«Erlikke tağzım küni» şarasına jinalğan ardager äskeriler.

Halqımızdıñ tarihında  erekşe ataulı künder bar. Olar zor mänge ie. Mäselen, ömirdegi barlıq baq-baylığımızdıñ negizi – 16 jeltoqsan Täuelsizdik küni är qazaq üşin qımbat, qasterli. Sonday-aq, mäñgilik wmıtılmas künder bar. Keşegi İşki äsker, bügingi Wlttıq wlan üşin ol 7 säuir. Däl osı küni, 1995 jılı el üşin keudeni oqqa kergen qazaqstandıq İşki äskerdiñ jauıngerleri täjik-auğan şekarasında aybındı erliktiñ ne ekenin naqtı däleldep, qaytpas qaysarlıq, berispes batıldıqtıñ eren ülgisin körsetken bolatın. Amal qanşa, mwzday qarulanğan lañkestermen keskilesken sol şayqasta 17 bauırımız qaza bolıp, 34 jaraqat aldı. Olardı wmıtpau, erlikterin wrpaqtan wrpaqqa jetkizu bizdiñ bastı maqsatımız.

Qazaqstan Respublikası Wlttıq wlanında bwl kün jıl sayın «Erlikke tağzım küni» bolıp atalıp ötiledi. Eske alu şaraları, eldi, öskeleñ jas wrpaqtı eldikke, erlikke, birlikke şaqıruğa arnalğan tağılımdıq şaralar jer-jerde, respublika boyınşa är äskeri bölimde ötkiziledi.

«Erlikke tağzım küni» şarasınan körinis.

7 säuir küni Almatıda bwl kün erekşe äserli şaralarğa tolı boldı. Wlttıq wlannıñ «Oñtüstik» öñirlik qolbasşılığı 5571 äskeri böliminde el üşin ot keşken erlerdi eske alu şarası ötti. Onda söz alğan «Oñtüstik» öñirlik qolbasşılığınıñ kolbasşısı general-mayor Qayrat Aqtanov: «Körşiñniñ üyinde şu şıqsa, sende tınış jata almaysıñ. Toqsanınşı jıldardıñ almağayıp jıldarında da jağday osılay bolıp edi. Körşi täjik-auğan şekarasında soğıs otı uşığıp twrdı. Künde qan tögilu, qandı qasap, ot keşu. Osı twsta bizdiñ eldiñ mıñdağan jastarı da TMD memleketteri arasında jasalğan halıqaralıq kelisimşart ayasında osı ottı nükteden tabıldı, tau halıqtarına tınıştıq tilep, iştey qan jwta aqqan qart Pyandj özeniniñ jağasın bastı. Sol qantögiste erlikpen antqa adaldıqtarın däleldegen aldaspan namıstı qazaqstandıq 7-şi rotanıñ jaujürek jigitteriniñ qay-qaysınıñ bolsın batırğa layıq ornı bar. Olar bizdiñ mäñgilik jadımızda».

Sonımen qatar osı küni Qorğanıs ministrliginiñ Qwrlıq äskerleriniñ institutında «Erlik küni» ayrıqşa atalıp ötildi. Oğan auğan soğısı men özge täjik-auğan şekarası qaqtığısınıñ ardagerler qauımı, elimizdegi Täjikstan elşiliginiñ äskeri attaşesi, oqu ornınıñ basşılığı men kursanttarı qatıstı.

«Erlikke tağzım küni» şarasınan körinis.

