ناۋرىز مەيرامىندا الماتىدا كارانتين كۇشەيەدى

الداعى حالىقتىق مەيرام ناۋرىز تويى قارساڭىندا الماتى قالاسىندا كارانتين قاتايا تۇسپەك.

سارسەنبى كۇنى  الماتى قالاسى مەن استانانىڭ كوروناۆيرۋستىڭ تارالۋ قاتەرى جاعىنان «قىزىل ايماققا» قايتا ەنگەنى حابارلاندى.

10 ناۋرىز كۇنى الماتى قالاسىنداعى احۋال جايلى بريفينگتە دەرتتىڭ  اۋجايى ءسوز بولدى.

– كۇن رايى جىلىنعان سايىن قالا تۇرعىندارى ءبىر-بىرىمەن كوبىرەك ارالاسا باستادى. قالا ماڭىنداعى تۇرعىنداردىڭ دا ارى-بەرى قوزعالىسى ارتتى. قوعامدىق كولىك پەن ادام كوپ جينالاتىن جەرلەرگە جۇرت كوپتەپ جينالا باستادى، — دەدى الماتى قالاسىنىڭ سانيتارلىق-ەپيدەميولوگيالىق دەپارتامەنت جەتەكشىسىنىڭ ورىنباسارى اسەل قالىقوۆا.

بەكشيننىڭ ورىنباسارى ينفەكتسيانى جۇقتىرعانداردىڭ كوبەيۋىنە وتباسىلىق جانە سالتاناتتى شارالاردىڭ جيىلەۋى، 1-5 سىنىپ وقۋشىلارىنىڭ ساباققا بارا باستاۋى، قوعامدىق قارىم-قاتىناستىڭ ارتۋى سياقتى العىشارتتار ىسەر ەتكەنىن اتاپ ءوتتى. ماماننىڭ سوزىنشە، بۇدان وزگە بويىنان كوروناۆيرۋس تابىلعان ناۋقاستار دا وقشاۋلاۋ رەجيمىن ءجيى بۇزا باستاعان.

رەسمي وكىلدىڭ مالىمدەمەسىنە سەنسەك، كەيىنگى كەزدە شەتەلدەن پتر تەستىنىڭ قورىتىنسىز كەلەتىن جولاۋشى قاتارى كوبەيگەن. 6-8 ناۋرىز ارالىعىندا الماتىعا ءارتۇرلى ەلدەردەن تەستى جوق 700 ادام كەلگەن. قالاعا كوبىنە ءباا، تۇركيا، ەگيپەتتەن ادامدار كەلەدى.

الماتى قالاسى «قىزىل ايماققا» ەنگەندىكتەن قالادا قوسىمشا كارانتين شارالارى ەنگىزىلەدى. مۇنىڭ ءبارى 10 ناۋرىزدا قول قويىلاتىن باس سانيتار دارىگەردىڭ جاڭا قاۋلىسىندا ايتىلماق. بۇعان دەيىن ناۋرىز مەيرامى كەزىندە  قوعامدىق شارا وتكىزۋگە تىيىم سالىنعان ەدى.

وسىعان دەيىن الماتىدا كوروناۆيرۋس جۇققان 26 274 جانە پنەۆمونياعا شالدىققان 5393 ادام تىركەلگەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 220 مىڭنان، 1 تامىزدان بەرگى كوروناۆيرۋس پنەۆمونياسى 49,5 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 269,6 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 4529-ى (كۆي+ / U07.1 – 2821, كۆي- / U07.2 – 647, ىلەسپە اۋرۋلاردان – 1061) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1061 ادامدى جالپى ستاتيستيكاعا ەنگىزبەيدى.

بىلتىر قىس تۇسەر تۇستا باس مەملەكەتتىك سانيتار-دارىگەر ەرلان قياسوۆ قازاقستاندا كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن. وسى ايدىڭ باسىندا تسويدىڭ ءبىرىنشى ۆيتسە-ءمينيسترى مارات شورانوۆ ءساۋىر ايىندا 20 مىڭعا تارتا ادام COVID-19 دەرتىن جۇقتىرۋى مۇمكىن دەگەن.

جالپى وتكەن قىستا 88 مىڭعا تارتا، جاڭا جىل باستالعالى قازاقستاندا 65 مىڭنان اسا ادامنان اۋرۋ انىقتالعان. توقسان كۇنگە سوزىلعان قىس مەزگىلىندە اۋىرعانداردىڭ 81 مىڭنان استامى كوروناۆيرۋس، قالعان 6,8 مىڭى پنەۆمونيا پاتسيەنتتەرى. جەلتوقسان جانە اقپان ايلارى ارالىعىنداعى بارلىق كورسەتكىشتەردى مەزگىلگە ارنالعان قورىتىندى ماتەريالدان بىلە الاسىز.

"The Qazaq Times"