ترامپ-كيم كەزدەسۋى. فوتو: WBUR.

اقش مەملەكەتتىك حاتشىسى پومپەو پيوڭياڭعا (پحەنيان) جوسپارلاعان ساپارىن كەنەتتەن كۇشىنەن قالدىردى. وسىعان بايلانىستى جەكسەنبى كۇنى كحدر ۇكىمەتى ءوزىنىڭ رەسمي باق-ى ارقىلى اقش-سولتۇستىك كورەيا سامميتىنەن بەرگى ەڭ قاتاڭ ايىپتاۋىن جاسادى. بۇدان ءبىر اپتا بۇرىن عانا سولتۇستىك كورەيانىڭ رەسمي باسىلىمدارى اقش تۋرالى جۇمساق پوزيتسيادا بولعان ەدى.

كحدر-نىڭ رەسمي باسىلىمىندا جاريالانعان ماقالادا: «جاقىندا جاپونياداعى اقش ارنايى كۇشتەرى فيليپپينگە اسكەري-كولىكتىك اۋە كەمەلەرىنە ارنالعان ۇزىن اۋقىمدى ينفيلتراتسيالىق ترەنينگ وتكىزدى»، – دەپ مالىمدەيدى. بۇل ارەكەتتى «اقش-تىڭ دۇرىس ەمەس جانە قاراقشىلىقپەن جاساعان «العاشقى يادرولىق قارۋسىزداندىرۋ» سيۋجەتىنىڭ ورىندالماي قالعانىنا قارسى قحدر-عا سوعىس جوسپارىن جاساپ جاتقانى» دەپ كورسەتكەن. ءارى، «بۇل ديالوگتاردىڭ كوزبوياۋشىلىق ەكەنىن كورسەتەدى» دەلىنگەن.

الايدا، اقش-تىڭ جاپونياداعى اسكەرلەرىنىڭ بۇنداي ارەكەتىن پەنتاگون تارابى راستاعان جوق.

سولتۇستىك كورەيا تارابى بولسا: «اقش كەلىسسوزگە كۇلىمسىرەپ كەلدى، بىراق كەيىنگى كەزەڭدە ارنايى كۇشتەردى جاتتىقتىرۋى كەلىسپەۋشىلىكتى تۋدىرادى»، – دەيدى.

وتكەن اپتادا ترامپ ءوزىنىڭ الەۋمەتتىك جەلىدەگى پاراقشاسىنا، اقش پەن سولتۇستىك كورەيانىڭ كورەي تۇبەگىنىڭ يادرولىق جاعدايى تۋرالى جەتكىلىكتى دەڭگەيدە كەلىسىمگە كەلە الماعانىن، سوندىقتان دا مەملەكەتتىك حاتشىنىڭ پيوڭياڭ ساپارىن كۇشىنەن قالدىرعانىن راستاعان ەدى. ول وسى مالىمدەمەسىمەن قاتار، اقش-قىتاي ساۋدا سوعىسى قىتايدىڭ قۇلدىراۋىنا الىپ كەلۋى مۇمكىن ەكەنىن دە ەسكەرتكەن بولاتىن.