Putin men Şoygu. Foto; CNBC

Bügin, 9 mamır küni Mäskeudegi Qızıl alañda jıldağıday äskeri parad ötti. Alañda wzaq bayandama jasağan Putin söziniñ köbin Ukrainadağı soğısqa arnadı. Degenmen, jwrt boljağanday Ukrainağa «resmi soğıs jariyalau» bolğan joq.

Sondağı prezident Putinniñ aytqan sözi

Qızıl alañdağı sözin prezident Putin Resey tarihındağı jeñister turalı äñgimeden bastadı. Ekinşi düniejüzilik soğıs tarihı turalı sözden keyin ol: «Qazir de sizder bizdiñ Donbasstağı jarandar üşin, otanımız – Reseydiñ qauipsizdigi üşin küresip jatsızdar», – dedi. Ol sonday-aq, faşizmdi talqandağan «jeñimpazdardıñ qaharman buını» «bizge saq boludı ösiettegen» degendey gep qılıptı. Bwdan tıs bıltır jeltoqsanda AQŞ pen NATO-ğa qauipsizdik kepildikteri turalı wsınıs tastağanın atay otırıp: «... Onıñ bäri tekke ketti, NATO elderi bizdi tıñdağısı kelmeydi», – degen pikirin de ortağa salğan.

Putin bayandamasında Ukrainadağı soğısqa köbirek söz arnadı. Foto: Kyiv Post

Putinniñ aytuınşa olar (Ukrain jäne onı qoldağan Batıs. QT) «Donbassta kezekti jazalau operaciyasına dayındalıp jatıptı», bwğan qosa Kiev yadrolıq qaruğa qol jetkizudiñ ıqtimaldığına ie eken. Osılayşa Reseydi alañdatatın qauipti äreketteri kezegimen bolıp, Donbasstağı soğısqa itermelepti.

Resey prezidenti sözinde reseylik qarulı küşterdiñ Ukrainadağı äreketi «agressiyanı toqtatuğa jasalğan pärmendi soqqı» retinde ataldı, sonday-aq, Ukrainadağı äskeri äreket birden bir dwrıs şeşim bolğanın qaytalağan. «Donbass qosındarı Resey äskerlerimen birge öz jerinde soğısıp jatqanın» aytqan Putin: «Sizder wlı otan soğısınıñ jeñisin eşkim wmıtıp qalmas üşin, öz otandarıñız ben onıñ jarqın bolaşağı üşin küresip jatsızdar», – depti.

Putinniñ bügin ğana äskeri parad qarsañındağı sözin älemniñ köptegen aqparat qwraldarı taldap jatır. Onıñ Ukrainadağı öz äreketterin aqtağan sözderi qalay da qazirgi Mäskeu biliginiñ wstanımın tağı bir ret ayqındadı jäne mäskeulik sayasattıñ jaqın arada soğıs toqtatuğa, beybitşilik kelissözderine kelu nietiniñ joqtığına sırtqı älemniñ közin tağı bir märte jetkizgendey boldı.

Altınay Mwrat