Ridder qalası foto: bureau.kz

Şığıs Qazaqstan oblısındağı Ridder qalasınıñ twrğındarı osımen üşinşi kün susız otır. 

Künniñ jıldam salqındauına baylanıstı qwbırlardan aqau şığıp, kanaldar mwzğa tolıp qalğan. Tez arada iske kirisken üş kölik jöndeu brigadası büginge deyin tolıqtay jöndep bitpegendigin qoğamdıq transport jäne kölik böliminiñ basşısı Quat Mwhamedçin mälimdep otır. Äu bastan qala twrğındarın sabırğa şaqırıp, jağdaydı tolıqtay tüsindiruge tırısqanımen, üş täulikten beri jağday qalıpqa tüser emes. Bwğan şamdanğan halıq, özderiniñ narazılıqtarın äleumettik jeli arqılı jarısa jazuda.

Su qwbırı tolıqtay iske qosılmağandıqtan, auız sudı arnayı köliktermen qalağa kirgizude. Jağdaydıñ şieleniskendigin bayqağan basşılar mekteptegi sabaqtardı qısqartıp, balabaqşalardıñ jwmısın jartı täulikke auıstırğan. Osığan baylanıstı qala basşılığı jaqın uaqıtta barlıq jağdaydı qalıpqa keltirge uäde berdi. Sonday-aq auız sudı ünemdeuge ötiniş bildirgen.

Alayda, jıl sayın qaytalanatın jağdayğa halıq tım aşınıp otır. Qısqı dayındıq kezinde barlığı sätti dep qorıtındı şığaratın kommunaldıq qızmetkerlerdiñ nätijesi, alğaşqı qardan keyin-aq belgili bolatındığı birinşi retki jağday emes. «Ayta-ayta Altaydı, Jamal apam qartaydı» degendey, isten şıqqan qwbırdı jıl sayın jırlaytın twrğındardıñ biıl da kütuden basqa amalı qalmay otır.

"The Qazaq Times"