Associated Press (AP) اگەنتتىگىنىڭ ءفوتوجۋرناليسى بۋرحان وزبيليجي رەسەيدىڭ تۇركياداعى ەلشىسى اندرەي كارلوۆتىڭ انكاراداعى ءولىمى كورسەتىلگەن سۋرەتى ءۇشىن World Press Photo سىيلىعىنا يە بولدى. بۇل تۋرالى RFI اگەنتتىگى حابارلايدى.

سۋرەتتەگى رەسەيلىك ەلشىنى مەرت قىلعان، تۇرىك پوليتسيا قىزمەتكەرى – مەۆليۋت التىنشاشتىڭ ءبىر قولىندا مىلتىق جانە ءبىر قولىن اندرەي كارلوۆتىڭ ءولى دەنەسىنىڭ جانىندا كوتەرىپ تۇر.  بەدەلدى فوتوبايقاۋداعى  قازىلار القاسى تۇرىك فوتوگرافىنىڭ  باتىلدىعىن اتاپ ءوتتى.

«الەمدىك باق قۇرالدارىنا جەتكەن، تۇركيا تاريحىنداعى ماڭىزدى ءساتتى سۋرەتكە ءتۇسىرىپ الدىم. قارا باسىمدى ويلاپ قاشپاي، جۋرناليست رەتىندە مەن ءوز جۇمىسىمدى ورىنداۋىم كەرەك بولدى»، – دەيدى بۋرحان وزبيليجي  AFP باسىلىمىنا بەرگەن سۇحباتىندا.

World Press Photo كونكۋرسىنىڭ جەڭىمپازى
Burhan Ozbilici-ءدىڭ سۋرەتى، The Associated Press/Handout via REUTERS

رەسەيدىڭ تۇركياداعى ەلشىسى اندرەي كارلوۆ 19 جەلتوقسان كۇنى  انكاراداعى فوتوكورمەدە  ولتىرىلگەن. وعان بىرنەشە رەت وق اتقان 22 جاستاعى تۇرىك پوليتسيا قىزمەتكەرى مەۆليۋت التىنشاش اتالمىش كورمەگە كۇزەتشى كيىمىمەن كەلگەن. ول وق اتپاس بۇرىن اللەپونىڭ كەگىن قايتاراتىندىعىن ايتىپ، بىرنەشە مارتە  ايقايلاپ جىبەرگەن.

ايتا كەتەيىك، World Press Photo سايىسىندا 125 ەلدەن 5000-عا جۋىق فوتوگراف قاتىسقان. «ۋكراينانىڭ قارالى كۇندەرى» سەرياسىنىڭ اۆتورى ۆالەريا مەلنيكوۆا «ۇزاق مەرزىمدى جوبالار» كاتەگورياسىندا جەڭىمپاز اتاندى. سونىمەن قاتار، قازىلار القاسى رەسەيلىك فوتوگراف سەرگەي پونومورەۆتىڭ يراكتان جاساعان فوتورەپورتاجدارىن دا جوعارى باعالاعان.

«The Qazaq Times»