ريو وليمپياداسىنىڭ چەمپيوندارى ۇلتتىق ۇلان قاتارىنا ءوتتى

بۇگىن ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 5571 اسكەري ءبولىمىنىڭ ساپتىق الاڭىندا ريو وليمپياداسىنىڭ چەمپيوندارى دميتري بالاندين، نيدجات راحيموۆ جانە بىرقاتار سپورتشىلار سالتاناتتى تۇردە اسكەري انت قابىلداپ، رەسمي تۇردە ۇلتتىق ۇلان قاتارىنا ءوتتى.

قازاقستاننىڭ كوك بايراعىن الەم دودالارىندا بيىككە جەلبىرەتىپ، ەل نامىسىنا سەلكەۋ تۇسىرمەگەن سپورتشىلار العاش رەت قارۋ اسىنىپ، كومانديرلەر مەن جەكە قۇرام الدىندا وتان الدىندا اقتىق دەمدەرى قالعانشا ادال بولۋعا انت بەردى.

اسكەري ءبولىمنىڭ جاۋىنگەرلىك تۋى شىعارىلعان ساتتە جەكە قۇراممەن ءبىر ساپتا ساپ تۇزەگەن ءجۇزۋ شەبەرى دميتري بالاندين مەن زىلتەمىرشى نيدجات راحيموۆ وليمپيادا ويىندارىندا التىن مەدال الىپ، قازاقستاننىڭ مەملەكەتتىك تۋى بيىككە كوتەرىلگەندە ەرەكشە تولقىنىسپەن  ءانۇراندى شىرقاسا، بۇگىن دە جاۋىنگەرلىك تۋ شىعارىلعاندا  بەينەبىر سونداي كۇي كەشتى.

ۇلاندىق سپورتشى جاۋىنگەر اتانۋلارىمەن سپورتشىلاردى قۇتتىقتاۋعا ۇلتتىق ۇلاننىڭ «وڭتۇستىك» وڭىرلىك قولباسشىلىعى قولباسشىسىنىڭ مىندەتىن اتقارۋشى گەنەرال-مايور اندرەي كاسكەلەنوۆ كەلدى. ول ءوز سوزىندە: «قۇرمەتتى سپورتشىلار، بۇگىن سىزدەر وتان الدىندا سالتاناتتى تۇردە اسكەري انت قابىلداپ، ۇلتتىق ۇلان قاتارىنا كىرىپ وتىرسىزدار. ەلىمىزدىڭ ەگەمەندىگى مەن تاۋەلسىزدىگىن قورعاۋ جولىندا ۇلتتىق ۇلان ساربازدارى قاشان دا ءوز الدىنا قويىلعان مىندەتتەردى ابىرويمەن اتقارۋدا. سىزدەر دە وزدەرىڭىزگە ارتىلعان مىندەتتەردى قايسارلىقپەن ورىنداپ، بۇگىنگى قابىلداعان انتتارىڭىزعا ادال بولادى دەگەن سەنىمدەمىن!» - دەدى.

قولىنا قارۋ ۇستاپ اسكەري انت قابىلداعان دميتري بالاندين: «ۇلاندىق جاۋىنگەر اتانعانىما شىن جۇرەكتەن قۋانىشتىمىن. بۇرىن-سوڭدى قولىما كالاش قارۋىن ۇستاپ كورمەگەندىكتەن جانە ساپتىق الاڭدا ساپتىق ادىممەن ءجۇرىپ كورمەگەندىكتەن اسكەري انت قابىلداۋ ساتىندە ءسال قوبالجۋ بولدى. بىراق وتان الدىندا وزگە دە ساربازدار سەكىلدى اسكەري كيىم كيىپ انت قابىلداۋ ءساتى ماعان ەرەكشە كوڭىل-كۇي سىيلادى. وزىمە ارتىلعان مىندەتتەردى ابىرويمەن ورىنداپ، ەلىمىزدىڭ، ءھام ۇلتتىق ۇلاننىڭ نامىسىن قاشان دا بيىك ۇستاۋعا تىرىسامىن، انتىما ادال بولامىن، قازاقستان رەسپۋبليكاسىنا قىزمەت ەتەمىن!» - دەپ اعىنان جارىلدى.

انت قابىلداۋ - وتانىڭا، حالقىڭا اقتىق دەمىڭ شىققانشا ادال بولۋ، ەل باسىنا سىن ساعات تۇسسە، وندا مويىماي كوتەرۋ، قاجەت بولسا، جان قيۋ دەگەن ءسوز. انت – ادالدىق رۋحى. حالقىمىز «انتتان اتتاعانى – اردان اتتاعانى»، - دەيدى. ياعني، ادامزات نورمالارىنىڭ قالىپتاسقان شەگى ار بولسا، ونى بۇزۋ وپاسىزدىققا جاتادى. تالاي عاسىر حالقىنىڭ ەركىندىگىن سىرتقى جاۋلاردان قورعاعان قابانباي، بوگەنباي، ناۋرىزباي سىندى باتىر بابالارىمىزدىڭ، كەشەگى ءفاشيزمنىڭ وتىن وشىرگەن مايدانگەر اتالارىمىزدىڭ اماناتتاعان وتانىمىزدىڭ تاۋەلسىزدىگىن قىراعى كۇزەتۋ - ەڭ ۇلىق قىزمەت.

"The Qazaq Times"