Қазақстанның денсаулық сақтау вице-министрі, бас мемлекеттік санитарлық дәрігер Ерлан Қиясов. Фото: ОКҚ

Қазақстанның бас мемлекеттік санитар-дәрігері, денсаулық сақтау вице-министрі Ерлан Қиясов министрліктің екінші толқындағы шарықтау кезеңі  қаңтар-ақпан айларында өтуі мүмкін деген болжамын бөлісті.

Оның айтуынша, қазір «эпидемиологиялық жағдай тұрақты». Бұған дейін Денсаулық сақтау министрлігі пессимистік сценарий бойынша, дерт өршитін кез желтоқсан-қаңтар айларына тұспа-тұс келеді деп болжаған.

Бірақ «бәріміз көріп отырғандай, ахуал оптимистік бағытта жалғасып жатыр».

«Біз болжамды жағдайға байланысты, апта сайынғы дерек бойынша қарастырып отырамыз. Жағдайдың нашарлауы туралы айтсақ, яғни пессимистік сценарийдің шарықтау кезеңі алдағы жылдың қаңтар айының соңы мен ақпан айында өтеді деп болжаймын», – деп хабарлады Қиясов.

Жаздыгүні Қазақстанда індет өршіп, Үкімет «маусым-шілде қырғынына» жол беріп алған. Сол кезде қате болжам жасаған министрліктің олқылығынан медицина мамандары мен ауруханаларда орын, дәрі-дәрмек жетіспей жүздеген адам қайтыс болған.

"The Qazaq Times"