ساياسي بەلسەندى جانبولات ماماي سوت مىندەتتەسە دە "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەك جايلى ءفيلمىن وشىرمەيتىنىن مالىمدەدى. بۇل تۋرالى ول بۇگىن، 15 ماۋسىمدا الماتىدا وتكەن ءباسپاسوز ءماسليحاتىندا ايتتى. 

مامايدىڭ ايتۋىنا قارعاناندا، سوت شەشىمى ادىلەتسىز.

ء"بىز سوتتىڭ شەشىمىمەن كەلىسپەيمىز. سوت شەشىمى ادىلەتسىز، زاڭسىز دەپ سانايمىز. مەن ءوزىم سوتتىڭ شەشىمىن ورىندامايمىن. باۋىرجان بايبەك تۋرالى ەشقانداي ماتەريالدار وشىرىلمەيدى، كەلتىرىلگەن دەرەكتەر جوققا شىعارىلمايدى. بەلگىلەنگەن ۋاقىتىندا اپەلاتسيالىق شاعىمدى دا مىندەتتى تۇردە تاپسىرامىز. جوعارى سوتقا شاعىمدانامىز. ودان كەيىن بۇۇ-نىڭ ادام قۇقىعىن قورعايتىن كومميتەتىنە دە مىندەتتى تۇردە جۇگىنەمىز" دەدى ماماي جۋرناليستەرگە.

بۇگىن الماتى قالاسى اۋەزوۆ اۋداندىق №2 سوتى باۋىرجان بايبەكتىڭ  جانبولات ماماي مەن ونىڭ ايەلى ينگا يمانبايدىڭ ۇستىنەن تۇسىرگەن شاعىمى بويىنشا شەشىم شىعارعان. سوت مامايدى بايبەك جايلى شىعارعان ءفيلمدى وشىرۋگە مىندەتتەگەن ەدى.

33 جاستاعى جانبولات ماماي ساۋىردە Youtube-تەگى "دەموكراتيالى قازاقستان/دەموكراتيچەسكي كازاحستان" ارناسىندا "باۋىرجان بايبەك: نازارباەۆ سىنىپتاسى بالاسىنىڭ جەمقور بيزنەس-يمپەرياسى" اتتى زەرتتەۋ جاريالاعان. ول زەرتتەۋدە جانبولات ماماي الماتىنىڭ بۇرىنعى اكىمى باۋىرجان بايبەكتى "مەملەكەتتىك قىزمەتتە ءجۇرىپ ۇلكەن بيزنەس-يمپەريا قۇردى", "الماتى اكىمى بولعان 4 جىلدا 1 ميلليارد دوللار زاڭسىز اقشا تاپتى", "قۇرىلىسقا جانە كولىك تۇراعىنا" قالا اۋماعىنىڭ جانە ىلە-الاتاۋ ۇلتتىق پاركىنىڭ "جەرىن بەردى", "پارا الدى", "كومىر مافياسىن قۇردى" جانە الماتىداعى جەس-2-ءنى "گازعا كوشىرۋدى كەشەۋىلدەتتى", "ادام قۇقىقتارىن بۇزدى" دەپ ايىپتاعان.

"The Qazaq Times"