Foto: Sputnik Kırgızstan

Bügin Qırğızstan parlamentiniñ spikeri Çınıbay Twrsınbekov otstavkağa ketti. Osığan baylanıstı qırğız elinde türli boljamdar aytıluda. Biri onı el prezidenti Almazbek Atambaev jwmıstan quıp jiberdi dese, biri ol öz erkimen ketti degen oyda.

Qazan ayınıñ 25-si küni ötken Joğarı Keñestiñ kezekti otırısında Çınıbay Twrsınbekov öziniñ otstavkağa ketetindigi jayında mälimdeme jasadı. Qırğızstandıq sarapşılardıñ pikirinşe, bir jarım jıl ğana spiker bolıp otırğan Twrsınbekov ornınan öz erkimen ketpegen. Onıñ qızmetinen ketuine Almazbek Atambaevtıñ qatısı bar. Öytkeni Çınıbay Twrsınbekov prezident saylauı aldında Sooronbay Jeenbekovtıñ Qırğızstan social-demokratiyalıq partiyası atınan saylauğa qatısuına qarsı bolğan. Şilde ayınıñ 15-si küni ötken partiya s'ezinde Twrsınbekov alda kele jatqan prezident saylauına partiya atınan özi qatısuğa dayın ekendigin aytqan. Ol tipti Jeenbekovtı «öz betimen şeşim qabılday almaytın sayasatker» dep te atağan. Al bwnıñ barlığı el prezidenti Almazbek Atambaevqa wnamağandığı belgili.

Qırğız sarapşılarınıñ oyınşa, Twrsınbekov qızmetinen öz erkimen ketpegen. Onı Atambaev jwmıstan quğan jäne bwl prezident saylauınan keyin bilik basındağı auıs-tüyisterdiñ bası ğana. Qazirdiñ özinde Twrsınbekovtıñ otstavkağa ketuimen qatar parlamentti merziminen bwrın taratu jayında äñgimeler aytıluda. Bwnday qañqu sözderdiñ şığuına sebep te joq emes. Öytkeni qazirgi qırğız parlamentiniñ basım köpşiligin «Respublika – Ata-Jwrt», «Onuguu-Progress» jäne «Ata-Meken» oppoziciyalıq partiyalarınıñ ökilderi qwraydı. Al «Respublika – Ata-Jwrt» pen «Onuguu-Progress» partiyalarınıñ jetekşileri osı jolı prezident saylauında jeñilgen Ömirbek Babanov pen Baqıt Torobaev ekendigin eskersek, onda «aldağı uaqıtta Qırğız Joğarı Keñesi merziminen bwrın taratıluı mümkin» degen sözdiñ janı bar ekendigine köz jetkizemiz.

Bwdan bölek qazirgi tañda qırğız qoğamında Çınıbay Twrsınbekovtıñ ornına kim kelui mümkin degen swraq jii talqılanuda. Biraq oğan jauapta joq emes. Qırğız BAQ ökilderiniñ oyınşa, Almazbek Atambaev Twrsınbekovtıñ ornına sayasat alañındağı jaqtastarınıñ biri «Qırğızstan» frakciyasınıñ köşbasşısı Dastanbek Jwmabekovtı qoyuı mümkin. Sebebi Joğarı Keñeste «Qırğızstan social-demokartiyalıq partiyasınıñ» «Qırğızstan» frakciyasınan basqa odaqtası joq. Biraq Twrsınbekov jurnalister aldında söylegen sözinde spiker qızmetinen ketse de, parlamentte qalatındığın aytqan. Al bwl degenimiz  kelesi spiker bolıp keletin adamğa oñay timesi anıq. Bir sözben aytqanda aldağı uaqıtta bizdi qırğız sayasat sahnasında Almazbek Atambaev pen Sooronbay Jeenbekovtıñ basqaruımen jasalatın qızıqtı qoyılımdar kütip twr.

“The Qazaq Times”