ريددەر قالاسى فوتو: bureau.kz

شىعىس قازاقستان وبلىسىنداعى ريددەر قالاسىنىڭ تۇرعىندارى وسىمەن ءۇشىنشى كۇن سۋسىز وتىر. 

كۇننىڭ جىلدام سالقىنداۋىنا بايلانىستى قۇبىرلاردان اقاۋ شىعىپ، كانالدار مۇزعا تولىپ قالعان. تەز ارادا ىسكە كىرىسكەن ءۇش كولىك جوندەۋ بريگاداسى بۇگىنگە دەيىن تولىقتاي جوندەپ بىتپەگەندىگىن قوعامدىق ترانسپورت جانە كولىك ءبولىمىنىڭ باسشىسى قۋات مۇحامەدچين مالىمدەپ وتىر. ءاۋ باستان قالا تۇرعىندارىن سابىرعا شاقىرىپ، جاعدايدى تولىقتاي تۇسىندىرۋگە تىرىسقانىمەن، ءۇش تاۋلىكتەن بەرى جاعداي قالىپقا تۇسەر ەمەس. بۇعان شامدانعان حالىق، وزدەرىنىڭ نارازىلىقتارىن الەۋمەتتىك جەلى ارقىلى جارىسا جازۋدا.

سۋ قۇبىرى تولىقتاي ىسكە قوسىلماعاندىقتان، اۋىز سۋدى ارنايى كولىكتەرمەن قالاعا كىرگىزۋدە. جاعدايدىڭ شيەلەنىسكەندىگىن بايقاعان باسشىلار مەكتەپتەگى ساباقتاردى قىسقارتىپ، بالاباقشالاردىڭ جۇمىسىن جارتى تاۋلىككە اۋىستىرعان. وسىعان بايلانىستى قالا باسشىلىعى جاقىن ۋاقىتتا بارلىق جاعدايدى قالىپقا كەلتىرگە ۋادە بەردى. سونداي-اق اۋىز سۋدى ۇنەمدەۋگە ءوتىنىش بىلدىرگەن.

الايدا، جىل سايىن قايتالاناتىن جاعدايعا حالىق تىم اشىنىپ وتىر. قىسقى دايىندىق كەزىندە بارلىعى ءساتتى دەپ قورىتىندى شىعاراتىن كوممۋنالدىق قىزمەتكەرلەردىڭ ناتيجەسى، العاشقى قاردان كەيىن-اق بەلگىلى بولاتىندىعى ءبىرىنشى رەتكى جاعداي ەمەس. «ايتا-ايتا التايدى، جامال اپام قارتايدى» دەگەندەي، ىستەن شىققان قۇبىردى جىل سايىن جىرلايتىن تۇرعىنداردىڭ بيىل دا كۇتۋدەن باسقا امالى قالماي وتىر.

"The Qazaq Times"