Aldımen şaranı wyımdastıruşı retinde söz alğan «Ardager» -  respublikalıq Auğan soğısı jäne jergilikti qaqtığıstardıñ ardagerleri men mügedekteriniñ qoğamdıq odağınıñ törağası zapastağı podpolkovnik Serikbay Baymoldinov: «Täjik-auğan şekarasındağı sol qaralı oqiğağa biıl 22 jıl tolıp otır. Qaytkenmen, qaysar wldarımız ayqın basımdıqpen toytarıs tanıtqan jauğa barınşa tötep berip, jauıngerlik borıştarın öjettikpen ötkerdi. Abıroydı taptatpay, antqa degen adaldıqtarın tanıttı.  İşki äsker jauıngerleriniñ erlik isterin Elbası – Qazaqstan Respublikası Qarulı Küşteriniñ Joğarğı Bas Qolbasşısı N.Ä.Nazarbaev ta joğarı bağalap: «Qazaqstandıq batal'onnıñ sarbazdarı Täuelsiz Memleketter Dostastığı sırtqı şekarasınıñ täjik-auğan böligin erlikpen küzetti. Bozdaqtarımız memleketimizdiñ qauipsizdigin saqtau jolında janın pida etti. Olar bizdiñ beybitşiligimiz ben tınıştığımızdı qorğadı» degen bolatın. Sol uaqıttan beri sol 17 jauıngerdiñ erligin keşegi İşki äskerleri ılği 7 säuirde atap ötip keldi. Ol erlerimiz eñ äueli bükil elimizdiñ senip tapsırğan senimin aqtadı. Sondıqtan da men jäne bizdiñ ardagerler qauımdastığı osı kündi «Erlik» küni dep belgilep, erlikti däripteytin şaralardı elimizdegi barlıq qorğanıs salasınıñ wjımdarında ötkizudi wsınıp otırmız. Osı wsınımızdı oñ qoldap, mına aldımızda otırğan öskeleñ wrpaqqa tağılımdı tärbie bolatının jete tüsinip, osınday şaranı ötkizuge atsalısıp otırğan Qwrlıq äskerleriniñ äskeri institutınıñ basşılığına alğısımdı bildiremin. Endigi jıldardan bastap bwl ataulı kün - «Erlik küni» elimiz boyınşa bükil Otan qorğauşı jwrtşılıqtıñ ortaq şarası bolıp ötetine kämil senemin», - dep atap ötti.

«Erlikke tağzım küni» şarasınan körinis.

Söziniñ soñınan keyin ardagerler qauımınıñ törağası ardagerler odağınıñ atınan, atap aytqanda Bauırjan Momışwlı atındağı «Batırdıñ şapağatı», general-mayor I.Panfilov atındağı, soday-aq, Qazaqstan Respublikası Twñğış Qorğanıs ministri Armiya generalı S.Nwrmağambetov, eki dürkin Keñes Odağınıñ batırı T.Bigeldinov atındağı medal'darmen alqalı şarağa jinalğan ardagerler men qadirmendi qonaqtardı marapattadı. Mwnan soñ söz kezegin Täjikstan elşiliginiñ äskeri attaşesi polkovnik Maqswtjan Jumaev qazaqstandıq jauıngerlerdiñ täjik halqına degen bağa jetpes kömegi üşin 2007 jılı Duşanbe qalasında ülken monument ornatılğanın atap ötti. Sol erlik oqiğasınıñ közi tiri kuägerleri Wlttıq wlannıñ ardagerleri zapastağı polkovnik Erlan Aldanazarov, zapastağı podpolkovnik Qayrat Ğwsmanov jinalğan qauım aldında sol bir qiın qıstau künderi jaylı estelikterimen bölisip, tağılımdı äñgime ağının örbitti.

«Erlikke tağzım küni» şarasınan körinis.

Şara soñı patriottıq ruhta şırqalğan ändermen jalğastı. «Erlik küni» jaylı bizben öz pikirin bölisken «Oñtüstik» öñirlik qolbasşılığı qolbasşısınıñ tärbie jäne äleumettik-qwqıqtıq jwmıstar jönindegi orınbasarı polkovnik Sabırjan Süleymenov: «Batırlarımızdı wlıqtau halqımızdıñ saltı. Biz eş uaqıtta da el üşin janın pida etken arıstarımızdı wmıtpauımız kerek. Qayta sol erlerdiñ erlik isterimen jas wrpaqtı otansüygiştik ruhtıñ kemilin darıtıp, tärbieley biluimiz kerek. Ötken uaqıtta 7 säuir bozdaqtarğa tağzım jasau küni bolıp keldi. Endi ol jappay Otan qorğauşılardıñ eldiktiñ üşin ot keşken erlik isterin wlıqtaudıñ wyıtqısı bolğan «Erlik künine» aynalıp otır. Töbemizde mäñgilik beybit aspan ornasın dep tileymin. Bala jılap, ata-ana qayğırmasa eken. Sol wrısta qaza tapqan jaujürek jigitterimizdiñ qay-qaysı bolsa da batır atağına layıq. Olardıñ ruhtarına mıñ tağzım etemin», dep atap ötti.

Mayor Arman ÄUBÄKİROV,  Almatı qalası

“The Qazaq Times”