1 наурыз – Алғыс  айту  күні, 8 наурыз –  Халықаралық  әйелдер  күні қарсаңында Қазақстан Театрлары ассоциациясының  ұйымдастыруымен  5 наурызда  Қазақстанның  халық  әртісі, «Құрмет» белгісі, «Парасат» ордендерінің  иегері, 100  жастағы   Айша  Абдуллинаның  өмірі  мен шығармашылығына   арналған  «Ғасыр  куәгері Айша анамызға  мың алғыс!»  атты  мерейтойлық  кеш өтеді. 

Театр  өнерінің   дамуы  мен  болашағын  өркендету, театр қайраткерлеріне  қолдау  таныту  негізінде   2016 жылы  құрылған Қазақстан театрлары ассоциациясы (ҚТА) жалпы театрларға ортақ   анықталған  негізгі  бағыттарды  жүзеге асыру мақсатын ұстанады. Қазақстан  театрлары  ассоциациясының  алғашқы  жобаларының  бірі – 1 наурыз – Алғыс айту күні мен 8 наурыз – Халықаралық  әйелдер мейрамы қарсаңында  көрнекті  сахнагер, Қазақстанның халық  артісі, «Парасат» «Құрмет» орденінің иегері, 100 жастағы Айша Абдуллинаның өмірі мен шығармашылығына  арналған  мерейтойлық  кеш ұйымдастыру  болып  отыр.

 А.Абдуллина өнер жолын  1933 жылы М.Әуезов атындағы қазақ драма  театрында  бастаған. 1947 жылдан  бастап  алпыс бес жылға жуық өмірін Ж.Шанин атындағы  Оңтүстік  Қазақстан  драма  театрының сахнасында  өткерді. «Қыз Жібекте» Қыз Жібек, «Қозы Көрпеш- Баян сұлуда»  Баян, «Қобыландыда»  Құртқа,  «Ер Тарғында» Ақжүніс,   «Асауға-тұсауда» Катарина, «Отеллода» Дездемона, «Ромео-Джульеттада» леди Капулетти, «Екі мырзаға бір қызметшіде» Беатриче т.б. көркем рольдерімен көрермен көзайымына айналды. 200-ден аса сүбелі бейне жасаған актриса  14 рет Кеңес Одағы медальдарымен марапатталды,  1958 жылы Қазақ КСР халық артісі құрметті атағын алды.

А.Абдулина, театр өнерімен қатар  қоғамдық жұмыстарға да белсене атсалысты.  Оңтүстік Қазақстан облыстық кеңесіне және екі мәрте  Шымкент қалалық кеңесіне депутаттыққа сайланып, екі мәрте Елбасымыз  Н.Ә.Назарбаевтың «Алғыс  хатымен» марапатталып, 1996  жылы  Президент  стипендиясының  иегері атанды.

Театр өнеріне өлшеусіз  еңбегі сіңген, ел мәдениеті үшін  адал қызмет еткен 100 жастағы  Айша анамыздың өнегелі өнері мен парасатты өмір жолы өскелең   ұрпаққа  үлгі-өнеге  екені ақиқат.

Ұлт мақтанышының ұлағатты өмірін насихаттау  «Айша Абдуллина 100 жаста»  атты  мерейтойлық  кешті ұйымдастыру  Қазақстан  Театрлары  ассоциациясының  Құрылтай съезінде  бекітілген  Жарғы  негізіндегі  басты міндеттердің  бірі.

Мерейтой, 5 наурыз күні М.Әуезов  атындағы  Қазақ Мемлекеттік  академиялық  драма  театрының Үлкен залында өтеді. Басталуы: 18.30-да.

“The Qazaq Times”