اقش-تا جو بايدەننىڭ يناۋگۋراتسياسىنا ەكى كۇن قالدى. بۇدان بۇرىن كاپيتوليدى باسىپ الۋ جانە بۇلىكتەر كەزىندە بىرنەشە ادامنىڭ قازا تابۋى ۋاشينگتون جۇرتشىلىعىن الاڭداتىپ وتىر. سوندىقتان دا قۇراما شتاتتىڭ ۇلتتىق ۇلان كۇشتەرى جەر-جەردەگى جاساقتارىن ورتالىق قالاعا اتتاندىرۋدا.

اقش پرەزيدەنت دونالد ترامپتىڭ ماڭىنداعى اقپارات كوزدەرىنە سىلتەمە جاساعان امەريكالىق باسىلىمدار جوزەف بايدەننىڭ يناۋگۋراتسياسىنان بۇرىن ترامپ باس قالادان شىعىپ كەتەدى دەگەن مالىمەتتەر تاراتتى. بايدەن سارسەنبى كۇنى اقش پرەزيدەنتى رەتىندە انت بەرىپ قىزمەتىنە كىرىسپەك. بايدەننىڭ انت بەرۋ راسىمىنە قاتىسپايتىنىن ترامپ بۇعان دەيىن دە ايتقان بولاتىن.

ۋاشينگتون ۇلتتىق ۇلان ساربازدارىنا تولدى. فوتو: EPA.

فەدەرالدىق قاۋىپسىزدىك قىزمەتى 16-20 قاڭتار اراسىندا بارلىق شتاتتاردىڭ ورتالىق قالالارىندا راديكالدى توپتاردىڭ دۇربەلەڭى بولۋى مۇمكىن دەپ ەسكەرتۋ جاسادى. امەريكالىق باسىلىمداردىڭ جازۋىنشا، كەيبىر قالالارداعى ۇكىمەت عيماراتتارى ەسىك-تەرەزەلەرىن تەمىر تورلارمەن قورشاۋعا كىرىسكەن. بىرقاتار ايماقتاردا توپتالىپ ميتينگ ۇيىمداستىرۋعا رۇقسات بەرىلمەگەن جاعدايلار دا بولدى. سوعان قاراماستان، ترامپ جاقتاستارى بىرنەشە قالادا نارازىلىق شەرۋلەرىنە شىقتى. بىراق، قاقتىعىس بولعان جوق.

وگايو شتاتىنداعى كونگرەسس عيماراتىنىڭ الدىنا جينالعان نارازى توپ وزدەرىنىڭ قارۋ الىپ ءجۇرۋ قۇقىعىن قورعاۋ ءۇشىن جينالعاندارىن ايتقان. Boogaloo اتالعان قوزعالىستىڭ كەيبىر مۇشەلەرى وسىعان دەيىن بيلىكتىڭ جو بايدەنگە وتكەرىلىپ بەرۋىنە قۇرالدىق قارسىلىق كورسەتۋگە شاقىرعانى بار. ال، وزگە دە قۇرالدى توپتاردىڭ نارازىلىعى تەحاس، ورەگون جانە ميچيگان شتاتتارىندا وتكەن بولاتىن.

اقش زاڭى ەلدىڭ ورتالىق قالاسىندا قۇرال الىپ جۇرۋگە تىيىم سالادى. ABC حابارىندا ۋاشينگتون پوليتسياسى كاپيتولي ماڭىنان 25 جاستاعى ازاماتتى قۇرالىمەن قولعا تۇسىرگەنىن حابارلادى. پوليتسيانىڭ كەيبىر شەكتەۋلەرىنە جانە قاۋىپسىزدىككە قارسى ءتۇرلى شارالارىنا قاراماستان اقش-تىڭ بىرقاتار شتاتتارىندا ترامپتىڭ بيلىكتەن كەتۋىنە نارازىلار قۇرالدى قارسىلىق كورسەتۋگە دايىن ەكەنىن بىلدىرگەن.

“The Qazaq Times”