فوتو: QT

بۇگىن الماتى حالقى اكتەر، قازاقتىڭ تولەگەنى قۇمان تاستانبەكوۆتى اقتىق ساپارعا شىعارىپ سالدى. اكتەرمەن قوشتاسۋ ءراسىمى الماتى قالاسىنداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءوتتى. 

اكتەرمەن قوشتاسۋ راسىمىنە قازاقستاننىڭ حالىق ءارتىسى ءاسانالى ءاشىموۆ، الماتى قالاسىنىڭ اكىمى باۋىرجان بايبەك، قر مادەنيەت جانە سپورت ءمينيسترى ارىستانبەك مۇحامەديۇلى جانە ماڭعىستاۋ وبلىسى مەن باتىس قازاقستان وبلىسى اكىمدەرىنىڭ ورىنباسارلارى قاتىسىپ، قۇمان تاستانبەكوۆتىڭ وتباسىنا كوڭىل ايتتى.

"دوسىم، ءىنىم، باۋىرىم، ارىپتەس پارتنەرىم، سۇيەنىشىم و دۇنيەلىك دەگەندە "اپىر-اي، الدىندا امەريكادا، لوندوندا ون كۇن، ءبىر اپتا بولدىق. قاسىمدا ءجۇرىپ ەدى. سوندا نەگە ءبىر قۇشاقتاپ سۇيمەدىم" دەپ وكىنىپ جاتىرمىن. كىرشىكسىز تازا جىگىت ەكەنىن ەلدىڭ ءبارى بىلەدى. جاقسى ادامنان عانا جاقسى اكتەر شىعادى.  قۇماننىڭ جانى كىرشىكسىز تازا ەدى. كۇلىپ قانا تۇراتىن اكتەر، جايدارمان جىگىت ورتامىزدان كەتتى. ءانۋار مولدابەكوۆ ۇشەۋمىزدىڭ دوستىعىمىز "قىز جىبەكتەن" باستالعان... ول كەزدە مەرۋەرت ونىنشىنى ەندى اياقتاعان، 17-18 جاستا. بىزدەر وتىزدامىز. قىز جىبەككە قاتىسقان بۇكىل سوستاۆتان  ۇشەۋمىز عانا قالىپ ەدىك. بۇل تاريح. قۇمان ولمەيدى دەگەن ءسوز. ونىڭ ءىسى ولمەيدى", - دەپ كوڭىل ايتتى ءاسانالى ءاشىموۆ.

فوتو: QT

"اعامىزدىڭ سانالى عۇمىرى 1945 جىلى الماتى وبلىسىندا دۇنيەگە كەلگەننەن وسى الماتى قالاسىنىڭ ساحناسىندا جالعاستى. بۇگىن ءاربىر قازاق ءۇشىن قارالى كۇن. ورنى تولماس قازا. اعامىزدى ەلىمىزدە بىلمەيتىن قازاق جوق شىعار... سوندىقتان الماتى جۇرتشىلىعىنىڭ اتىنان سىزدەرگە كوڭىل ايتامىن", - دەدى الماتى اكىمى باۋىرجان بايبەك.

قر مادەنيەت جانە سپورت ءمينيسترى ارىستانبەك مۇحامەديۇلى پرەزيدەنت نۇرسۇلتان نازارباەۆتىڭ كوڭىل ايتۋ جەدەل حاتىن قۇمان تاستانبەكوۆتىڭ وتباسىنا تابىستادى.

فوتو: QT

قۇمان تاستانبەكوۆ 1945 جىلى الماتى وبلىسى، سارقانت اۋدانى، ەكىاشا اۋىلىندا دۇنيەگە كەلگەن. ول قازاق حالقىنا سۇلتان قوجىقوۆتىڭ 1970 جىلى جارىق كورگەن «قىز جىبەك» ءفيلمى ارقىلى تانىلدى. سودان بەرى ول "اققۋلار ۇشىپ كەلەدى",  "پروۆينتسيالىق حيكايا", "اعاما ارنالعان قالىڭدىق", "اعام مەنىڭ", "كوشپەندىلەر", "ماحامبەت", "ماحاببات جاڭعىرىعى" سىندى فيلمدەرگە تۇسكەن.

ول 1993 جىلى قازاقستان رەسپۋبليكاسىنىڭ حالىق ءارتىسى اتانىپ، 2008 جىلى "قۇرمەت" وردەنى، 2015 جىلى "قر كونستيتۋتتسياسىنا - 20 جىل" مەرەكەلىك مەدالى جانە 2016 جىلى "پاراسات" وردەنىمەن ماراپاتتالدى.

قۇمان تاستانبەكوۆ 17 جەلتوقسان كۇنى 72 جاسىندا دۇنيەدەن ءوتتى.

“The Qazaq Times”