الماتى قالاسىنداعى ەمحانالاردىڭ بىرىنە قاراستى امبۋلاتورلىق پۋنكت جانە وعان تيەسىلى قىزمەتتىك كولىگى. فوتو: QT

ەكپىن الا باستاعان ىندەتتىڭ كەزەكتى تولقىنىندا سىرقاتتار سانى كوبەيە باستادى. استانا، الماتى قالالارى مەن قاراعاندى وبلىسى، وزگە وڭىرلەردە دە ەپيداحۋال ەلەۋلى تۇردە ناشارلادى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 2 شىلدەدە كوروناۆيرۋس (كۆي+) جۇققان 2765 ادام، ال 1-ءى كوروناۆيرۋس پنەۆمونياسىنا (كۆي-) شالدىققان 87 ادام تىركەلدى. قازىر ەلدە 28,5 مىڭنان اسا ادام (كۆي+ بويىنشا 27 231, كۆي- بويىنشا 1344) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي استانا (797),  قاراعاندى وبلىسى (463) جانە الماتى قالاسىندا (385) تىركەلدى. بۇدان وزگە بقو (157), ماڭعىستاۋ (142), اتىراۋ (137) وبلىستارىندا جانە شىمكەنتتە (131) دەرت ۇدەپ بارادى. وتكەن تاۋلىكتە 1453 ادام ايىعىپ شىعىپ، ۇيىنە جىبەرىلگەن. وسى بەيسەنبىدە جيىنى 19 ادام قايتىس بولعان.

#COVID_پنەۆمونياسى 1 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 87 ناۋقاس ەسەپكە الىندى. ۆەدومستۆو دەرەگىنشە، ولار استانا (15), اتىراۋ وبلىسى (11) جانە شىمكەنت قالاسىندا (9) كوپتەپ انىقتالعان. سونىمەن قوسا، 60 ادام ايىعىپ شىققان، تاعى 6 ادام كوز جۇمعان.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان.

#جالپى  دەنمين دەرەگىنە قاراعاندا، ەمدەلىپ جاتقان 28 575 ناۋقاستىڭ 8,6 مىڭى اۋرۋحانادا، 20 مىڭدايى امبۋلاتورلىق باقىلاۋدا. احۋالى ناشار 541 ناۋقاستىڭ جاعدايى ناشار، ونداعى 117 ادامنىڭ ءحالى وتە اۋىر. بۇدان وزگە 72 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وتكەن كۇنگى دەرەك بويىنشا، ۆيرۋستىڭ تارالۋ قاتەرى جاعىنان استانا، الماتى، شىمكەنت قالالارى مەن اتىراۋ، بقو، قاراعاندى وبلىستارى «قىزىل ايماققا» ەندى. اقمولا، اقتوبە، قوستاناي، ماڭعىستاۋ، پاۆلودار وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 431 مىڭعا جۋىقتاپ، 1 تامىزدان بىلايعى كوروناۆيرۋس پنەۆمونياسى 57 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 488 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 9,8 مىڭى (كۆي+ / U07.1 – 4418, كۆي- / U07.2 – 3458, ىلەسپە اۋرۋلاردان – 1962) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 45-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 135 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"