فوتو: بالاسىن جوعالتقان انا. / ءال-جازيرا

كاشميردىڭ ءۇندىستاننىڭ باقىلاۋىنداعى شريناگار ايماعىندا 2 مىڭ 80 جەرلەنگەن مايىتتەردىڭ تەگى بەلگىسىز. وسى وڭىردەگى ادام قۇقىقتارى جونىندەگى ۇكىمەتتىك ەمەس ۇيىم جەرگىلىكتى بيلىكتەن قازا بولعان ازاماتتاردىڭ دەنەسىن تەكسەرىپ، ولاردىڭ اراسىندا ءۇندىستان مەن پاكىستان اراسىنداعى ونداعان جىلدارعا سوزىلعان قاقتىعىستار كەزىندە ءىز-ءتۇزسىز جوعالعان 8 مىڭ ادامنىڭ قاتارىنداعىلار جوقتىعىنا كوز جەتكىزۋدى تالاپ ەتتى. بۇل تۋرالى ءال-جازيرا اقپاراتتىق اگەنتتىگى جازدى. 

كاشميردەگى جوعالعان ازاماتتاردىڭ اتا-انالارىنان قۇرالعان قاۋىمداستىق ءۇندىستان مەن پاكىستان اراسىنداعى جۇرگىزىلگەن ءبولىنىس سىزىعىنىڭ بويىنان 3 مىڭ 844 بەلگىسىز مولا تابىلعانىن حابارلاعان. ادام قۇقىقتارى جونىندەگى ۇيىم ۇكىمەتتىڭ كومەگىنسىز وسىنداي 53 جەرلەۋ ورنىن قازىپ، دەنەنى ەكسگۋماتسيالاۋ ناتيجەسىندە قازا تاپقانداردىڭ 49-ى بەيبىت تۇرعىن ەكەنى انىقتالعانىن جەتكىزدى. ولاردىڭ قاتارىندا جەرگىلىكتى اسكەري قىزمەتكەر دە بولعان. قوعام بەلسەندىلەرىنىڭ مالىمەتىنشە، كاشمير بيلىگى بۇل ادامداردى شەتەلدىك اسكەري كۇشتەردىڭ وكىلدەرى دەپ جەرلەگەن.

ۇكىمەتتىڭ ادام شىعىنىن جاسىرىپ قالۋعا تىرىساتىن ارەكەتتەرى ادام قۇقىقتارى جونىندەگى ۇيىم تاراپىنان قاتاڭ سىنعا الىندى. ولار بەلگىسىز مولالاردى قازىپ، جەرلەنگەندەردىڭ تەگىن انىقتاۋ جاقىنىنان قول ءۇزىپ، ءالى كۇنگە ءولى-ءتىرىسىن بىلە الماي وتىرعان كوپ وتباسىنىڭ نەگىزگى سۇراقتارىنا جاۋاپ الۋعا كومەكتەسەدى دەپ ەسەپتەيدى. وسىدان بۇرىن ءۇندىستان يەلىگىندەگى كاشمير بيلىگى جوعالعان جاستاردى قارۋلى قاقتىعىسقا جاتتىعۋ ءۇشىن پاكىستان تاراپىنا قاراي شەكارا اسىپ كەتكەن بولۋى مۇمكىن دەگەن بولجام ايتقان بولاتىن.

كاشميردى بولىسكە سالا الماعان ءۇندىستان مەن پاكىستان اراسىنداعى تەرريتوريالىق داۋ بۇرىننان جالعاسىپ كەلەدى. ءۇندىستاننىڭ قاراۋىنداعى كاشمير اۋماعىندا قۇرىلعان باسقىنشىلار توبى 1989 جىلدان بەرى تاۋەلسىزدىك ءۇشىن كۇرەسىپ كەلەدى. ءۇندىستاننىڭ 500 مىڭعا جۋىق اسكەرى ورنالاسقان وڭىردەگى قاقتىعىستار اسەرىنەن بۇگىنگە دەيىن 70 مىڭ ادام قازا تاپقان.

“The Qazaq Times”