«Eyr Astana» qaşanğı alañdata beredi?

Jaqında «Eyr Astana» äue kompaniyasınıñ wşağı apattı jağdayda qonuğa mäjbür bolğan. KS 935 reysin orındağan wşaq Almatıdan Kuala-Lumpurdı betke alğan. Onıñ aldında 11 qaraşa küni KS1388 reysin orındağan tağı bir wşaq Portugaliya territoriyasında qauipti jağdayğa wşıray jazdap, äupirimdep jerge qonğan edi. Al'verka äuejayınan wşıp şıqqan layner birazdan soñ apat signalın bere bastağan. Äue kemesi sol jaqta tehnikalıq qızmet körsetuden ötip, Qazaqstanğa qaytuı tiis bolğan.

Apattı jağday tuındağan mezette portugaliyalıq M-16 äskeri istrebitelderi dereu kömekke wmtılğan. Astana uaqıtı boyınşa sağat 21:26-da üşinşi mümkindikten keyin ğana wşaq Lissabon mañındağı äskeri äuejayğa qona alğan. Bortta altı ekipaj müşesi bolıptı: Kapitan, eki wşqış jäne üş bort injeneri. Portugaliyalıq BAQ-tıñ jazuınşa wşqıştar qattı streske tüsip, olarğa dereu därigerlik kömek qajet etilgen. Äue kompaniyasınıñ prezidenti Piter Foster bwl oqiğa turalı pikir bildirgen. «Sanaulı minuttar işinde wşqıştar laynerdi baqılaudıñ belgili bir deñgeyin qalıpqa keltirgen. Olar mwnı apattı signaldı bergennen keyin jasağan. Bwl uaqıt işinde olar portugaliyalıq tarappen ünemi baylanıs jasap otırıptı. Äuede bolğan oqıs jağdaydıñ aq-qarası ajıratılatın boladı. Bizdiñ oyımızşa, bwl jağday Portugaliyada ötkizilgen jöndeu jwmıstarınıñ äserinen tuındağan sekildi» deydi ol.

Vyaçeslav Auşev, Foto: Eyir Astana.

Keyin wşaqtı qondırğan 40 jastağı wşqış Vyaçeslav Auşev ekeni mälim boldı. Ol äue kompaniyasında 2011 jıldan beri jwmıs isteydi eken. Wşqış äleumettik jelide jazba jariyalap, özderine qoldau körsetken jandarğa alğısın bildirgen.

«Biz üşin alañdağan jandardıñ bärine ülken rahmet aytamın! Qoñırau şalıp, sms jazıp jattı. Sizderdiñ jılı sözderiñiz üşin rahmet! Biz özimizge tiesili mindetti jasadıq. Bizdi sol üşin oqıttı, dayındadı. Iä, osığan deyin körgen-bilgeniñniñ bärin tügel qoldanuğa tura keletin sätter boladı. Biraq wşaq bütin, bäri aman-esen jäne tuımız da bülingen joq. Sonımen qatar bizdiñ instruktorlarğa da alğıs aytsam deymin. Äue kompaniyamız tarapınan öte mıqtı qoldaudı sezine aldıq. Portugaliyalıq wşqıştar da asa käsibi qimıldadı. Zertteu tolıq ayaqtalğanşa mäseleniñ mänisin tarqatıp ayta almaymın» dep jazdı ol Feysbuk jelisinde.

