وڭتۇستىك كورەيا جاڭا پرەزيدەنتى ۋادەسىنەن تايىپ كەتۋى مۇمكىن

سولتۇستىك كورەيا ءۇش اپتادا زىمىران سىناعىن ءۇش رەت جاساپ ۇلگەردى. بۇل جاڭادان سايلانعان وڭتۇستىك كورەيانىڭ پرەزيدەنتىنىڭ سولتۇستىك كورەيامەن بايلانىستى قالاي تۇراقتاندىرۋىنا اسەر ەتپەي قالمايدى.

اقش-تىڭ تىنىق مۇحيت باس شتابىنىڭ مالىمدەمەشىسى رامون وسوريونىڭ ايتۋىنا قاراعاندا، كەزەكتى زىمىران سىناعى دۇيسەنبى تاڭعى ساعات 05:10 دا جاسالعان. زىمىران ۇشىرىلعان ورىن ەلدىڭ سولتۇستىك شىعىس تەڭىز جاعالاۋىنداعى ۋونسان قالاسىنا جاقىن تاۋ اراسىنان ۇشىرىلعان. التى مينۋت وتكەننەن كەيىن زىمىران جاپونيا مەن كورەيا اراسىنداعى تەڭىزگە قۇلاعان.

سولتۇستىك كورەيانىڭ ايتۋىنا قاراعاندا بۇل رەتكى سىناققا ۇدەمەلى ۇشىرۋ مەن نىسانا دالدىگىن سىناۋ باستى ماقسات ەتىلگەن. زىمىران نىسانانى تۇراقتى ساقتاپ تۇرۋ قۇرىلعىسىنا يە. الدىن الا بەلگىلەگەن نىساناعا ءدال سوققى جاساي الادى. نىسانا دالدىگى 7 مەتر شاماسىندا. وڭتۇستىك كورەيانىڭ بىرلەسكەن ارمياسىنىڭ وكىلدەرى زىمىراننىڭ 450 شاقىرىم قاشىقتىققا ۇشاتىنىن، ەڭ بيىك ۇشۋ نۇكتەسى 120 كم بولعانىن ايتتى.

سولتۇستىك كورەيانىڭ بۇل زىمىران ۇشىرۋى وڭتۇستىك كورەيانىڭ جاڭا پرەزيدەنتىنىڭ سايلاۋدان بۇرىنعى ۋادەسىن ورىنداۋىنا كەرى اسەر بەرمەك. ءمۇن جا-ين سايلاۋ كەزىندە كورەي تۇبەگى ماسەلەسىن وڭاپ، پيوڭياڭمەن (پحەنيان) بولعان قارىم-قاتىناستى جاقسارتۋعا، ءتىپتى ەكونوميكالىق كومەك كورسەتۋ سەكىلدى كورەي بىرلىگىن قۋاتتاپ كەلىپ ەدى.