Photo: Youtube.com

Özbekstannıñ twñğış prezidenti Islam Karimovtiñ birinşi nekesinen tuğan wlı Petr Mäskeudegi Tversk audandıq sotına şağımdanıp, jwmıs beruşilerden jwmısşılar aylığın berudi talap etti.

Tversk audandıq sotı Karimov degen azamattıñ «Uzbekiston havo yullari» äue kompaniyasın sotqa bergenin rastadı.

"Bizde rasında şağım beruşiler arasında Karimov degen familiya bar. Biraq onıñ Özbekstannıñ eks-prezidentiniñ wlı ma, joq pa, bilmeymin. Onıñ şağımı boyınşa sot otırısı 24 qazanda ötedi. Jauap beruşi – "Uzbekiston havo yullari", - dedi Tversk audandıq sotınıñ törağa orınbasarı Anastasiya Dzyurko.

Birqatar BAQ-tıñ jazuınşa, Petr Karimov wzaq jıldar boyı «Uzbekiston havo yullari» wlttıq kompaniyasında basşılıq qızmette istegen. Biraq 2016 jılı äkesi qaytıs bolğannan keyin, qızmetinen alınğan. Petr Karimovtiñ şağımı boyınşa, kompaniya jwmıstan şığarar aldında aylıq tölemegen.

Biraq «Uzbekiston havo yullari» wlttıq kompaniyasınıñ baspasöz hatşısı Zumrad Şodjalilov jergilikti BAQ-qa kompaniyanıñ Petr Karimovpen tolıq esepteskenin aytqan. Şağımdanuşığa da, osılay dep jauap bergen.

Islam Karimov tiri kezinde onıñ Petr attı wlı jöninde aşıq aytılmaytın. Biraq soñğı jıldarı BAQ betterinde Islam Karimovtiñ Natal'ya Kuçmamen aradağı nekeden wlı bar ekendigi aşıq jazılıp jür.

Qazir 1969 jılı tuılğan Petr Karimov Islamwlı Mäskeu oblısında twradı. Ekonomikalıq bilimi bar. Ol osığan deyin biraz uaqıt «Aziya-Invest Banktiñ» basqarma basşısınıñ orınbasarı qızmetin atqarğan.

"The Qazaq Times"