پەنتاگون. اقش قورعانىس دەپارتامەنتىنىڭ عيماراتى. فوتو: www.history.com.

«The New York Times» تاڭعى گازەتىنىڭ حابارلاۋىنا قاراعاندا، ترامپ ۇكىمەتىنىڭ كحدر تارابىنا قاراما-قايشى اقپارات تاراتۋى جۇرتتى تاڭ قالدىرعان. ترامپتىڭ ستراتەگيالىق كەڭەسشىسى ستيۆەن بەننوننىڭ ايتۋىنا قاراعاندا، سولتۇستىك كورەيامەن اراداعى يادرولىق وقشاۋلاۋ ماسەلەسىندە ەشقاشان اسكەري شەشىم قابىلدانباعان.

بۇل مالىمدەمە جاقىندا عانا اقش-تىڭ ەڭ جوعارى اسكەري لاۋازىمدىسىنىڭ كورەي تۇبەگىنە ساپارى كەزىندە "اقش ارمياسى كورەي تۇبەگى ماسەلەسىندە باستى ءرول وينايدى" دەپ ايتقاندارىن اسىرەشىلدىككە اينالدىرىپ تاستادى.

ال، وڭتۇستىك كورەيا پرەزيدەنتىنىڭ كەشەگى حابارىندا، اقش-تىڭ كورەي تۇبەگىندەگى جانە ەل ىشىندەگى ءبىر جاقتى اسكەري شەشىمدەرىن جانە كحدر-عا اسكەري شابۋىل جاساۋىن بولدىرماۋعا تىرىسامىز دەگەن ەدى.

قازىرگى كەزدە وڭتۇستىك كورەيا اقش پەن كورەي تۇبەگى اراسىنداعى نەگىزگى دانەكەر دەۋگە بولادى. كورەي بيلىگى اقش-تىڭ سولتۇستىك كورەياعا جاسايتىن شەشىمدەرىنە ەڭ كوپ ىقپال ەتەتىنى ايدان انىق. وڭتۇستىك كورەيا پرەزيدەنتى ءمۇن جا-ين (Moon Jae-in) بولسا، «كورەي حالقى الاڭسىز بولسىن، ءبىز سوعىستى بولدىرمايمىز» دەپ كەسىمدى ءسوزىن ايتقان.

اقش پەن سولتۇستىك كورەيدىڭ اۋىزدارىنان «اق يت كىرىپ، كوك يت شىقسا دا»، كحدر اۋىر سوزدەرمەن ورەكپىسە دە، وڭتۇستىك كورەيا حالقى پرەزيدەنتتەرىنىڭ سوزىنە باعىپ، تىپ-تىنىش وتىر.

ال، اق ۇيدەگىلەر مەن پەنتاگونداعى اسكەري شەندىلەردىڭ ءسوزى ءبىر-ءبىرىن تاپپاي ءجۇر. اسكەريلەر ارمياسىن ءسوز ەتىپ، ايبارلانسا، اق ءۇي لاۋازىمدىلارى جايدىڭ بۇلتىنداي اۋناپ سويلەۋدە. بۇل "ۋاشينگتوننىڭ جاڭا قۋلىعى ما، الدە ترامپ بيلىگى اراسىندا تۇسىنبەۋشىلىك پە؟" دەگەن سۇراق امەريكالىقتاردى دا ويلاندىرىپ وتىر.

“The Qazaq Times”