Bwl tipti de eleusiz qaldıratın jağday emes. Kündelikti «apattı jağdayda qondı», «äuejayğa qaytıp oraldı» degen taqırıptar qoyılğan aqparattarğa da asa mıñq etpeytin bolğanbız. Solay boluı zañdılıq sekildi. Alda-jalda apat bola qalsa bir şu etisermiz. Äri qaray qalıptı tirlik jalğasa beredi. Ras, bizdiñ qoğamnıñ qazir eti tirile bastadı. Talap etudiñ jön-josığın igerdi. Dauısın qattıraq şığaradı. Qajet bolsa sottasadı. Biraq şapsañ qılış ötpeytin, aytsañ dausıñ jetpeytin key bilik qwrılımdarı tas meñireu sekildi melşiip, öz qalağanın jüzege asıra bergenge ädettenip alğan. Bwl jaman ğadet aviaciya salasın jaylamasa eken dep tileymiz. Aşınğanda şığadı aşı dausıñ. «Eyr Astananıñ» erkeligi bir bwl ğana emes. Bwğan deyin talay şoşıttı. Wlttıq kompaniya degen äjeptäuir statusı bar. Oğan eş talasımız joq. Alayda «wlttıq» degen atına say bola almay jatır dep – wsınğan tağamın da, körsetken qızmetin de sınağandar jeterlik. İzdeseñiz äleumettik jeli äleminen oñay tabasız. Elimizdegi bas kompaniyanıñ wşaqtarı bwğan deyin de talay ret apattı jağdayda äuejay jağalap ketti. Aldıñğı jıldarğa köz jügirtpegenniñ özinde soñğı eki jılda jolauşılardıñ zäre-qwtın qaşırğan birneşe oqiğa boldı.

05.03.2017. Almatıdan Oralğa wşqan «Eyr Astana» wşağı şwğıl jağdayda Aqtöbege qonuğa mäjbür boldı. KS881 reysin orındağan wşaqta tehnikalıq qiındıqtar tuındağan.

07.03.2017. KS672 reysin orındap, Astana-Almatı bağıtında äuege köterilgen Boing 757-200 wşağı qozğaltqıştarınıñ biriniñ isten şığuı sebepti qaytadan äuejayğa oralğan. Bwl uaqıtta wşaqta 72 jolauşı men 8 ekipaj müşesi bolğan.

09.03.2017. Almatıdan Atırauğa bağıt alğan, KS877 reysin orındauşı wşaq navigaciyalıq jüyede tuındağan aqau äserinen qaytadan äuejayğa kelgen. Bort basqa äue kemesine auıstırıladı.

Ay bastala salısımen üş birdey apattı jağdaydıñ boluı ärine, qoğamdı alañdatpay qoymadı. Biraq kompaniya tarapı bwğan selt etken joq. Qauipsizdik jönindegi menedjer Sergey Makarenko bwl oqiğalardı «jäy ğana kezdeysoqtıq» dep atadı.

«Bolğan üş oqiğa da – aviaciyalıq tehnikanıñ isten şığuınan boldı. Däl qazirgi sätte osığan baylanıstı qanday da bir qatelik joq. Komissiya jwmıs istep jatır. Üş bortqa da tekseris jürgizilip, jwmıstar istelip, jöndelmegen agregattar auıstırıldı. Öz täjiribemnen de aytıp bere alamın, injener bolıp jwmıs istegen kezde äldebir jüyeni wmıtıp ketesiñ. Jartı jıl boyı bayqalmay kelgen key jüyeler keyde osılay qatarınan bolatın oqıs jağdaylarğa wrındıradı. Sondıqtan bwl taza kezdeysoqtıq» depti Makarenko.

22.03.2017. Embreaer äue kemesi KS109 reysin orındau sätinde şwğıl jağdayğa tap boldı. Bişkekke bağıt alğan wşaq Almatı äuejayına qaytadan kelip qonğan. Bwl turalı belgili qazaqstandıq ekonomist Denis Krivoşeev kezinde Feysbuk jelisinde jazdı. Onıñ aytuınşa, wşu kezinde layner qozğaltqışı jwmıs istemey qalğan. Al qayta qonu kezinde laynerdiñ nebäri bir ğana qozğaltqışı jwmıs istepti. Abıroy bolğanda wşaq jerge aman qondı. Wşaq bortında 50 jolauşı bolğan.

