Qazaqstanda koronavirus pen oğan wqsas pnevmoniyağa şaldıqqandar sanı tağı 1,4 mıñğa artıp, jalpı esebi 1 mln 35 mıñnan astı. Bwl salıstırmalı türde bıltırğıdan birşama joğarı. Qaraşa ayınıñ alğaşqı dekadasında 13,5 mıñ adam auırıp, 286 adam qaytıs boldı.

Densaulıq saqtau ministrliginiñ resmi mälimetinşe, elde 11 qaraşa koronavirus (KVI+) jwqqan 1260 adam, al 10-ı koronavirus pnevmoniyasına (KVI-) şaldıqqan 176 adam tirkeldi. Sonday-aq, särsenbide 32 qazaqstandıq aurudan qaytıs boldı. Bıltır däl osı uaqıtta resmi statistikada täuligine köp degende 800-ge deyin nauqas jäne 10 şaqtı ölim jağdayı tirkeletin, sırqattar sanı 7,5 mıñ şamasında edi. Qazir bwl körsetkiş eselep ösip otır, büginde elde 36,5 mıñ adam (KVI+ boyınşa 31,5 mıñ, KVI- boyınşa 5 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar sanı tağı köbeydi. Olardıñ negizgi böligi nemese 13%-ı ädettegidey SQO (161), 11%-ı Almatı qalasına (146) tiesili. Auruşañdıq Pavlodar (129), astana (121), Jambıl (15), Türkistan (15), Mañğıstau (6) oblıstarında eleusiz deñgeyde kemigen. Al Qarağandı (135), Qostanay (116), Aqmola (98), ŞQO (93),  Almatı (83), BQO (38), Şımkent (32), Atırau (28), Qızılorda (24), Aqtöbe (20) öñirde birşama öskeni bayqaladı. Beysenbide aurudan ayıqqan 2120 adam üyine şığarılğan. 10 qaraşada jiını 28 adam qaytıs bolğan.

#COVID_pnevmoniyası Qaraşanıñ 10-ı aqparatı bir täulikke keşigip beriletin koronavirus pnevmoniyasına şaldıqqan 152 nauqas esepke alındı. Vedomstvo dereginşe, bwl küni Şımkent (26), Aqmola (19), ŞQO (17), Jambıl (17), Mañğıstau (14), Almatı (10) qalasında köptep anıqtalğan. Sonımen qosa, 206 adam ayığıp şıqqan, tağı 4 adam köz jwmğan.

#Jalpı  DenMin deregine qarağanda, emdelip jatqan 36,5 mıñ nauqastıñ 6,5 mıñı auruhanada, 30 mıñı ambulatorlıq baqılauda. 472 nauqastıñ jağdayı naşar, ondağı 139 adamnıñ häli öte auır. Bwdan özge 86 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Atırau, Türkistan, Mañğıstau, BQO, ŞQO, Almatı oblısı, Jambıl, Aqtöbe, Qızılorda oblıstarınan basqa astana, Almatı qalası, Şımkent, Qostanay, Qarağandı jäne Aqmola oblısı «sarı aymaqqa» ötken. Basqa eki aymaq (Pavlodar, SQO) äli de «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 57 mıñ auru jäne 1078 ölim jağdayı tirkelgen. Qaraşa ayı bastalğalı 13,5 mıñ sırqat tirkeldi, dert meñdegen 286 adam ömirden ötken.

Bıltır 13 naurızdan beri COVID-19 infekciyasın jwqtırğandar qatarı 954 mıñnan assa, 1 tamızdan bergi koronavirus pnevmoniyası 81 mıñğa juıqtağan. DDSW derekqorı men Wlttıq statistikada Qazaqstanda auırğandar sanı 1 mln 35 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 20 ayında jalpı virus jwqqandardan 20,8 mıñ adam (KVI+ / U07.1 – 12 377, KVI- / U07.2 – 5084, ilespe aurulardan – 3415) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,7 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8,5 mln-nan asadı. Densaulıq saqtau ministri Aleksey Coy 22 qaraşadan bastap vakcina alğanına jartı jıl ötkender üşin revakciyanaciya nauqanı jürgiziletinin mälimdegen.

The Qazaq Times