم-قاتىناس جونىندەگى ارنايى وكىلى جانە سىرتقى ىستەر مينيسترلىگىنىڭ بىرنەشە قىزمەتكەرىنىڭ اتۋ جازاسىنا كەسىلگەنىن سول ەلدەگى رەسمي باق حابارلاعان. ولارعا اقش مۇددەسىنە قىزمەت ەتىپ، تىڭشىلىقپەن اينالىستى دەگەن ايىپتار تاعىلعان.

“The Qazaq Times”