قر وسك مۇشەلەرىنىڭ وتىرىسى. فوتو: election.gov.kz

QT ەلدىڭ ساياسي ومىرىندەگى اسا ماڭىزدى ساياسي ناۋقان – سايلاۋ تۇسىندا ورتالىق سايلاۋ كوميسسياسىنا بريفينگ جيىندارىن ونلاين وتكىزۋگە جاعداي جاساۋدى سۇراپ حات جولداعان. بىراق «جاڭا قازاقستاندى» قۇرۋعا جاۋاپتى سايلاۋ ينستيتۋتى جابىق ساياساتتان باس تارتار ەمەس. سەبەبىن بايانداپ كورەيىك.

ءوتىنىش حاتتا وسك توراعاسى نۇرلان ابدىروۆكە استانادان وزگە وڭىرلەردەگى باق وكىلدەرىنە وسك الاڭىندا وتەتىن بارلىق بريفينگ، ءباسپاسوز جيىندارى مەن وتىرىستارعا ونلاي̆ن، ياعني سۇراق-جاۋاپ سەسسياسىنا ZOOM نەمەسە سول سياقتى بالاما رەسۋرستار ارقىلى قاتىسۋعا جاعداي جاساۋ تۋرالى سۇرالدى. قازىر تىلشىلەر بريفينگتە ورتسايلاكوم مۇشەلەرىنە سۇراق قويىپ، جاۋاپ الۋ ءۇشىن استانانىڭ سارىارقا اۋدانى بەيبىتشىلىك كوشەسى 4-ۇيدە ورنالاسقان عيماراتىنا بارۋعا ءماجبۇر. رەسپۋبليكانىڭ وزگە ايماقتارىنداعى جۋرناليستەر قاتىسا المايدى.

وتىرىستاردان ونلاي̆ن ترانسلياتسيالاۋ ازدىق ەتەدى، جۋرناليستەردىڭ بۇل جيىندارعا ونلاي̆ن قاتىسۋداعى باستى ماقساتى – سپيكەرلەرىنە سۇراق قوي̆ىپ، جاۋاپ الۋىندا. شىن مانىندە، بۇعان وسك تاجىريبەسى جەتەدى. مىسالى، 2021 جىلعى 10 قاڭتاردا وتكەن ءماجىلىس جانە ءماسليحاتتار ساي̆لاۋىندا وسك الدىن الا ونلاين اككرەديتتەلگەن جۋرناليستەردىڭ ەش كەدەرگىسىز ZOOM پلاتفورماسىمەن سۇراق قويۋىن جۇزەگە اسىرىپ ەدى. سوندىقتان رەداكتسيا ءوتىنىشى نەگىزدى، ۋاقىت تالابىنا ساي جاسالدى.

وسك اپپارات باسشىسى ءاليا عالىموۆا قايراتقىزى جولداعان جاۋاپ حاتتا «وسك-نىڭ بارلىق وتىرىسى ونلاين-ترانسلياتسيا رەجيمىندە وتەدى» دەگەننەن اسپاعان. كوميسسيانىڭ ءباسپاسوز جيىنىن ۇيىمداستىرۋ ءتارتىبى عانا باياندالادى. ايماق جۋرناليستەرىنە ونلاين سۇراق قويۋ مۇمكىندىگى تۋرالى باستى سۇراق جاۋاپسىز قالعان.

«ورتالىق سايلاۋ كوميسسياسى ءوز جۇمىسىندا بارلىق مۇددەلى ازاماتتاردىڭ اقپاراتقا قول جەتكىزۋىن قامتاماسىز ەتە وتىرىپ، اشىقتىق پەن جاريالىلىق قاعيداتتارىن ۇستانادى. پىكىرىڭىزدى جولداعانىڭىز ءۇشىن العىسىمىزدى ايتىپ، ىنتىماقتاستىققا دايىن ەكەنىمىزدى بىلدىرەمىز» دەسە دە، نەگىزگى ماسەلەنى شەشۋگە مۇددەلى ەمەس.

ولاي دەۋگە سەبەپ – سۇراۋ حاتقا جاۋاپ ازىرلەگەن وسك تالداۋ جانە كوممۋنيكاتسيا ءبولىمى مەڭگەرۋشىسىنىڭ ورىنباسارى ءاشىم بەردىبەكوۆتىڭ ايتقان ءسوزى. رەسمي جاۋاپتا باستى ماسەلەنىڭ باسى اشىق قالعاندىقتان ءتىلشى حابارلاسىپ ناقتىلاۋعا تىرىستى. جاۋاپ حات ورىنداۋشىسى بەردىبەكوۆ «ونلاين سۇراق قويۋ مۇمكىندىگىن قاراستىرۋ جوسپاردا جوق» دەپ شورت كەستى.

كوروناۆيرۋس پاندەمياسى كەزىندە قالىپتاسقان تاجىريبە نەگىزىندە رەسپۋبليكاداعى بارلىق 20 اي̆ماقتاعى اكىمدىكتەردىڭ وڭىرلىك كوممۋنيكاتسيالار قىزمەتى جانە استاناداعى ورتالىق كوممۋنيكاتسيالار قىزمەتى بريفينگ، ءباسپاسوز جيىندارىن وفلاي̆ن-ونلاي̆ن ارالاس فورماتتا وتكىزۋدى داستۇرگە اي̆نالدىردى. بۇل قازاقستان اۋماعىندا جۇمىس ىستەي̆تىن باق وكىلدەرىنىڭ قىزمەتتىك قۇقىعىن تەڭەستىرۋدە ۇلكەن، اسا قاجەتتى قادام بولدى.

بىراق بىرنەشە جىلدا تەك ءبىر رەت قاۋىرت جۇمىس ىستەي̆تىن ورتالىق ساي̆لاۋ كوميسسياسى پاندەميانىڭ كارانتين كەزەڭى اياقتالعان سوڭ بۇل فورماتتى ادەيىلەپ جوي̆دى. مەديا ساراپشىلار مۇنى جۋرناليستەردىڭ اقپارات الۋ-تاراتۋىنا جاسالعان كەدەرگى دەپ ەسەپتەيدى. نەگە وزگە (جوعارىدا اتالعان) مەملەكەتتىك مەكەمەلەردە ءباسپاسوز جيىندارى مەن بريفينگتەر، ءتىپتى سوت پروتسەستەرى ونلاي̆ن ءوتىپ جاتقان شاقتا وسك بۇعىپ، تۇيىق فورماتقا اۋىستى. ءبىر جارقىن مىسال، الماتى قالاسىنىڭ وكق بىرنەشە جىلدان بەرى الماتىلىق جۋرناليستەردىڭ وزىنە ونلاين ساۋال قويۋعا جاعداي جاساپ كەلەدى. الايدا مەملەكەتتىك اسا ماڭىزدى شارانى جۇزەگە اسىراتىن وسك مەديا كوممۋنيكاتسيانىڭ ءموبيلدى جۇمىس ىستەۋدە بويكۇيەزدىك تانىتادى.

بيىل 19 ناۋرىزدا قازاقستان رەسپۋبليكاسى پارلامەنتى ءماجىلىسى جانە ءماسليحاتتار دەپۋتاتتارىنىڭ كەزەكتەن تىس سايلاۋى وتەدى. ونى ۇيىمداستىرۋعا تىكەلەي وسك جاۋاپتى، بىراق ورتالىق اپپاراتتىڭ جۋرناليستەرگە قاتىستى ۇستانىمى بۇل مىندەتتىڭ ءوز دەڭگەيىندە اتقارىلىپ جاتقانىنا كۇمان تۋعىزادى.

The Qazaq Times