ترامپ پەن كيم جوڭ ۋن كەزدەسەدى. فوتو: WSJ.

اق ۇيدە بەيسەنبى كۇنى جاساعان مالىمدەمەدە، پرەزيدەنت ترامپتىڭ سولتۇستىك كورەيا باسشىسى كيم جوڭ ۋننىڭ كەزدەسۋ تۋرالى جاساعان ۇسىنىسىن قابىلداعانى ايتىلدى. بۇل تۋرالى «WSJ» باسىلىمى حابارلادى.

اقش-قا ساپارلاي بارعان وڭتۇستىك كورەيا جوعارى لاۋازىمدىسى كەشە كەشتە اق ۇيدە ءباسپاسوز ءماسليحاتىن وتكىزىپ، اقش-تى كەلىسسوز كەزدەسۋىنە شاقىرىلعانىن جانە ترامپتىڭ بۇل ۇسىنىستى قابىل العانىن ايتتى. ول جانە بۇل كەزدەسۋدىڭ مامىر ايىنىڭ سوڭىنا دەيىن وتكىزۋدى جوسپارلاپ جاتقاندارىن حابارلادى.

وڭتۇستىك كورەيا لاۋازىمدىلارى اق ۇيدە ءباسپاسوز كونفەرەنتسياسىن وتكىزدى. فوتو: WSJ.

كەيىن، اق ءۇيدىڭ ءباسپاسوز قىزمەتى دە بۇل مالىمەتتى راستاعان. دەگەنمەن، كەلىسسوزدىڭ ۋاقىتى مەن ورنى تۋرالى انىق مالىمەت جوق.

وسى اپتانىڭ باس شەنىندە سولتۇستىك كورەيا باسشىسى كيم جوڭ ۋنمەن (كيم چەن ىن/Kim Jong  Un) كەزدەسكەن وڭتۇستىك كورەيانىڭ ۇلتتىق قاۋىپسىزدىك كەڭەسشىسى چون ي ەن دە ءباسپاسوز كونفەرەنتسياسىنا قاتىستى. ول سول كۇنى تۇستەن بۇرىن سولتۇستىك كورەيا باسشىسىنىڭ حاتىن ترامپقا تاپسىرىپ بەرگەن. ول سوزىندە كيم جوڭ ۋن حاتىندا ترامپتى كەزدەسۋگە شاقىرعانىن جانە ترامپتىڭ بۇل ۇسىنىستى قابىلداعانىن ەستىگەن امەريكالىق شەنەۋنىكتەردىڭ قاتتى تاڭ قالعانىن ايتقان.

سولتۇستىك كورەيا باسشىسى وڭتۇستىك كورەيانىڭ ەلشىسىن قابىلدادى. فوتو: WSJ.

مالىمەتكە قاراعاندا، اق ءۇي بۇعان دەيىن سولتۇستىك كورەياعا باعىتتالىپ كەلگەن سانكتسيالار مەن قىسىمداردى جالعاستىرا تۇسپەك. كەمىندە كەلىسسوز بەن ونىڭ ناتيجەسى بەلگىلى بولعانعا دەيىن سانكتسيالار توقتاتىلمايتىنى اشىق ايتقان.

وسىدان كەيىن ترامپ ءوزىنىڭ «تۆيتتەر» پاراقشاسىندا سولتۇستىك كورەيانىڭ ۇلكەن وزگەرىسكە ءتۇسىپ جاتقانىن ايتا كەلىپ: «كيم جوڭ ۋن وڭتۇستىك كورەيا دەلەگاتسياسىمەن يادرولىق قارۋدى جويۋ تۋرالى اڭگىمەلەسكەن. ءبىر عانا يادرولىق باعدارلامالاردى توقتاتۋ ەمەس، بالليستيكالىق زىمىراندار سىناعىن دا توقتاتاتىنى تۋرالى ايتىپتى. بۇل ۇلكەن وزگەرىس ەمەس پە؟! بىراق قازىرگى سانكتسيالار كەلىسسوز جوسپارلانىپ بولعانعا دەيىن نەمەسە كەلىسىمگە قول جەتكىزگەنگە دەيىن ساقتالادى»، – دەپ جازدى.

چون ي ەن دە مالىمدەمەسىندە، كيم جوڭ ۋننىڭ كورەي تۇبەگى ماسەلەسىن شەشۋ ءۇشىن يادرولىق باعدارلامالار مەن بالليستيكالىق زىمىراندار سىناعىن توقتاتۋعا نيەتتى ەكەنىن راستادى.  

“The Qazaq Times”