Qan keşken jıldar beynesi. Foto: stihi.ru

Qazaqstan Respublikası Joğarğı Keñesiniñ Qaulısına säykes 1993-1999 jıldar aralığında bwrınğı İşki äskerdiñ, bügingi Wlttıq wlandıq jedel maqsattağı äskeri bölimderiniñ 2 mıñnan asa oficeri men sarbazı Täuelsiz memleketter dostastığınıñ birlesken batal'onında TMD sırtqı şekaraların qorğau üşin täjik-auğan şebinde bitimgerşilik mindetterin atqarğan bolatın.

Sol bir qayğılı oqiğanı eske alar bolsaq, osıdan 22 jıl bwrın, 7 säuir küni täjik-auğan şekarasında bitimgerlik missiyasın atqarıp jürgen sarbazdarımız qarulı lañkestik toptardıñ twtqiıldan jasağan şabuılına tap bolğan edi. Esil erler Pamir taularındağı Pşihavr şatqalında küşi özderinen äldeneşe ese basım sodırlarmen aqtıq demderi qalğanşa şayqasqa tüsti. Tört sağatqa sozılğan keskilesken wrıs 17 sarbazımızdıñ jasın ğwmırın mezgilsiz qidı. Degenmen, qaysar wldarımız el senimin adal aqtadı, jauğa jankeştilikpen toytarıs berip, wrpaqqa wran bolar erliktiñ eren ülgisin körsetti.

Erlik öşpeydi, ol uaqıt ötken sayın aybındana tüsedi. Esil erler ärqaşan el esinde, qasterli Otannıñ qauipsizdigi jolında jaujürek wlandardıñ atqarğan isteri mäñgilik qwrmet biiginde.

Biz azamat atına, jauınger mindetine daq tüsirmegen batır wldarımız - starşina Qalqaman Baqbaev, serjant Radik Qaymoldiev, kişi serjant Älihan Ögizbaev, qatardağı jauıngerler Erjan Baybağısov, Erbol Bekebaev, Bauırjan Dalabaev, Jaqsılıq Jansügirov, Imomaddin Jwmatov, Qanat Edırışev, Erbol Isabaev, Erjan Äbdiev, Erkebwlan Maqajanov, Mihail Martınenko, Anatoliy Meşkov, Dastan Nwrmetov, Erkin Bayğabılov, Tahir Rayımjanovtardıñ esimderin mäñgilik jadımızda saqtaymız. Ökinişke qaray, sol bir qatıgez sın sağatta jaraqat alğandardıñ birazı aramızdan mäñgilikke erte sapar şekti. Arada birneşe jıl ötken soñ-aq, bilikti oficerler Valeriy Lısenko men mayor Marat Ahmetovtar ömirden ozdı...

İşki äsker jauıngerleriniñ erlikterin Elbası – Qazaqstan Respublikası Qarulı Küşteriniñ Joğarğı Bas Qolbasşısı N.Ä.Nazarbaev ta joğarı bağalap: «Sizderdiñ jaqındarımız ben qaysar wldarıñızdıñ qazası respublikamızdağı ärbir twrğınnıñ jüregine öşpestey jara saldı. Qazaqstandıq batal'onnıñ sarbazdarı Täuelsiz Memleketter Dostastığı sırtqı şekarasınıñ täjik-auğan böligin erlikpen küzetti. Bozdaqtarımız memleketimizdiñ qauipsizdigin saqtau jolında janın pida etti. Olar bizdiñ beybitşiligimiz ben tınıştığımızdı qorğadı» dep qayğılarına ortaqtasıp, atap ötken bolatın.

Qazaqstan Respublikası Prezidentiniñ 1996 jılı 20 qaraşadağı Jarlığımen erlikpen qaza tapqan 5 jauınger İİ därejeli «Aybın» ordenimen, 12 sarbaz «Jauıngerlik erligi üşin» medaldarımen nagradtaldı.

Qazaqstan halqı öziniñ erjürek wldarın eşqaşan wmıtpaydı. Olardıñ esimderi elimizdiñ köptegen qalalarında köşeleri men mektepterine berildi. Äskeri bölimderde eskertkiş taqtalar ornatıldı.

Qazaqstandıq jauıngerlerdiñ täjik halqına körsetken bağa jetpes kömegi üşin 2007 jılı Duşanbe qalasında monument aşıldı.

Däl osı küni jıldağı dästürge say Wlttıq wlannıñ elimizdiñ tükpir-tüpkirindegi barlıq qwrılımdıq äskeri bölimderinde erlikke tağzım jasau şaraları ötedi.

Biıl da sol dästürge say, 7 säuir küni Almatı qalasında täjik-auğan şekarasında qaza tapqan jaujürek 17 sarbazdıñ erlik oqiğasınıñ 22-jıldığına oray bozdaqtarğa tağzım jasauğa arnalğan birqatar şaraları ötedi. «Eske alu men erlik küninde» Wlttıq wlan «Oñtüstik» öñirlik qolbasşılığınıñ 5571 äskeri böliminde eske alu şarası ötti. Sonday-aq, Panfilov atındağı sayabaqta eskertkişke gül şoqtarın qoyu räsimi boldı. Jäne Qwrlıq äskerleriniñ Äskeri institutında «Er esimi – el esinde» attı tağılımdıq jiın şarası ötkizildi.

“The Qazaq Times”