Almatı qalasındağı emhanalardıñ birine qarastı ambulatorlıq punkt jäne oğan tiesili qızmettik köligi. Foto: QT

Ekpin ala bastağan indettiñ kezekti tolqınında sırqattar sanı köbeye bastadı. Astana, Almatı qalaları men Qarağandı oblısı, özge öñirlerde de epidahual eleuli türde naşarladı.

Densaulıq saqtau ministrliginiñ resmi mälimetinşe, elde 2 şildede koronavirus (KVI+) jwqqan 2765 adam, al 1-i koronavirus pnevmoniyasına (KVI-) şaldıqqan 87 adam tirkeldi. Qazir elde 28,5 mıñnan asa adam (KVI+ boyınşa 27 231, KVI- boyınşa 1344) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey astana (797),  Qarağandı oblısı (463) jäne Almatı qalasında (385) tirkeldi. Bwdan özge BQO (157), Mañğıstau (142), Atırau (137) oblıstarında jäne Şımkentte (131) dert üdep baradı. Ötken täulikte 1453 adam ayığıp şığıp, üyine jiberilgen. Osı beysenbide jiını 19 adam qaytıs bolğan.

#COVID_pnevmoniyası 1 şildede aqparatı bir täulikke keşigip beriletin koronavirus pnevmoniyasına şaldıqqan 87 nauqas esepke alındı. Vedomstvo dereginşe, olar astana (15), Atırau oblısı (11) jäne Şımkent qalasında (9) köptep anıqtalğan. Sonımen qosa, 60 adam ayığıp şıqqan, tağı 6 adam köz jwmğan.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan.

#Jalpı  DenMin deregine qarağanda, emdelip jatqan 28 575 nauqastıñ 8,6 mıñı auruhanada, 20 mıñdayı ambulatorlıq baqılauda. Ahualı naşar 541 nauqastıñ jağdayı naşar, ondağı 117 adamnıñ häli öte auır. Bwdan özge 72 sırqat ökpeni jasandı jeldetu apparatımen tınıstap jatır.

Ötken küngi derek boyınşa, virustıñ taralu qateri jağınan astana, Almatı, Şımkent qalaları men Atırau, BQO, Qarağandı oblıstarı «qızıl aymaqqa» endi. Aqmola, Aqtöbe, Qostanay, Mañğıstau, Pavlodar öñirleri «sarı aymaqta» twr. Qazaqstan twstas qızıl reñge boyaldı.

Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 431 mıñğa juıqtap, 1 tamızdan bılayğı koronavirus pnevmoniyası 57 mıñğa jetken. DDSW derekqorı men Wlttıq statistikada Qazaqstanda auırğandar sanı 488 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 9,8 mıñı (KVI+ / U07.1 – 4418, KVI- / U07.2 – 3458, ilespe aurulardan – 1962) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 45-orında twr.

Ükimettiñ soñğı deregine qarağanda, Qazaqstanda 2 mln 135 mıñ adam koronavirusqa qarsı vakcinanı tolıq alğan.

"The Qazaq Times"