Foto: segodnya.ua

BWW Şri-Lankada mwsılmandarğa qarsı jasalıp jatqan küş körsetu äreketterine alañdaulı. BWW-nıñ baspasöz hatşısı Stefan Duyariç baspasöz brifinginde wyımnıñ Şri-Lankada bolıp jatqan jappay küş körsetu oqiğaların eleusiz qaldırmaytının äri oğan köz jwma qaramaytının mälimdegen.

Şri-Lanka ükimetiniñ osı keleñsizdikti joyıp, elde twraqtılıqtı saqtau mäselesine qatıstı isterin qwptaytının aytqan Duyariç, Şri-Lanka halqına özderiniñ wltaralıq erekşelikterin ekijaqtı mämilege kelu arqılı retteudi wsındı.

Ol BWW Bas hatşısınıñ sayasi ister jönindegi kömekşisi Djeffri Feltmannıñ jwma küni Şri-Lankağa üş künge issaparmen baratındığın jäne issapardıñ elde tötenşe jağday jariyalanbay twrıp josparlanğanın da atap ötti. Tötenşe jağday turalı aytar bolsaq, Şri-Lanka prezidenti Maytripala Sirisena Kandidegi oqiğalardıñ özge jerlerde de qaytalanuına alañdap, mwsılman twrğındarğa köşege şığuğa tıyım salıp, seysenbi küni aymaqqa 10 künge tötenşe jağday engizgen edi.

Şri-Lankadağı Adam qwqıqtarı jäne ertteu ortalığınıñ basşısı Kirti Tennakun atalğan oqiğa saldarınan mwsılman twrğındarğa tiesili 11 düñgirşek pen üylerdiñ otqa oranğanın habarladı. Şri-Lankada halıqtıñ şamamen 75%-ı buddizmdi wstanuşı singaldıqtar bolsa, mwsılmandardıñ ülesi 10%.

Esteriñizge sala ketsek, Şri-Lankada mwsılmandar men buddisterdiñ arasında birneşe künnen beri qaqtığıs boluda. Negizi bwl qaqtığıs soñğı jıldarı jii-jii töbe körsetip jürgen-di. Keybir buddistik wyımdar "mwsılmandar özge dindegi adamdardı öz dinderine küştep qabıldatqızadı äri buddisterdiñ arheologiyalıq eskertkişterin ayaq astı etude" dep ayıptaydı. Sonday-aq keybir buddister M'yanmadan Şri-Lankağa köşken mwsılman-bosqındardıñ da kelulerine qarsılıq körsetip otır.

“The Qazaq Times”