ايشا ابدۋللينا

1 ناۋرىز – العىس  ايتۋ  كۇنى، 8 ناۋرىز –  حالىقارالىق  ايەلدەر  كۇنى قارساڭىندا قازاقستان تەاترلارى اسسوتسياتسياسىنىڭ  ۇيىمداستىرۋىمەن  5 ناۋرىزدا  قازاقستاننىڭ  حالىق  ءارتىسى، «قۇرمەت» بەلگىسى، «پاراسات» وردەندەرىنىڭ  يەگەرى، 100  جاستاعى   ايشا  ابدۋللينانىڭ  ءومىرى  مەن شىعارماشىلىعىنا   ارنالعان  «عاسىر  كۋاگەرى ايشا انامىزعا  مىڭ العىس!»  اتتى  مەرەيتويلىق  كەش وتەدى. 

تەاتر  ونەرىنىڭ   دامۋى  مەن  بولاشاعىن  وركەندەتۋ، تەاتر قايراتكەرلەرىنە  قولداۋ  تانىتۋ  نەگىزىندە   2016 جىلى  قۇرىلعان قازاقستان تەاترلارى اسسوتسياتسياسى (قتا) جالپى تەاترلارعا ورتاق   انىقتالعان  نەگىزگى  باعىتتاردى  جۇزەگە اسىرۋ ماقساتىن ۇستانادى. قازاقستان  تەاترلارى  اسسوتسياتسياسىنىڭ  العاشقى  جوبالارىنىڭ  ءبىرى – 1 ناۋرىز – العىس ايتۋ كۇنى مەن 8 ناۋرىز – حالىقارالىق  ايەلدەر مەيرامى قارساڭىندا  كورنەكتى  ساحناگەر، قازاقستاننىڭ حالىق  ءارتىسى، «پاراسات» «قۇرمەت» وردەنىنىڭ يەگەرى، 100 جاستاعى ايشا ابدۋللينانىڭ ءومىرى مەن شىعارماشىلىعىنا  ارنالعان  مەرەيتويلىق  كەش ۇيىمداستىرۋ  بولىپ  وتىر.

 ا.ابدۋللينا ونەر جولىن  1933 جىلى م.اۋەزوۆ اتىنداعى قازاق دراما  تەاترىندا  باستاعان. 1947 جىلدان  باستاپ  الپىس بەس جىلعا جۋىق ءومىرىن ج.شانين اتىنداعى  وڭتۇستىك  قازاقستان  دراما  تەاترىنىڭ ساحناسىندا  وتكەردى. «قىز جىبەكتە» قىز جىبەك، «قوزى كورپەش- بايان سۇلۋدا»  بايان، «قوبىلاندىدا»  قۇرتقا،  «ەر تارعىندا» اقجۇنىس،   «اساۋعا-تۇساۋدا» كاتارينا، «وتەللودا» دەزدەمونا، «رومەو-دجۋلەتتادا» لەدي كاپۋلەتتي، «ەكى مىرزاعا ءبىر قىزمەتشىدە» بەاتريچە ت.ب. كوركەم رولدەرىمەن كورەرمەن كوزايىمىنا اينالدى. 200-دەن اسا سۇبەلى بەينە جاساعان اكتريسا  14 رەت كەڭەس وداعى مەدالدارىمەن ماراپاتتالدى،  1958 جىلى قازاق كسر حالىق ءارتىسى قۇرمەتتى اتاعىن الدى.

ا.ابدۋلينا، تەاتر ونەرىمەن قاتار  قوعامدىق جۇمىستارعا دا بەلسەنە اتسالىستى.  وڭتۇستىك قازاقستان وبلىستىق كەڭەسىنە جانە ەكى مارتە  شىمكەنت قالالىق كەڭەسىنە دەپۋتاتتىققا سايلانىپ، ەكى مارتە ەلباسىمىز  ن.ءا.نازارباەۆتىڭ «العىس  حاتىمەن» ماراپاتتالىپ، 1996  جىلى  پرەزيدەنت  ستيپەندياسىنىڭ  يەگەرى اتاندى.

تەاتر ونەرىنە ولشەۋسىز  ەڭبەگى سىڭگەن، ەل مادەنيەتى ءۇشىن  ادال قىزمەت ەتكەن 100 جاستاعى  ايشا انامىزدىڭ ونەگەلى ونەرى مەن پاراساتتى ءومىر جولى وسكەلەڭ   ۇرپاققا  ۇلگى-ونەگە  ەكەنى اقيقات.

ۇلت ماقتانىشىنىڭ ۇلاعاتتى ءومىرىن ناسيحاتتاۋ  «ايشا ابدۋللينا 100 جاستا»  اتتى  مەرەيتويلىق  كەشتى ۇيىمداستىرۋ  قازاقستان  تەاترلارى  اسسوتسياتسياسىنىڭ  قۇرىلتاي سەزىندە  بەكىتىلگەن  جارعى  نەگىزىندەگى  باستى مىندەتتەردىڭ  ءبىرى.

مەرەيتوي، 5 ناۋرىز كۇنى م.اۋەزوۆ  اتىنداعى  قازاق مەملەكەتتىك  اكادەميالىق  دراما  تەاترىنىڭ ۇلكەن زالىندا وتەدى. باستالۋى: 18.30-دا.

“The Qazaq Times”