قازاقستان رەسپۋبليكاسى مادەنيەت جانە سپورت مينيسترلىگى وڭتۇستىك قازاقستان وبلىسى اكىمدىگىمەن بىرلەسە وتىرىپ، تۇركسوي حالىقارالىق ۇيىمىنىڭ قولداۋىمەن «تۇركىستان – تۇركى الەمىنىڭ 2017 جىلعى مادەني استاناسى» جوباسى مەن «ەكسپو 2017» حالىقارالىق كورمەسى اياسىندا 2017 جىلدىڭ 6-9 ماۋسىمى ارالىعىندا تۇركىستان - شىمكەنت قالالارىندا «ورتەكە» V حالىقارالىق قۋىرشاق تەاترلارىنىڭ فەستيۆالى وتۋدە.

بۇل ءىس-شارانى وتكىزۋدىڭ ماقساتى – كاسىبي قۋىرشاق ونەرىن كوپشىلىككە تانىتۋ، ايماقارالىق ىنتىماقتاستىق پەن كاسىبي قۋىرشاق ونەرى سالاسىنداعى حالىقارالىق مادەني بايلانىستى نىعايتۋ، دارىندى ارتىستەر مەن رەجيسسەرلەردى انىقتاپ، ىنتالاندىرۋ، قۋىرشاق ونەرى اكتەرلەرىنىڭ كاسىبي جانە ورىنداۋشىلىق شەبەرلىگى دەڭگەيىن ارتتىرۋ، وتاندىق قۋىرشاق ونەرىنىڭ دامۋىنا جاعداي جاساۋ بولىپ تابىلادى.

فەستيۆال اياسىندا تۇركىستان – شىمكەنت قالالارىنىڭ تۇرعىندارى مەن قوناقتارى: م. جانعازيەۆ اتىنداعى قىرعىز مەملەكەتتىك قۋىرشاق تەاترى، ابدوللا شايگ اتىنداعى ءازىربايجان مەملەكەتتىك قۋىرشاق تەاترى، تۇركيادان ادانا قالالىق مۋنيتسيپالدىق تەاترى مەن جانە «قاراكوز» تەاترلارى، سونىمەن قاتار اقتوبە وبلىستىق «الاقاي» قۋىرشاق تەاترى، ماڭعىستاۋ وبلىستىق قۋىرشاق تەاترى، وڭتۇستىك قازاقستان وبلىستىق قۋىرشاق تەاترى جانە س.قوجامقۇلوۆ اتىنداعى جەزقازعان قازاق مۋزىكالىق دراما تەاترى ۇجىمدارىنىڭ ورىنداۋىندا قازاقستاندىق جانە شەتەلدىك اۆتورلاردىڭ تۋىندىلارىن تەگىن تاماشالاۋعا بولادى.

بارلىق سپەكتاكل كورسەتىلىمدەرىنە قۇرامىنا رەجيسسەر، استانا قالاسى قۋىرشاق تەاترىنىڭ كوركەمدىك جەتەكشىسى، قر ەڭبەك سىڭىرگەن ءارتيسى قۇرالاي حالەكەتقىزى ەشمۇراتوۆا (قازاقستان), UNİMA حالىقارالىق قۋىرشاق تەاترلارى وداعىنىڭ تۇركياداعى مۇشەسى، سىنشى، قۋىرشاق تەاترلارىن زەرتتەۋشى-جازۋشى مەۆلۋت وزحان (تۇركيا), رەسەيدىڭ ەڭبەك سىڭىرگەن ءارتيسى، ورىنبور وبلىستىق قۋىرشاق تەاترىنىڭ كوركەمدىك جەتەكشىسى ۆاديم الەكساندروۆيچ سميرنوۆ (رەسەي), الماتى قالاسى مەملەكەتتىك قۋىرشاق تەاترىنىڭ اكتريساسى، قر ەڭبەك سىڭىرگەن ءارتيسى سابيلا ابۋەۆا (قازاقستان), د. تاناسوگلۋ اتىنداعى گاگاۋىز ۇلتتىق تەاترىنىڭ ديرەكتورى ميحايل دميتريەۆيچ كونستانتينوۆ (مولدوۆا) سىندى كاسىبي ماماندار ەنگەن حالىقارالىق قازىلار القاسى تورەلىك جاسايدى.

فەستيۆال اياسىندا كەلەسى شارالار ۇيىمداستىرىلۋدا:

- 6 ماۋسىم كۇنى ساعات 10:30-دا – قازىلار القاسىنىڭ ءتورايىمى قۇرالاي حالەكەتقىزى ەشمۇراتوۆا، تۇركسوي ۇيىمىنىڭ ارنايى وكىلى ەلشىن گافارلى جانە وقو مادەنيەت باسقارماسىنىڭ باسشىسى نۇربولات قادىرۇلى احمەتجانوۆ پەن ۇيىمداستىرۋ كوميتەتىنىڭ مۇشەسى الماس بولاتۇلى ءالىمجانوۆتىڭ قاتىسۋىمەن باق وكىلدەرىنە ارنالعان ءباسپاسوز ءماسليحاتى ءوتتى. وعان 20 جۋىق باق وكىلى قاتىستى. ساعات 11:00-دە فەستيۆالدىڭ سالتاناتتى اشىلۋ ءراسىمى ءوتىپ، سەركە قوجامقۇلوۆ اتىنداعى جەزقازعان قازاق مۋزىكالىق-دراما تەاترىنىڭ قۋىرشاق ترۋپپاسىنىڭ قويىلىمىمەن جالعاستى. (ق.ا. ياساۋي اتىنداعى حقتۋ مادەنيەت ورتالىعى. تۇركىستان ق.، ب. ساتتارحانوۆ داڭعىلى، 29);

- 7-9 ماۋسىم ارالىعى – شىمكەنت قالاسىنداعى سپەكتاكلدەر كورسەتىلىمى مەن شەبەرلىك سىنىپتارى;

- 9 ماۋسىم، ساعات 18:00-دە – فەستيۆالدىڭ سالتاناتتى جابىلۋ ءراسىمى («قيال الەمى» تەحنوپاركى، شىمكەنت قالاسى).

سپەكتاكلدەر ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مادەنيەت ورتالىعى (تۇركىستان ق.), وڭتۇستىك قازاقستان وبلىستىق وپەرا جانە بالەت تەاترى، وڭتۇستىك قازاقستان وبلىستىق قۋىرشاق تەاترى، وڭتۇستىك قازاقستان وبلىستىق ورىس دراما تەاترى ساحنالارىندا كورسەتىلەدى.

“The Qazaq Times”