2020 jılğı köktemdegi karantin kezinde Abılay han dañğılınıñ boyın dezinfekciyalap jürgen küştik qwrılımdardıñ arnayı kölikteri. 2 säuir 2020 jıl, Almatı q. Foto: Qr QM Radioelektronika jäne baylanıs äskeri-injenerlik institutı

Aldağı halıqtıq meyram Naurız toyı qarsañında Almatı qalasında karantin qataya tüspek.

Särsenbi küni  Almatı qalası men astananıñ koronavirustıñ taralu qateri jağınan «qızıl aymaqqa» qayta engeni habarlandı.

10 naurız küni Almatı qalasındağı ahual jaylı brifingte derttiñ  aujayı söz boldı.

– Kün rayı jılınğan sayın qala twrğındarı bir-birimen köbirek aralasa bastadı. Qala mañındağı twrğındardıñ da arı-beri qozğalısı arttı. Qoğamdıq kölik pen adam köp jinalatın jerlerge jwrt köptep jinala bastadı, — dedi Almatı qalasınıñ sanitarlıq-epidemiologiyalıq departament jetekşisiniñ orınbasarı Äsel Qalıqova.

Bekşinniñ orınbasarı infekciyanı jwqtırğandardıñ köbeyuine otbasılıq jäne saltanattı şaralardıñ jiileui, 1-5 sınıp oquşılarınıñ sabaqqa bara bastauı, qoğamdıq qarım-qatınastıñ artuı siyaqtı alğışarttar iser etkenin atap ötti. Mamannıñ sözinşe, bwdan özge boyınan koronavirus tabılğan nauqastar da oqşaulau rejimin jii bwza bastağan.

Resmi ökildiñ mälimdemesine sensek, keyingi kezde şetelden PTR testiniñ qorıtınsız keletin jolauşı qatarı köbeygen. 6-8 naurız aralığında Almatığa ärtürli elderden testi joq 700 adam kelgen. Qalağa köbine BAÄ, Türkiya, Egipetten adamdar keledi.

Almatı qalası «qızıl aymaqqa» engendikten qalada qosımşa karantin şaraları engiziledi. Mwnıñ bäri 10 naurızda qol qoyılatın bas sanitar därigerdiñ jaña qaulısında aytılmaq. Bwğan deyin Naurız meyramı kezinde  qoğamdıq şara ötkizuge tıyım salınğan edi.

Osığan deyin Almatıda koronavirus jwqqan 26 274 jäne pnevmoniyağa şaldıqqan 5393 adam tirkelgen.

Bıltır 13 naurızdan beri COVID-19 infekciyasın jwqtırğandar qatarı 220 mıñnan, 1 tamızdan bergi koronavirus pnevmoniyası 49,5 mıñnan asqan. DDSW derekqorı men Wlttıq statistikada Qazaqstanda auırğandar sanı 269,6 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 4529-ı (KVI+ / U07.1 – 2821, KVI- / U07.2 – 647, ilespe aurulardan – 1061) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 1061 adamdı jalpı statistikağa engizbeydi.

Bıltır qıs tüser twsta bas memlekettik sanitar-däriger Erlan Qiyasov Qazaqstanda kezekti tolqınınıñ şarıqtau kezeñi qañtar-aqpan aylarına, al ministr Aleksey Coy naurız ayınıñ soñına qaray twspa-tws keletinin mälimdegen. Osı aydıñ basında Coydıñ birinşi vice-ministri Marat Şoranov säuir ayında 20 mıñğa tarta adam COVID-19 dertin jwqtıruı mümkin degen.

Jalpı ötken qısta 88 mıñğa tarta, jaña jıl bastalğalı Qazaqstanda 65 mıñnan asa adamnan auru anıqtalğan. Toqsan künge sozılğan qıs mezgilinde auırğandardıñ 81 mıñnan astamı koronavirus, qalğan 6,8 mıñı pnevmoniya pacientteri. Jeltoqsan jäne aqpan ayları aralığındağı barlıq körsetkişterdi mezgilge arnalğan qorıtındı materialdan bile alasız.

"The Qazaq Times"