QR SİM Almatıdağı bölimi. Foto: QT

Bügin, 24 qazan küni QR Sırtqı İster Ministrliginiñ Almatıdağı böliminde Qıtaydıñ Şınjañ jerinde qamauğa alınğan nemese «sayasi üyrenuge» jiberilgen qazaq azamattarınıñ Qazaqstandağı tuıstarın, olardıñ arız-şağımın qabıldau boldı.

Şekaranıñ arğı betinde qamauğa alınğan nemese «sayasi üyrenuge» jiberilgen tuıstarı bar Qazaqstan Respublikasınıñ otızdan asa azamatı Almatıdağı Sırtqı İster Ministrliginiñ ğimaratı aldına jinaldı. Qwzırlı orın jinalğandardan 15 adamdı jeke-jeke qabıldap, Qıtayğa ketip orala almay otırğan nemese sonda twratın tuıstarınıñ ükimet jağınan qısım körgen isi turalı män-jay swrasqan.

Alayda qabıldauğa BAQ ökilderi qatıstırılmadı. Qwzırlı orınnıñ tabaldırığın attay alğan adamdardan swrap biluimizşe, QR SİM Qıtayda qamauğa alınğan nemese qandayda bir qısımdar körip jatqan adamdardıñ tikeley tuıstarınıñ arızın jeke-jeke qabıldaytın bolğan. Azamattardıñ arız-şağımı negizinde Sırtqı ister ministrligi Qıtaydıñ Qazaqstandağı elşilikterine jäne QHR SİM-nen atalğan isti anıqtap beruin talap etpek.

Arız beruşilerdiñ sözine qarağanda Şınjañ jerinde qısımğa wşırağandar arasında Qazaqstan azamattarı da boluı mümkin dep otır. Biraq ol turalı anıq derek joq. Aldağı uaqıtta bwl adamdardıñ tuıstarınan şağımdardı qabıldap alıp, Qıtay tarabınıñ tekserip-anıqtauına joldamaq.

Sırtqı İster ministrliginiñ qabıldauına kirgen arız beruşiler. Foto: QT.

Arız beruşilerdiñ biri, Qazaqstan azamatı Jwmağazı Däleywlınıñ äyeli Qızırhan Orazbekqızı älide QHR azamatı. Qıtaydan zeynetaqı alatın Qızırhandı Şınjañğa şaqırtıp alğan. Barğan küni wyalı telefonın alıp ketip tekseredi. Keyin özin «sayasi üyrenu» dep qamaqqa alğan. Jwmağazı äyeliniñ qaşan bosatılatının bile almay otırğanın aytadı.

Osığan wqsas jäne özge de jağdaylarda qısım körgen qazaq azamattarınıñ tuıstarınan jetken arız-tilekti tıñdağan QR SİM aldağı uaqıtta Qıtay elşilikteri arqılı jauap alıp beredi degen ümittemiz.

“The Qazaq Times”