فوتو: segodnya.ua

بۇۇ شري-لانكادا مۇسىلماندارعا قارسى جاسالىپ جاتقان كۇش كورسەتۋ ارەكەتتەرىنە الاڭداۋلى. بۇۇ-نىڭ ءباسپاسوز حاتشىسى ستەفان دۋياريچ ءباسپاسوز بريفينگىندە ۇيىمنىڭ شري-لانكادا بولىپ جاتقان جاپپاي كۇش كورسەتۋ وقيعالارىن ەلەۋسىز قالدىرمايتىنىن ءارى وعان كوز جۇما قارامايتىنىن مالىمدەگەن.

شري-لانكا ۇكىمەتىنىڭ وسى كەلەڭسىزدىكتى جويىپ، ەلدە تۇراقتىلىقتى ساقتاۋ ماسەلەسىنە قاتىستى ىستەرىن قۇپتايتىنىن ايتقان دۋياريچ، شري-لانكا حالقىنا وزدەرىنىڭ ۇلتارالىق ەرەكشەلىكتەرىن ەكىجاقتى مامىلەگە كەلۋ ارقىلى رەتتەۋدى ۇسىندى.

ول بۇۇ باس حاتشىسىنىڭ ساياسي ىستەر جونىندەگى كومەكشىسى دجەففري فەلتماننىڭ جۇما كۇنى شري-لانكاعا ءۇش كۇنگە ىسساپارمەن باراتىندىعىن جانە ءىسساپاردىڭ ەلدە توتەنشە جاعداي جاريالانباي تۇرىپ جوسپارلانعانىن دا اتاپ ءوتتى. توتەنشە جاعداي تۋرالى ايتار بولساق، شري-لانكا پرەزيدەنتى مايتريپالا سيريسەنا كانديدەگى وقيعالاردىڭ وزگە جەرلەردە دە قايتالانۋىنا الاڭداپ، مۇسىلمان تۇرعىندارعا كوشەگە شىعۋعا تىيىم سالىپ، سەيسەنبى كۇنى ايماققا 10 كۇنگە توتەنشە جاعداي ەنگىزگەن ەدى.

شري-لانكاداعى ادام قۇقىقتارى جانە ەرتتەۋ ورتالىعىنىڭ باسشىسى كيرتي تەنناكۋن اتالعان وقيعا سالدارىنان مۇسىلمان تۇرعىندارعا تيەسىلى 11 دۇڭگىرشەك پەن ۇيلەردىڭ وتقا ورانعانىن حابارلادى. شري-لانكادا حالىقتىڭ شامامەن 75%-ى ءبۋدديزمدى ۇستانۋشى سينگالدىقتار بولسا، مۇسىلمانداردىڭ ۇلەسى 10%.

ەستەرىڭىزگە سالا كەتسەك، شري-لانكادا مۇسىلماندار مەن بۋدديستەردىڭ اراسىندا بىرنەشە كۇننەن بەرى قاقتىعىس بولۋدا. نەگىزى بۇل قاقتىعىس سوڭعى جىلدارى ءجيى-ءجيى توبە كورسەتىپ جۇرگەن-ءدى. كەيبىر بۋدديستىك ۇيىمدار "مۇسىلماندار وزگە دىندەگى ادامداردى ءوز دىندەرىنە كۇشتەپ قابىلداتقىزادى ءارى بۋدديستەردىڭ ارحەولوگيالىق ەسكەرتكىشتەرىن اياق استى ەتۋدە" دەپ ايىپتايدى. سونداي-اق كەيبىر بۋدديستەر ميانمادان شري-لانكاعا كوشكەن مۇسىلمان-بوسقىنداردىڭ دا كەلۋلەرىنە قارسىلىق كورسەتىپ وتىر.

“The Qazaq Times”