11.04.2017. Bortına 133 jolauşını otırğızıp Almatıdan Dubayğa wşqan äue kemesi şwğıl jağdayda äuejayğa qayta oralu turalı şeşim qabıldaydı. Kompaniya tarapı şwğıl jağdaydıñ tuındau sebebin – qozğaltqış parametrlerindegi indikaciyanıñ istemey qaluınan dep tüsindirdi.

Şwğıl jağdaylar legi 2018 jılda da jalğasın taptı. Ökinişke qaray.

23.02.2018. Deliden Almatığa wşuı tiis bolğan «Eyr Astana» wşağı Ündistan äuejayına qayta qonğan. Wşu sätinde artqı jüksalğıştağı lyuktardıñ biriniñ aşıq qalğanı turalı avtomattı signal tüsedi. Keyinirek kompaniya mamandarı onı jalğan signal dep tüsindirdi.

24.03.2018. Qarağandı-Almatı bağıtındağı KS312 reysin orındauşı «Boing-757» wşağı Astana äuejayında apattı türde qondı. Jolauşılar dereu qonaqüyge ornalastırılğan. Olar ertesine, 25 naurız küni KS622 jäne 952 reysimen Almatığa jiberilgen. Mamandar şwğıl qonudıñ sebebin – paydalanılğan gaz temperaturasınıñ qauipti jağdaydağı körsetkişi äseriniñ qozğaltqış qızmetine keri ıqpal etkeninen dep tüsindirgen.

08.09.2018. Almatı – Tbilisi bağıtındağı reysti orındauşı wşaq Aqtau äuejayına şwğıl qondı. Reystiñ toqtap qaluına aua rayı jağdayı äser etken. Qonğannan keyin wşaqtan birqatar tehnikalıq kemşilikter anıqtalğan. Aqırı jolauşılar Gruziya astanasına basqa äue kemesimen attandırılğan.

15.09.2018. Atırau – Astana reysin orındap kelip, twraqta twrğan Airbus A320 wşağınıñ sol jaq qozğaltqışı örtengen. Ört söndiruşilerdiñ arqasında layner örtten aman saqtalğan. 91 jolauşınıñ eşqaysısı zardap şekken joq.

Joğarıdağı şwğıl jağdaylardıñ barlığında derlik adam şığınınıñ bolmağanı, öreskel tehnikalıq aqaulardıñ aytulı apatqa wlaspağanı quantadı, ärine. Täube degizedi. Biraq äuejayğa qayta oralğan ärbir wşaqqa täube ayta beruge tağı bolmas. Äri ol wlttıq kompaniyağa tiesili äue transportı bolsa. Wşu jolağınan wzatılğan ärbir layner aldı-artına qaramastan zımırap, mejeli jerge entikpey, mertikpey jetse igi. Onsız da äskeri häm azamattıq aviaciyadağı qatelikter kesirinen jılnamamızğa tüsken qaralı künder az emes. Onıñ qatarınıñ tağı bir äue apatı esebinen molaya tüsuin eş pende qalamaydı. Biz äli oqiğanıñ sebebimen küresemiz. Ärkez «Eyr Astana» wşağındağı tehnikalıq kemşilikke baylanıstı komissiya qwrılğanı aytıladı. Äri ketse sol komissiyanıñ äldeneni anıqtap, tiisti şara qoldanğanı jazıladı. Bitti. Arı qaray – siırqwyımşaq. Bizge saldardı anıqtau jetispeytini ras. Köp rette jauırdı jaba toqi salğımız kep twradı. «Eyr Astana» siyaqtı wlttıq kompaniyamızdıñ bar bolğanın, onıñ azdı-köpti halıqaralıq sertifikattarğa ie bolıp, jetistikterge jetip jatqanın da joqqa şığarğımız kelmeydi. Biraq tarazınıñ bası qay jaqqa qaray auıp bara jatqanı esi tüzu, sanası salihalı adamğa ayqın körinse kerek.

“The Qazaq Times”